‘డీజే టిల్లు’ చిత్రానికి కొన సాగింపుగా సిద్ధు జొన్నలగడ్డ ‘టిల్లు స్క్వేర్‌’ చేస్తున్నారు. బుధవారం సిద్ధు జొన్నలగడ్డ పుట్టినరోజు సందర్భంగా చిత్ర బృందం ఈ సినిమా నుండి స్పెషల్‌ బర్త్‌డే గ్లింప్స్‌ను రిలీజ్‌ చేసింది. రాత్రి సమయంలో కారు నడుపుతూ తన పక్కనే ఉన్న లిల్లీ (అనుపమ పరమేశ్వరన్‌) నుండి టిల్లు ముద్దును పొందడం మనం గ్లింప్స్‌లో చూడవచ్చు. ఈ గ్లింప్స్‌లో అనుపమ పరమేశ్వరన్‌ గతంలో కంటే చాలా అందంగా, మరింత గ్లామరస్‌గా కనిపిస్తుంది. మొత్తానికి ఈ గ్లింప్స్‌ మునుపటి చిత్రం ‘డీజే టిల్లు’లో జరిగిన విషయాలను గుర్తు చేయడమే కాకుండా, ‘టిల్లు స్క్వేర్‌’ ఎలా ఉండబోతుందనే ఆసక్తిని కూడా కలిగిస్తోంది. ఈ సినిమా ట్రైలర్‌ ప్రేమికుల దినోత్సవం కానుకగా ఈనెల 14న విడుదల కానుంది. తమన్‌ ఈ చిత్రానికి నేపథ్య సంగీతం సమకూరుస్తున్నారు. మల్లిక్‌ రామ్‌ దర్శకత్వం వహిస్తున్న ఈ చిత్రాన్ని సితార ఎంటర్‌టైన్‌మెంట్స్‌ పతాకంపై సూర్యదేవర నాగవంశీ నిర్మిస్తున్నారు. శ్రీకర స్టూడియోస్‌ ఈ చిత్రాన్ని సమర్పిస్తోంది. మార్చి 29న ఈ సినిమా భారీస్థాయిలో విడుదల కానుంది.
