దంపతుల మధ్య అప్పుడప్పుడు గొడవలు, భేదాభిప్రాయాలు సహజమే. అయితే ఇలాంటి గొడవలు తరచూ జరుగుతున్నా, మీ భాగస్వామి మిమ్మల్ని కావాలనే టార్గెట్‌ చేసి శారీరకంగా, మానసికంగా వేధిస్తున్నా… ఆ బంధం ప్రమాదకరంగా మారుతోందంటున్నారు నిపుణులు. మీ భాగస్వామిలో కనిపించే కొన్ని లక్షణాలు, వారి ప్రవర్తన తీరు ఆధారంగా ఈ ప్రమాదాన్ని ముందే పసిగట్టవచ్చని సూచిస్తున్నారు. ఆ లక్షణాలు ఏంటో తెలుసుకుందాం.
– మీ భాగస్వామి కొన్ని సందర్భాల్లో మీకు తెలియకుండానే తప్పుదోవ పట్టిస్తుంటారు. అలాగే మనపై మనమే నమ్మకం కోల్పోయేలా చేస్తారు. మనల్ని బలహీనులుగా మార్చుతారు. చెప్పాలంటే అన్ని రకాలుగా మనల్ని తమ అధీనంలోకి తెచ్చుకునే దాకా వాళ్లు నిద్రపోరు. దీన్నే ‘గ్యాస్‌లైటింగ్‌’గా పేర్కొంటున్నారు మానసిక నిపుణులు.
– ప్రతి చిన్న విషయానికి అబద్ధాలు ఆడడం వేధించే భాగస్వామిలో ఎక్కువగా కనిపిస్తుందని నిపుణలు చెబుతున్నారు. ఒక తప్పును కప్పిపుచ్చుకోవడానికి మరో తప్పు చేస్తుంటారని, అలాంటి వారి పట్ల జాగ్రత్త వహించాలంటున్నారు.
– చిన్న చిన్న విషయానికే చిరాకు పడడం, అరవడం, కోప్పడడం.. లాంటివి వీరి ప్రవర్తనలో ఎక్కువగా గమనించచ్చు. ఇలాంటి వారు శారీరకంగా, మానసికంగానే కాకుండా.. భాగస్వామి భావోద్వేగాల పైనా దెబ్బకొడుతుంటారు. అందుకే భాగస్వామి మాటలు, చేతల్ని బట్టి వారి హింసాత్మక ధోరణిని పసిగట్టచ్చంటున్నారు నిపుణులు.
– మీపై అసూయ, ద్వేషాల్ని పెంచుకుంటారు. ఇలాంటి వాళ్లకు మీరు చేసే పనులతో పాటుగా మీరు మాట్లాడే మాటలు రుచించవు. మీది తప్పన్నట్లుగా, వారు చెప్పేదే కరక్ట్‌ అన్నట్లుగా ప్రవర్తిస్తుంటారు. వాళ్ల ప్రవర్తనతో మీ ఆత్మవిశ్వాసం దెబ్బతింటుందని నిపుణులు అంటున్నారు.
– అనుబంధంలో మొదట మీతో బాగానే వ్యవహరిస్తారు. మీపై చెప్పలేనంత ప్రేమ కురిపిస్తారు. తర్వాత మీపై ప్రేమ తగ్గిపోవడం, మిమ్మల్ని నిర్లక్ష్యం చేయడం, మీ ఫోన్‌ కాల్స్‌, మెసేజ్‌లకు స్పందించకపోవడం లాంటివి ప్రమాద సూచికలే అని అర్థం చేసుకోవాలి.
– ఆరోగ్యకరమైన బంధంలో అర్థం చేసుకోవడం, సర్దుకుపోవడాలు ఉంటాయి. కానీ మిమ్మల్ని వేధించాలని చూసే భాగస్వామి ఏ విషయంలోనూ రాజీ పడరు. అలాంటి వారు మీతో ఏకీభవించరని, వాళ్ల మాటే చెల్లుబాటయ్యేలా వ్యవహరిస్తారని అర్థం చేసుకోవాలని నిపుణులు సూచిస్తున్నారు.
– అందుకే ఒక వ్యక్తితో బంధాన్ని ఏర్పరచుకునే ముందు… వారికి ఫ్రెండ్స్‌ సర్కిల్‌ ఉందో, లేదో చూసుకోవడం కూడా కీలకమని నిపుణులు సూచిస్తున్నారు. ఎందుకంటే తనకు స్నేహితులు లేరంటే తన వ్యక్తిత్వం అంత మంచిది కాకపోవడానికి ఓ సంకేతమని అనుమానించడంలోనూ తప్పు లేదంటున్నారు నిపుణులు. ముందు ఈ విషయాన్ని నిర్లక్ష్యం చేసి కమిట్‌ అయినప్పటికీ ఆ తర్వాత జాగ్రత్తపడాలని నిపుణులు సూచిస్తున్నారు.
– ‘అనుమానం పెనుభూతం’ అంటారు పెద్దలు. వేధించే భాగస్వామిలోనే ఇలా అనుమానం ఎక్కువగా కనిపిస్తుందట. అందుకే ప్రతి విషయంలో మిమ్మల్ని అనుమానించడం, మీ ఫోన్‌ సంభాషణలు దొంగ చాటుగా వినడం.. వంటివి ఆమోదయోగ్యం కాని అంశాలని నిపుణులు సూచిస్తున్నారు. అలాంటి వారి పట్ల జాగ్రత్తగా ఉండాలని నిపుణులు హెచ్చరిస్తున్నారు. అందుకే ఇలాంటి లక్షణాలు మీ భాగస్వామిలో కనిపిస్తే.. రాబోయే ప్రమాదాన్ని ముందే పసిగట్టి సరైన నిర్ణయం తీసుకోవడం మంచిది.
