మైత్రీ బాక్సాఫీస్‌, మైత్రీ ఆర్ట్స్‌ బ్యానర్స్‌పై డాక్టర్‌ లక్ష్మణరావు డిక్కల, డాక్టర్‌ ప్రవీణ్‌ రెడ్డి నిర్మిస్తున్న చిత్రం ‘హరుడు’. శ్రీహరి, హెబ్బా పటేల్‌, వెంకట్‌ లీడ్‌ రోల్స్‌ పోషిస్తున్నారు. రాజ్‌ తాళ్లూరి దర్శకత్వం వహిస్తున్నారు. షూటింగ్‌ పూర్తి చేసుకుని, ప్రస్తుతం పోస్ట్‌ ప్రొడక్షన్‌ పనులు శరవేగంగా జరుపుకుంటున్న ఈ చిత్రం నుంచి తాజాగా లీడ్‌ రోల్‌ చేస్తున్న శ్రీహరి ఫస్ట్‌ లుక్‌ పోస్టర్‌, గ్లింప్స్‌ను డైరెక్టర్‌ రామ్‌ గోపాల్‌ వర్మ విడుదల చేశారు. పోస్టర్‌, గ్లింప్స్‌ సినిమాపై ఆసక్తి రేకెత్తిస్తున్నాయని, ఈ సినిమా తప్పకుండా విజయం సాధిస్తుందంటూ చిత్ర బృందాన్ని ఆర్జీవీ అభినందించారు. ఈ సందర్భంగా శ్రీహరి మాట్లాడుతూ, ‘మా ఫస్ట్‌ పోస్టర్‌, టీజర్‌ ఆర్జీవీ చేతుల మీదుగా రిలీజ్‌ చేయడం చాలా సంతోషంగా ఉంది. ప్రొడ్యూసర్‌ లక్ష్మణరావు ఈ సినిమాని ప్యాషనేట్‌గా నిర్మించారు. అవుట్‌పుట్‌ బాగా వచ్చింది. అందరికీ సినిమా నచ్చుతుందనే నమ్మకం ఉంది’ అని తెలిపారు.
‘సినీ నిర్మాణరంగంలోకి శ్రీహరి ప్రోద్భలంతో అడుగుపెట్టాం. మా బ్యానర్‌ విజయవంతంగా సాగాలని ఆశిస్తున్నా. మా పోస్టర్‌ రిలీజ్‌ చేసినందుకు ఆర్జీవీకి కృతజ్ఞతలు’ అని నిర్మాత లక్ష్మణరావు చెప్పారు. సలోని, అలీ, సుమన్‌ తదితరులు నటిస్తున్న ఈచిత్రానికి సినిమాటోగ్రాఫర్‌ : ఆనంద్‌, ఎడిటర్‌ : మారుతి ఉప్పు, మ్యూజిక్‌ : మణి జీనా.
