ఈరోజుల్లో పిల్లలు ఆన్‌లైన్‌లో ఎక్కువ సమయం గడుపుతున్నారు. దీనివల్ల స్నేహితులు, కుటుంబ సభ్యులతో సన్నిహితంగా ఉండటం, ఆసక్తులను కొనసాగించడం, కమ్యూనిటీలలో భాగం కావడం వంటి అనేక సానుకూల అంశాలు ఉన్నాయి. అయితే పిల్లలకు ఇది సురక్షితమైన అనుభవం కాదు.
పిల్లలు ఎవరితో ఎలా కమ్యూనికేట్‌ చేస్తున్నారు, ఎలాంటివి పోస్ట్‌ చేస్తున్నారో, వాటిని ఎవరు చూస్తున్నారో అనే దాని గురించి వారితో నిజాయితీగా సంభాషించండి. ఆన్‌లైన్‌లోకి వెళ్లే చిత్రాలు, వీడియోలు, వ్యాఖ్యలు, వారు ఇతరులతో పంచుకునే విషయాలు, ఇతరులు పోస్ట్‌ చేసే వాటి గురించి వివరించండి. వివక్ష లేదా అనుచితమైన పరిచయం ఎప్పటికీ ఆమోదయోగ్యం కాదని వారికి అర్థమయ్యేలా చెప్పండి. పుకార్లు వ్యాప్తి చేయడం, బాధ కలిగించే లేదా ఇబ్బందికరమైన కథనాలు, ఫోటోలను షేర్‌ చేయకుండా చూడండి. ఒక అంశం ఎవరికీ హానిచేయనిదిగా అనిపించవచ్చు, కానీ అది ఇతరులను తీవ్రంగా బాధపెట్టే అవకాశం ఉంటుందని వివరించండి.
పిల్లలు ఆన్‌లైన్‌లో బాధపడటం, అసౌకర్యంగా, భయపడేలా ఏదైనా అనుభవిస్తే వెంటనే మీకు లేదా వారు నమ్మదగిన పెద్దలకు చెప్పమని వారిని ప్రోత్సహించండి. ఆన్‌లైన్‌లో ఎదుర్కొనే సమస్యాత్మక ప్రవర్తనలకు ఎలా స్పందించడం, తెలుసుకోవడం, అప్రమత్తంగా ఉండటంలో వారికి సహాయపడటం చాలా ముఖ్యం. ఆన్‌లైన్‌ పరికరాలను ఎలా, ఎప్పుడు, ఎక్కడ ఉపయోగించాలో నియమాలను రూపొందించడానికి మీ పిల్లలతో కలిసి పని చేయండి.
సాంకేతికతను ఉపయోగించండి : పిల్లల పరికరం ఎల్లప్పుడూ అప్‌డేట్‌ చేయబడి, తాజా సాఫ్ట్‌వేర్‌ను రన్‌ చేస్తుందో లేదో తనిఖీ చేయండి. వ్యక్తిగత సమాచారాన్ని గోప్యంగా ఉంచమని చెప్పండి. మీ గోప్యతా సెట్టింగ్‌లు సురక్షితంగా లేకుంటే, ఎవరైనా మీ సమాచారాన్ని చూసే అవకాశం ఉందని వివరించండి. ఉపయోగించనప్పుడు వెబ్‌క్యామ్‌లను కవర్‌ చేయండి. విద్యాసంబంధమైన వాటితో సహా ఉచిత ఆన్‌లైన్‌ వనరుల పట్ల జాగ్రత్తగా ఉండండి. మీ పిల్లల ఫొటో లేదా వారి పూర్తి పేరును అందించమని అడిగితే అది విశ్వసనీయ వెబ్‌సైట్‌ అని నిర్ధారించుకోండి.
వారితో సమయం గడపండి : స్నేహితులు, కుటుంబంతో సురక్షితమైన, సానుకూలమైన ఆన్‌లైన్‌ పరస్పర చర్యలను కలిగి ఉండటానికి మీ పిల్లలకు అవకాశాలను సృష్టించండి. వర్చువల్‌ అనేది పరస్పర చర్యలలో దయ, సానుభూతిని కలిగి ఉండటానికి, ఇతరులతో కనెక్ట్‌ అవ్వడం మీకు ఒక అద్భుతమైన అవకాశం. తప్పుడు సమాచారం, అనుచితమైన కంటెంట్‌, ఆందోళన, ఇతర హాని కలిగించే కంటెంట్‌ను గుర్తించి, నివారించడంలో పిల్లలకు సహాయపడండి. విశ్వసనీయ సమాచార వనరులకు వారిని పరిచయం చేయండి. పిల్లలు అనారోగ్యకరమైన ఆహారాలు, లింగ మూసలు, వయసుకు మించిన విషయాలను ప్రోత్సహించే ప్రకటనలకు గురికావచ్చు. కనుక ఆన్‌లైన్‌ ప్రకటనలను గుర్తించడంలో వారికి సహాయపడండి. మీరు చూసే కొన్ని ప్రతికూల సందేశాలలో తప్పు ఏమిటో వారితో కలిసి అన్వేషించండి. వయసుకి తగిన యాప్‌లు, గేమ్‌లు ఇతర ఆన్‌లైన్‌ వినోదాన్ని గుర్తించడానికి మీ పిల్లలతో సమయాన్ని వెచ్చించండి. హానికరమైన కంటెంట్‌, గోప్యతా ప్రమాదాలను కలిగించే యాప్‌ల పట్ల అప్రమత్తంగా ఉండండి.
ఆరోగ్యకరమైన ఆన్‌లైన్‌ అలవాట్లు
సానుకూల ఆన్‌లైన్‌ ప్రవర్తనను మీరే సాధన చేయడం ద్వారా పిల్లలను ప్రోత్సహించండి. మీ పిల్లల ఫోటోలు, వీడియోలతో సహా వారి గురించి మీరు ఆన్‌లైన్‌లో ఏం పంచుకుంటున్నారో గుర్తుంచుకోండి. సానుకూల సందేశాలు లేదా ఎమోజీలను పంపడం ద్వారా మీ పిల్లలను ఆన్‌లైన్‌లో స్నేహితులు, కుటుంబ సభ్యులకు మద్దతుగా ఉండేలా ప్రోత్సహించండి.
పిల్లలకు ఆన్‌లైన్‌ తరగతులు ఉంటే గోప్యతను కాపాడుకోవడానికి కెమెరాలో కనిపించే వాటిని గుర్తుంచుకోవడానికి వారిని ప్రోత్సహించండి. పిల్లలు ఆన్‌లైన్‌ కార్యకలాపాలతో కలత చెందుతున్నట్లు, రహస్యంగా ఉన్నట్లు కనిపిస్తే అప్రమత్తంగా ఉండండి. దుర్వినియోగం లేదా వేధింపులను అనుభవించడం వారి తప్పు కాదని, దానిని రహస్యంగా ఉంచకూడదని వారికి భరోసా ఇవ్వండి. వారి పాఠశాల డిజిటల్‌ లెర్నింగ్‌ విధానాలతో మిమ్మల్ని మీరు పరిచయం చేసుకోండి. పిల్లలను ఆన్‌లైన్‌లో సురక్షితంగా ఉంచడంలో తాజా సమాచారం కోసం స్థానిక హెల్ప్‌లైన్‌లలో వనరులు వెతకండి.
తమను తాము వ్యక్తపరచనివ్వండి: ఆన్‌లైన్‌లో సమయాన్ని వెచ్చించడం అనేది మీ పిల్లలు సృజనాత్మకంగా ఉండటానికి, నేర్చుకోవడానికి, వారి అభిప్రాయాలను పంచుకోవడానికి, వారికి అవసరమైన మద్దతు ఇవ్వడానికి, వారి స్వరాలను ఉపయోగించడానికి గొప్ప అవకాశం. పిల్లల కోసం ఆన్‌లైన్‌ వ్యాయామ వీడియోలు, శారీరక కదలికలు, అవసరమయ్యే వీడియో గేమ్‌ల కోసం ఇంటర్నెట్‌లో వనరులను ఉపయోగించమని మీ పిల్లలను ప్రోత్సహించండి.
పోస్ట్‌ చేసే ముందు ఆలోచించండి: మీరు ఆన్‌లైన్‌లో ఏదైనా పోస్ట్‌ చేసే ముందు ఒకటికి రెండుసార్లు ఆలోచించండి. సందేశాన్ని, ఫొటోను లేదా వీడియోను ఒకసారి షేర్‌ చేసిన తర్వాత ఏం జరిగినా నియంత్రించడం కష్టం. దానిని తొలగించడం దాదాపు అసాధ్యం. అయితే మీకు గోప్యత హక్కు ఉందని గుర్తుంచుకోండి. అలాగే ఇతరులకు కూడా ఉంటుంది. ఇతరుల ఖాతాలకు లాగిన్‌ చేయడం, వారి అనుమతి లేకుండా వారి ఫోన్‌లను ఉపయోగించడం లేదా వారి సమాచారాన్ని లేదా ఫోటోలను పంచుకోవడం సరైంది కాదు.
షేర్‌ చేసే ముందు ఆలోచించండి: మీ లొకేషన్‌లతో సహా మీ సమాచారాన్ని ఎవరు చూస్తారనే విషయాన్ని నియంత్రించడంలో సహాయపడటానికి మీ సోషల్‌ మీడియా ప్లాట్‌ఫారమ్‌లలో గోప్యతా సెట్టింగ్‌లను మార్చవచ్చు. మీరు ఎవరితో ఏమి పంచుకుంటారో జాగ్రత్తగా ఆలోచించండి. మీ చిరునామా, ఫోన్‌ నంబర్‌ లేదా బ్యాంక్‌ వివరాల వంటి వ్యక్తిగత సమాచారాన్ని షేర్‌ చేయవద్దు. మీ పాస్‌వర్డ్‌లను ఎవరితోనూ పంచుకోకండి, సన్నిహిత మిత్రులతో కూడా.
అంగీకరించే ముందు ఆలోచించండి: స్నేహితుని అభ్యర్థనను అంగీకరించే ముందు మీరు వారి ప్రొఫైల్‌ను పరిశీలించాలి. వారు ఎవరో చూడటానికి ప్రయత్నించండి. మీకు ఉమ్మడిగా స్నేహితులు ఉన్నారా? మీరు అదే ఊరివారా? పరిశీలించండి. యాదృచ్ఛిక స్నేహితుని అభ్యర్థనలను అంగీకరించమని ఒత్తిడి చేయవద్దు. కొన్నిసార్లు వ్యక్తులు తాము కాదన్నట్లుగా నటిస్తారు. అలాంటప్పుడు వారు నిజం చెబుతున్నారో లేదో తెలుసుకోవడం కష్టం.
– డా|| హిప్నో పద్మా కమలాకర్‌, 9390044031
కౌన్సెలింగ్‌, సైకో థెరపిస్ట్‌, హిప్నో థెరపిస్ట్‌
