ర్యాంకింగ్స్‌పై భారత ఆర్చర్ల గురి

ర్యాంకింగ్స్‌పై భారత ఆర్చర్ల గురి– 2024 పారిస్‌ ఒలింపిక్స్‌అర్హతపై దీమా
న్యూఢిల్లీ : ఆర్చరీ ప్రపంచకప్‌ స్టేజ్‌ 3 పోటీలలో భారత రికర్వ్‌ ఆర్చర్లు పతకాలు సాధించడంలో విఫలమైనా పారిస్‌ ఒలింపిక్‌ బెర్తులను దాదాపుగా ఖాయం చేసుకున్నారు. మహిళల విభాగంలో దీపికా కుమారి, భజన్‌, అంకితాతో కూడిన త్రయం.. సెమీస్‌లో 4-5తో ఫ్రాన్స్‌ చేతిలో ఓటమిపాలైంది. కాంస్య పోరులో జపాన్‌.. 6-0తో భారత్‌కు పరాభవం తప్పలేదు. ఇక ధీరజ్‌, తరుణ్‌దీప్‌, ప్రవీణ్‌తో కూడిన పురుషుల జట్టు సైతం క్వార్టర్స్‌లో 1-5తో నెదర్లాండ్స్‌ చేతిలో ఓడింది. కాగా రికర్వ్‌ ఆర్చర్ల నిరాశపరిచినా ఈనెల 25న విడుదల కాబోయే ర్యాంకింగ్స్‌ను బట్టి పారిస్‌ బెర్తులు నిర్ధారణ అవుతాయి. కొత్త నిబంధనల ప్రకారం.. ఒలింపిక్‌ బెర్తులు ఖాయం కాని జట్లలో టాప్‌-2 టీమ్స్‌కు కోటా దక్కుతుంది. పురుషుల ర్యాంకింగ్స్‌లో భారత్‌ రెండో స్థానంలో ఉండగా మహిళల విభాగంలో 8వ స్థానంలో ఉంది. మహిళల కేటగిరీలో టాప్‌-7లో ఉన్న సౌత్‌ కొరియా, చైనా, జర్మనీ, ఫ్రాన్స్‌, మెక్సికో, యూఎస్‌ఏ, చైనీస్‌ తైఫీ ‘పారిస్‌’కు అర్హత సాధించగా మిగిలిన రెండు కోటాలలో భారత్‌కు అవకాశం దక్కనుంది.