హైదరాబాద్‌లో ప్రపంచ దిగ్గజ సంస్థ గోల్డ్‌మెన్‌సాక్స్‌ భారీ విస్తరణ

A global company in Hyderabad
Goldman Sachs is a massive expansion– అదనంగా 2వేల మంది నిపుణులకు ఉద్యోగ అవకాశాలు
– న్యూయార్క్‌లో మంత్రి కేటీఆర్‌తో
– సమావేశం అనంతరం కంపెనీ నిర్ణయం
– బ్యాంకింగ్‌, ఫైనాన్స్‌, ఇన్సూరెన్స్‌ రంగాలు బలోపేతం : కేటీఆర్‌
నవతెలంగాణ బ్యూరో-హైదరాబాద్‌
రాష్ట్రానికి మరో భారీ పెట్టుబడి వచ్చి చేరింది. అంతర్జాతీయ బ్యాంకింగ్‌, ఫైనాన్స్‌ దిగ్గజ సంస్థ గోల్డ్‌మెన్‌సాక్స్‌ తెలంగాణలో తన భారీ విస్తరణ ప్రణాళికలను ప్రకటించింది. పరిశ్రమలు, ఐటీ శాఖ మంత్రి కేటీఆర్‌తో అమెరికాలోని న్యూయార్క్‌ నగరంలోని కంపెనీ కేంద్ర కార్యాలయంలో సంస్థ చైర్మెన్‌, సీఈవో డేవిడ్‌ ఎం సోలమన్‌ బందంతో జరిగిన సమావేశం అనంతరం కంపెనీ ఈ మేరకు బుధవారం తన ప్రకటనను వెలువరించింది. గోల్డ్‌మెన్‌సాక్స్‌ సంస్థ హైదరాబాద్‌ నగరంలో తన కార్యకలాపాలను పెద్ద ఎత్తున విస్తరించేందుకు సంసిద్ధంగా ఉన్నామని తెలిపింది. తన విస్తరణ ప్రణాళికల్లో భాగంగా ప్రస్తుతం ఉన్న వెయ్యి మందిని మరో రెండు రెట్లు పెంచి రెండు వేల మంది నిపుణులకు అదనంగా ఉద్యోగ అవకాశాలను కల్పించనుంది. ఇందుకోసం సుమారు మూడు లక్షల చదరపు అడుగుల విస్తీర్ణంలో ఈ కార్యాలయాన్ని విస్తరించనుంది. బ్యాంకింగ్‌ సేవలు, బిజినెస్‌ అనలిటిక్స్‌, ఇంజనీరింగ్‌ వంటి వివిధ రంగాలలో గోల్డ్‌మెన్‌ సాక్స్‌ సంస్థ కార్యకలాపాల బలోపేతం కోసం ఈ నూతన కేంద్రం పనిచేయనున్నది. తమ సంస్థ కార్యకలాపాలకు అనుగుణంగా కావాల్సిన ఆర్టిఫిషియల్‌ ఇంటిలిజెన్స్‌, మెషిన్‌ లెర్నింగ్‌ విభాగాల్లోనూ హైదరాబాద్‌లో ఏర్పాటు చేయనున్న నూతన కార్యాలయం ప్రధానంగా దష్టి సారిస్తుందని గోల్డ్‌ మెన్‌ సాచ్‌ సంస్థ తెలిపింది. హైదరాబాద్‌ నగరంలో బ్యాంకింగ్‌, ఫైనాన్స్‌ సర్వీసెస్‌, ఇన్సూరెన్స్‌ రంగాల ఎకోసిస్టం బలంగా ఉన్నదని, దీనికి అదనంగా రాష్ట్ర ప్రభుత్వ ప్రోత్సాహక పూరిత విధానాలు, హైదరాబాద్‌ నగరంలో ఉన్న పెట్టుబడుల అనుకూల వాతావరణం వల్ల తమ విస్తరణ ప్రణాళికలను ప్రకటిస్తున్నట్టు సంస్థ చైర్మెన్‌, సీఈవో డేవిడ్‌ ఎం సోలోమన్‌ తెలిపారు. హైదరాబాద్‌ నగరంలో తమ నూతన కార్యాలయం, తమ ఇన్నోవేషన్‌ లక్ష్యాలకు, కార్యకలాపాలకు అనుగుణంగా పనిచేస్తుందని తెలిపారు. 2021 జులై నుంచి హైదరాబాద్‌ నగరంలో తన కార్యకలాపాలు ప్రారంభించిన సంస్థ, అప్పటి నుంచి వేగంగా తన విస్తరణ ప్రణాళికలకు సంబంధించిన అంశాన్ని పరిశీలిస్తూ వస్తుందన్నారు. పదేండ్లల్లో హైదరాబాద్‌ నగరం సాధించిన అద్భుతమైన ప్రగతి, ముఖ్యంగా పెట్టుబడుల అంశంలో స్నేహపూర్వక వాతావరణాన్ని దష్టిలో ఉంచుకుని విస్తరించనున్నట్టు ప్రకటించారు. ఇప్పటికే తమ కార్యకలాపాలు నిర్వహిస్తున్న హైదరాబాద్‌ కార్యాలయం సంస్థగతంగా అంతర్జాతీయ ఖ్యాతిని అందుకున్నదని ఆయన ప్రశంసించారు. ఈ విస్తరణతో తమ సంస్థ సిబ్బంది మొత్తం మూడు రెట్లు అవుతుందన్నారు. హైదరాబాద్‌ నగరాన్ని అత్యుత్తమ పెట్టుబడుల గమ్యస్థానంగా మార్చేందుకు తెలంగాణ ప్రభుత్వం చేస్తున్న ప్రయత్నాలు ఫలిస్తున్నాయని ఈ సందర్భంగా మంత్రి కేటీఆర్‌ తెలిపారు. ఇప్పటికే ప్రపంచ బ్యాంకింగ్‌ ఫైనాన్స్‌ సేవల్లో అత్యంత ప్రతిష్ట కలిగిన మాస్‌ మ్యూచువల్‌, హెచ్‌ఎస్‌బీసీ, స్టేట్‌ స్ట్రీట్‌, బెర్కాడియా వేల్స్‌ ఫార్గో, జేపీ మోర్గాన్‌ వంటి కంపెనీలు హైదరాబాద్‌ నగరంలో పెద్ద ఎత్తున తమ కార్యకలాపాలను విస్తరించిన విషయాన్ని గుర్తు చేశారు. గోల్డ్‌ మెన్‌ సాక్స్‌ సంస్థ విస్తరణ ప్రణాళికలు ప్రకటించడం ద్వారా ఈ రంగంలో హైదరాబాద్‌ స్థానం మరింత బలోపేతం అవుతుందని తెలిపారు.
నాస్కామ్‌లో ఆర్‌అండ్‌డీ సౌకర్యం
రెండు స్టార్టప్‌లు హైదరాబాద్‌లోని నేషనల్‌ సెంటర్‌ ఫర్‌ అడిటివ్‌ మాన్యుఫ్యాక్చరింగ్‌(నాస్కామ్‌)లో తమ ఆర్‌అండ్‌డీ సౌకర్యాలను ఏర్పాటు చేశాయి. బుధవారం నుంచి తమ కార్యకలాపాలను అవి ప్రారంభించాయి.ఎమర్జింగ్‌ టెక్నాలజీస్‌ వింగ్‌ డైరెక్టర్‌ రమాదేవి లంక, నాస్కామ్‌ ఇండియా సీఇఓ జస్‌ప్రీత్‌సిద్ధు, స్కైరూట్‌ ఏరోస్పేస్‌ సీటీఓ డాక్టర్‌ సీవీఎస్‌ కిరణ్‌, హైదరాబాద్‌ ఐఐటీ మెటీరియల్స్‌ సైన్స్‌ అండ్‌ మెటలర్జికల్‌ ఇంజినీరింగ్‌ ప్రొఫెసర్‌ జీడీ.జానకిరామ్‌, ఇతర ప్రభుత్వ అధికారులు, ప్రముఖ సంకలిత తయారీ పరిశ్రమల ప్రతినిధులు లాంచ్‌లో పాల్గొన్నారు.
‘దేశంలో స్థానిక పర్యావరణ వ్యవస్థ అభివద్ధిని లక్ష్యంగా చేసుకుని మరిన్ని పరిశ్రమ భాగస్వాములతో మరింత సహకరించడానికి నాస్కామ్‌ ప్రయత్నాలు చేస్తుంది. యాడిటివ్‌ మాన్యుఫ్యాక్చరింగ్‌ టెక్నాలజీలో భారతదేశాన్ని స్వావలంబనగా మార్చాలనే దష్టి ఇంకా ఉంది’ అని ఎమర్జింగ్‌ టెక్నాలజీస్‌ వింగ్‌ డైరెక్టర్‌ రమాదేవి లంక అన్నారు.