2004లో వచ్చిన అవార్డ్‌ విన్నింగ్‌ మూవీ ‘గ్రహణం’తో సినిమాటోగ్రాఫర్‌గా సినీ పరిశ్రమలోకి అడుగుపెట్టిన పి.జి.విందా తన అసాధారణ ప్రతిభతో అనతికాలంలోనే తనకంటూ ఓ ప్రత్యేకతను సొంతం చేసుకున్నారు. ‘ది లోటస్‌ పాండ్‌’ చిత్రంతో దర్శకుడిగానూ తనదైన ముద్ర వేశారు. రెండు దశాబ్దాలుగా సినీ రంగానికి సేవ చేస్తున్న పి.జి. విందా, ఎప్పటికప్పుడు నూతన సాంకేతికలను పరిచయం చేయడంలోనూ ముందుంటున్నారు. ఈ క్రమంలోనే సినిమా నైపుణ్యం, సాంకేతిక ఆవిష్కరణల గొప్ప వేడుక ‘సినిమాటికా ఎక్స్‌పో’కు శ్రీకారం చుట్టారు. ఇటీవల హైదరాబాద్‌లోని నోవాటెల్‌లో వైభవంగా ‘సినిమాటికా ఎక్స్‌పో’ సెకండ్‌ ఎడిషన్‌ను వైభవంగా నిర్వహించారు. హైదరాబాద్‌ను సినిమా, డిజిటల్‌ క్రియేటివిటీ కేంద్రంగా మలచడమే లక్ష్యంగా ‘సినిమాటికా ఎక్స్‌పో’ అడుగులు పడుతున్నాయి.
ఈ నేపథ్యంలో పి.జి. విందా మీడియాతో మాట్లాడుతూ, ”గ్రహణం’ సినిమా సమయంలో డిజిటల్‌ అంతగా లేదు. రాబోయే ఐదు, పదేళ్లలో డిజిటల్‌దే హవా ఉంటుందని అప్పుడే చెప్పాను. నా అంచనానే నిజమైంది. తెలుగు సినిమా పరిశ్రమ ఎంతో అభివద్ధి చెందుతోంది. ఇక్కడ ఎందరో గొప్ప దర్శకులు, ప్రతిభగల సాంకేతిక నిపుణులు ఉన్నారు. అయితే కొన్ని కారణాల వల్ల సాంకేతికంగా వెనకబడిపోయాం. ముఖ్యంగా కొత్త కెమెరాలు, క్రేన్‌లు, ఇతర ఎక్విప్‌మెంట్‌లు మనకు ఆలస్యంగా పరిచయమవుతున్నాయి. అందుకే ఈ ఎక్స్‌పో నిర్వహించాలని తలపెట్టాం. దీని వల్ల ప్రపంచవ్యాప్తంగా త్వరలో మార్కెట్‌లోకి రాబోతున్న ఎక్విప్‌మెంట్‌ గురించి ముందే తెలుస్తుంది. దాంతో సాంకేతికంగా ఇంకా మెరుగైన సినిమాలను అందించగలం. తెలంగాణ ప్రభుత్వ మద్దతుతో మేము నిర్వహించిన సినిమాటికా ఎక్స్‌పో మొదటి ఎడిషన్‌కి గొప్ప స్పందన లభించింది. ఆ ఉత్సాహంతోనే రెండో ఎడిషన్‌ని నిర్వహించాం. దీనికి విశేష స్పందన లభించి, ఏకంగా 38 వేల మంది హాజరు కావడం అనేది ఆసియాలోనే రికార్డు. ఫిల్మ్‌ ఈ ఎక్స్‌పో ద్వారా సాంకేతికతను పరిచయం చేయడం మాత్రమే కాకుండా, యువ ప్రతిభను ప్రోత్సహిస్తూ వారికి తగు సూచనలు చేస్తూ, సెమినార్లు నిర్వహించాం. సుదీప్‌ ఛటర్జీ, సత్యాంశు సింగ్‌, ఇంద్రగంటి మోహన కష్ణ వంటి సినీ ప్రముఖులు స్టోరీ రైటింగ్‌, సినిమాటోగ్రఫీ గురించి ఎంతో నాలెడ్జ్‌ని పంచారు. ఈ స్పందన చూసిన తర్వాత సినిమాటికా ఎక్స్‌పో మూడో ఎడిషన్‌ ను మరింత ఘనంగా నిర్వహించాలని భావిస్తున్నాము. పలు అంతర్జాతీయ సంస్థలు సైతం రావడానికి అంగీకారం తెలిపాయి. అలాగే ప్రభుత్వ భాష, సాంస్కతిక శాఖ మద్దతుతో ఈ సినిమాటికా ఎక్స్‌పోని మరో స్థాయికి తీసుకెళ్ళాలి అనుకుంటున్నాం’ అని తెలిపారు.
