నడక ఆరోగ్యానికి ఎంతో మంచిది. దీన్ని సులభమైన వ్యాయామాల్లో ఒకటిగా పేర్కొంటారు వైద్య నిపుణులు. రోజూ వాకింగ్‌ చేస్తే ఎన్నో రోగాలు నయమవుతాయని, శరీరంలో చెడు కొలెస్ట్రాల్‌ తగ్గుతుందని అనేక అధ్యయనాల్లో తేలింది. అయితే, వేగంగా నడవడం ద్వారా మరిన్ని ప్రయోజనాలున్నాయని వారు చెబుతున్నారు. దీని ద్వారా శరీరంలో అధికంగా కేలరీలు ఖర్చవుతాయి. తద్వారా సులభంగా బరువు తగ్గవచ్చు. దీర్ఘకాలంలో అనారోగ్య సమస్యలను నివారించడానికి వేగవంతమైన నడక ఉత్తమ మార్గమని చెప్పవచ్చు.
కండరాలు, కీళ్ళకు బలం
వేగవంతమైన నడకను మీ దినచర్యలో భాగం చేసుకోవడం ద్వారా మీ శరీరం మరింత దఢంగా తయారవుతుంది. వేగంగా కండరాలను కదిలించడం ద్వారా మీ కండరాలకు బలం చేకూరుతుంది. ముఖ్యంగా వెన్నునొప్పి సమస్యతో బాధపడుతున్న వారికి వేగంగా నడవడం కొంత ఉపశమనాన్ని అందిస్తుంది. ఇది రక్త ప్రసరణను పెంచడంలో కూడా సహాయపడుతుంది.
చిట్కా: బ్రిస్క్‌ వాక్‌ కి ముందు క్వాలిటీ గల ఫుట్‌వేర్‌ను ధరించండి. ఒకవేళ మీరు గట్టి నేలపై నడిస్తే కీళ్ల నొప్పులు రాకుండా ఈ ఫుట్‌వేర్‌ మిమ్మల్ని రక్షిస్తుంది.
మెరుగైన జీవక్రియ
వేగంగా నడవడానికి ఎక్కువ శక్తి అవసరం. వేగంగా నడవడం ద్వారా మీ శరీర జీవక్రియ మెరుగుపడుతుంది. దీనివల్ల మీ ఆహారం తొందరగా జీర్ణం అవుతుంది. శరీరంలో కొవ్వు శాతాన్ని తగ్గించి పొట్ట వద్ద కొవ్వును తగ్గిస్తుంది.
చిట్కా: మీరు నడుస్తున్నప్పుడు క్రమంగా వేగం పెంచండి.
హార్మోన్ల నియంత్రణ
విరామం లేకుండా పని చేయడం, శారీరక శ్రమ లేకపోవడం హార్మోన్ల ఆరోగ్యంపై గణనీయమైన ప్రభావాన్ని చూపిస్తాయి. కార్టిసాల్‌ వంటి ఒత్తిడి కలుగజేసే హార్మోన్లను తగ్గించడమే కాకుండా, ఎండార్ఫిన్లు, హార్మోన్లను కూడా ఉత్పత్తి చేస్తుంది. ఎండోర్ఫిన్లు కూడా శరీరంలో సానుకూల అనుభూతిని కలిగిస్తాయి. పిసిఓడి వంటి హార్మోన్ల అసమతౌల్యత కారణంగా ఉత్పన్నమయ్యే ఆరోగ్య సమస్యలను తగ్గించడానికి ఈ వేగవంతమైన నడక సహాయపడుతుంది.
చిట్కా: దీర్ఘకాలిక ప్రయోజనాల కోసం హెచ్‌ఐఐటీ ప్రయత్నించండి.
అధిక బరువుకు చెక్‌
వేగవంతమైన నడక ద్వారా మీరు క్యాలరీల రూపంలో ఎక్కువ శక్తిని బర్న్‌ చేస్తారు. నడుము చుట్టూ ఉన్న కొవ్వును కరిగించడానికి, గుండె వేగంగా కొట్టుకోవడానికి బ్రిస్క్‌ వాక్‌ ఎంతగానో ఉపయోగపడుతుంది. నడక సమయంలో గట్టిగా ఊపిరి పీల్చుకోవడం ద్వారా మీ కొవ్వు కరుగుతుంది. ఇది మీ కేలరీలను వేగంగా కోల్పోవటానికి సహాయపడుతుంది.
చిట్కా: ఆరోగ్యకరమైన ఆహారం మీ శరీరానికి సరైన పోషక వనరులు అందిస్తుంది. అందువల్ల, సరైన శరీర బరువు కోసం మంచి క్యాలరీలు కలిగిన ఆహారాన్ని తీసుకోండి.
