నా గురించి మాట్లాడుకునే యాళ్లయింది. నేనెవరనుకుంటున్నారా? ఇయ్యాల్టి నుంచి బళ్లు షురూ అయితున్నయి కదా! అదే నేను సర్కారు బడిని. ఏనుకట అందరూ నా దగ్గరకి వచ్చి బాగా సదువుకుందురు. నాకాడ సదువుకున్నోళ్లందరూ మంచిగా ఎదిగిర్రు. వాళ్లను సూసినప్పుడు నాకు మస్తూ కుషిగా అనిపిస్తది. గానీ గిప్పుడు ప్రయివేటు స్కూల్‌ అని, టెక్నో స్కూల్‌ అని, ఇంటర్నేషనల్‌ స్కూల్‌ల వెనుక తిరుగుతూ నన్ను సరిగా పట్టించుకుంటలేరు. ఏం చేయాలో నాకైతే అర్థమయిత లేదు.
ఇగ నాకు పోటీగా సర్కారోళ్లు గురుకులాలను, మోడల్‌ స్కూళ్లను, కేజీబీవీలను పెట్టిర్రు.నాకైతే పిల్లలు అందరూ నాదగ్గరే సదువుకుంటే మస్తుగా అనిపిస్తది.మా బడికి వచ్చే సార్లను,మేడంలను ఏమైంది? మన బడికి ఎక్కువ మంది పిల్లలు అత్తలేరు అంటే మన దగ్గరే అన్ని సౌల తులు ఉన్నయి కానీ ఈ జనాలకు అర్థం అయితలే. అందరూ ప్రయివేటు బడులెంట ఉరుకుతున్నరు, గట్ల ఉరికి ఉరికి ఆగమై, పైసలు పొగొట్టుకుంట్రు అంటున్నరు.
మా బడికి మీ పిల్లల్ని ఎందుకు పంపుతలేరని పొరగాండ్ల అయ్యా, అవ్వలను అడిగితే ప్రయివేటు బల్లె పట్టించుకున్నట్టు మీ సర్కారు బల్లే పిల్లల్ని పట్టించుకోరు, మీ బడికి పొరగండ్లను పంపితే ఆగం అయితరు, అయినా సర్కార్‌ బల్లే ఇంగ్లీష్‌ మీడియం లేక పంప బుద్ది అయితలే అనబట్టిరి. అరే గిదేం కిరికిరి? మా బల్లె పట్టించుకున్నట్టు ఎక్కడన్నా పట్టించుకుంటరా మా సార్లు, మేడంలు బాగా చదువుకున్నోళ్లు మంచిగా పాఠాలు చెప్తరు. మా బల్లె ఆటలు పాటలు అన్ని ఉంటయి, ఇగ ఇంగ్లీష్‌ మీడియం ఎలాగు ఉండనే ఉండే.పొరగాండ్లందరికి ఫ్రీగా బుక్స్‌ ఇత్తం, యూనిఫామ్స్‌ కూడా ఇయ్యవడితిమి, పగటిలీ మంచిగా బువ్వ పెడతాం. ఇంకేం కావాలి. అందరినీ మా బడికి పంపుమని చెప్పనయితే చెప్పిన. చూడాలి మరి ఈసారన్నా పంపిస్తారో లేక ప్రయివేటుకే పంపుతరో?
మా పెద్ద సార్‌తో ఈసారి ఎట్లనన్న చేసి మన బడికి ఫుల్‌గా పిల్లలు ఆచ్చేటట్లు చేయాలె సర్‌ అంటే, ‘ఏం జేసుడో ఏమో, బల్లె ఊడ్చేటోళ్లు, గంట కొట్టేటోళ్లు లేరు. అన్ని సబ్జెక్టులకు సార్లు లేరు. ఎల్లదీసుడే ఉన్నది. ఇదివరకటి గవర్నమెంట్‌ కరెంట్‌ బిల్లు కట్టడానికి, చాక్పీస్‌, డస్టర్లకు కూడా సరిగా పైసలు ఇయ్యకపాయే. జేబులకెళ్లి పెట్టుకుంటి. ఎట్ల జేశుడో ఏమో’ అనబట్టే.ఇప్పుడున్న సర్కారోల్లు జర మా పెద్ద సారుకు టెన్షన్‌ లేకుండా బడి మంచిగా నడిపేటట్లు చెయిర్రి.
ఏ మాటకామాట చెప్పుకోవాలి. ఎనుకటికంటే ఇప్పుడు సర్కారు బల్లల్లో సౌలతులు మంచిగా అయినయి. లైబ్రరీ,సైన్స్‌ ల్యాబ్‌, కంప్యూటర్‌ ల్యాబ్‌,ఆటల్‌ తింకరింగ్‌ ల్యాబ్‌లు అన్ని పెట్టిర్రు.జనాలు కూడా జర సోచయించాలే. గివన్ని ప్రయివేటులో ఉంటాయా? జర మీరే చెప్పుండ్రి.పుక్కిడి వస్తే జనాలకు నచ్చడం లేదోమో మరి. మంచిగా మా బడికి పంపక ఇదెందో ఏమో.
పంతుళ్లతో మాట్లాడితే ‘ఈ నౌకరీ జేయబట్టి ఇరువై ఏండ్లు అయితుంది ఓ ప్రమోషన్‌ లేదు ఏం లేదు అయినా ఇదే బల్లె పదేండ్లుగా పనిచేస్తున్న ట్రాన్స్ఫర్‌ కూడా లేదు ఏం నౌకరో ఏమో అనబట్టిరి.’ ఇప్పటికన్నా ఇంకా మంచిగా మావోల్లు పనిచేస్తరు, మంచి రిజల్ట్స్‌ తెస్తరు అందులో డౌటనుమానం లేదు.ఈ సారి కూడా మన బడిలో టెన్త్‌ క్లాస్‌ ఓల్లు అందరూ పాస్‌ అయిండ్రు.10 జిపిఎ లు కూడా వచ్చినయి. బాసర ట్రిబుల్‌ ఐటీలో సీట్లు వస్తయని పోరగాండ్లు ఫుల్‌ ఖుషీగా ఉన్నరు.
అంతట్లకే మా ఎంఈఓ సర్‌ వచ్చే. ‘ఈ బడి బాటేందో నా సావుకొచ్చింది. ఒక్కొన్ని ఎనిమిది మండలాలు తిరుగాలే. ఏం తిరుగుడో ఏమో, ఎప్పుడు ఎక్కడ ఉంటానో, ఏం చేస్తానో నాకేే సమజైత లేదు. ఏ బడిలో ఏముందో? ఏం లేదో కూడా నాకు తెలుస్తలేదు.అటు నా బడి సూస్కోవాలి, ఇటు ఎనిమిది మండలాలకు నేనే ఇన్‌ఛార్జినట. ఎట్ల జెసుడో ఏమో, ఈ టెన్షన్‌ కె నాకు బిపి, షుగర్‌ వచ్చినయి. అయినా కూడా గోళీలు మింగుకుంటూ తిరుగుతున్న’ అనబట్టే.
ఇవన్నీ విన్నంక నాకు అర్థమైంది మా స్కూల్‌కి పిల్లలెందుకు అత్త లేరో. ఇదివరకటి సర్కారు పట్టించుకోలే, ఇప్పుడున్న సర్కారైన పట్టించుకోని బల్లు మంచిగా నడుపడానికి పైసలు, ఊడ్చేటోల్లను, గంటకొట్టెటోల్లను ఇచ్చి,స రిపోయేంత టీచర్లు ఉండేటట్లు చేయాలే.మా సార్లకు, మేడంలకు జర పదోన్నతులు ఇచ్చుడు, బదిలీలు చేసుడు సురువుజెయ్యాలే. పాపం గా ఏంఈఓ సార్లు ఎన్నని తిరుగుతరు? ఎక్కడోల్లకు అక్కడ ఇయ్యలే స్కూల్‌లను, సార్లను సూసుకోవడం.అందరం మనిషికో చేయ్యెస్తే ఏదైనా చేయచ్చు. అందరం గట్టిగా అనుకుంటే గవర్నమెంట్‌ స్కూల్‌లు మంచిగా నడుస్తయి. సర్కారీ బడి మంచిగా నడిస్తేనే బీద బిక్కి అందరూ బాగా సదువుకుంటరు.
నేను అందరికీ చేతులెత్తి మొక్కుతున్న. మీరందరూ పిల్లలను సర్కారు బడికి పంపుర్రి.సర్కారొల్లు ఫ్రీ బస్‌ పెడితే ఉరికి ఉరికి ఎక్కుతుండ్రు కదా! మరి ప్రీ స్కూల్‌ అంటే ఎందుకు ఏనుక ముందు ఆడుతుండ్రు.ఇదివరకు మూతబడ్డ బల్లను కూడా సర్కారోళ్ళు ఇప్పుడు మళ్ళీ నడుపుతరట.అన్నింటికీ దగ్గరగా ఉండే మన బల్లెనే మన పిల్లలను చేర్పిద్దాం. మన బడిని బతికించుకుందాం. వింటున్నరా? అన్ని ముచ్చట్లు అయితే ఇగ చెప్పిన. ఇక మీ ఇష్టం. ఉంట మల్ల.
– పాకాల శంకర్‌ గౌడ్‌,
9848377734.
