దేశంలో రోజురోజుకీ నిత్యావసర సరుకుల ధరలు హద్దూ అదుపు లేకుండా పెరుగు తున్నాయి. బియ్యానికి రెక్కలొచ్చాయి. పప్పులు కొండెక్కాయి. కూరగాయలు, నూనెల ధరలు ఆకాశాన్నంటుతున్నాయి. ఉపాధి చట్టానికి కేటాయింపులు కుదించడంతో కూలీల బతుకులు ఆగమౌతున్నాయి. మహిళల జీవితాలు చిధ్రమౌతున్నాయి. కుల, మత ఘర్షణలు తాండవిస్తున్నాయి. ప్రజలు గగ్గోలు పెడుతున్నారు. ఉద్యోగాల్లేక నిరుద్యోగులు ఎదురు చూస్తున్నారు. దేశంలో కోట్లాది మంది ప్రజలు పేదరికంలో మగ్గుతున్నారు. పాలకులు వీరిపై పన్నుల భారం పెంచి మరింత దారిద్య్రంలోకి నెడుతున్నారు. నిత్యావసరాల ధరలు 2014లో ఉన్న ధరలను పరిశీలిస్తే నేడు 50శాతం నుండి 200శాతం వరకు సరుకులు పెరిగాయి. కూరగాయల ధరలు ఈ నెలలోనే 37శాతం వరకు పెరిగాయి. పప్పులు 45శాతం పెరిగాయి. బియ్యం ధర కేజి రూ.60లకు చేరింది. నిన్నటివరకు గ్యాస్‌ ధరలు రూ.1200 ఉంది. అయితే వచ్చే ఐదు రాష్ట్రాల ఎన్నికలు, లోక్‌సభ ఎన్నికలను దృష్టిలో పెట్టుకుని మోడీ నిన్న సిలిండర్‌పై రూ.200 తగ్గిస్తున్నట్టు ప్రకటించారు. వాస్తవానికి మోడీ అధికారంలోకి రాకముందు రూ.500 ఉన్న సిలిండర్‌ ఏకంగా రూ.1200కు పెరిగిన విషయం గమనంలో ఉంచుకోవాలి. పాల ధరలు కూడా అందనంత దూరంగా ఎగబాకుతున్నాయి. ఇదే అదునుగా వ్యాపారస్తులు కృత్రిమ కొరతను సృష్టించి ధరలు మరింత పెంచేశారు. ధరలు అదుపు చేయాల్సిన ప్రభుత్వం వారికి కొమ్ము కాస్తున్నది. దీనికి గోరుచుట్టుపై రోకటిపోటులా మోడీ ప్రభుత్వం అమలు చేస్తున్న జీఎస్టీ భారం తోడైంది. నిత్యావసర సరుకులపై 12-18శాతం పన్నులు వేయడంతో ధరల పెరుగుదల అనివార్యమైంది. పేద, మధ్య తరగతి ప్రజలు విద్య, వైద్యం కోసం వేలకోట్ల రూపాయలు ఖర్చు చేయాల్సి వస్తోంది. అప్పులు చేస్తూ వడ్డీ కోరల్లో చిక్కుకుంటున్న దైన్యస్థితి నెలకొంది. కొంత మంది అప్పులు తీర్చలేక ఆత్మహత్యలకు పాల్పడుతున్నా ప్రభుత్వం పట్టించుకున్న దాఖలాలు లేవు.
సామాన్యులకు భారాలు…సంపన్నులకు రాయితీలు
అదే సందర్భంలో ప్రజల కొనుగోలుశక్తి దెబ్బతినే విధంగా ఉపాధి, ఆదాయం తగ్గింది. కరోనా తరువాత నేటికీ తిరిగి ఉపాధి అవకాశాలు మెరుగుపడలేదు. పట్టణాలలో వ్యాపారాలు, హోటళ్ళలో పనిచేసేవారు నిరుద్యోగులుగా మారారు. గ్రామీణ ప్రాంతంలో నేడు కొద్దో గొప్పో ఉపాధి దొరకుతుందంటే అది వామపక్షాల కృషితో వచ్చిన ఉపాధి హామీ చట్టం వల్లనే. దీన్ని కూడా ఎత్తివేయాలని కుట్రలు పన్నుతోంది నేటి బీజేపీ ప్రభుత్వం. కనీస జీవనాధారంగా ఉన్న ఈ చట్టానికి కేటాయింపులు తగ్గించారు. 2021-22లో రూ.98,468 కోట్లు, 2022-23లో రూ.89,400 కోట్లు, 2023- 24లో రూ.60వేల కోట్లకు తగ్గించారు. గ్రామీణ ప్రాంతాలలో ఉన్న ఒక్క ఆధారం తగ్గడంతో 40శాతం ప్రజలు పౌష్టికాహారలోపంతో ఇబ్బందులు పడుతున్నారు. 57శాతం మహిళలు, 67శాతం పిల్లలు రక్తహీ నతతో బాధపడు తున్నారని మానవవనరుల అభి వృద్ధి సూచిక పేర్కొన్నది. పేదరికంలో ప్రపం చంలోని 121 దేశాలలో మన దేశం 107వ ర్యాంకులో ఉంది. 2016 నుండి మనదేశ ర్యాంకు పడిపోతూనే వున్నది. ఇప్పటికే 19శాతం గ్రామాల్లో మరుగు దొడ్ల సౌకర్యం లేదు. ఓ వైపు కనీసం ఉండటానికి గూడు కూడా లేని పేదలపై భారాలు వేస్తూ, ప్రజావ్యతిరేక విధా నాలను అమలు చేస్తూ మరోవైపు కార్పొరేట్లకు, పెట్టు బడిదారులకు లక్షల కోట్ల రూపాయలను రాయితీలిస్తున్నది.
ఏడాదికి రెండు కోట్ల ఉద్యోగాలెక్కడీ
మన దేశంలో యువత 65శాతం వరకు వున్నారు. వీరికి ఉపాధి, ఉద్యోగం కరువై నిరుద్యోగులుగా తిరుగు తున్నారు. డిగ్రీలు, పిజీలు చదివిన వారు కూడా కూలి పనులకు వెళుతున్నారు. 2014 ఎన్నికల సందర్భంగా సంవత్సరానికి రెండు కోట్ల ఉద్యోగాలు కల్పిస్తానని మోడీ హామినిచ్చారు. కానీ ఆచరణలో వున్న ఉద్యోగాలు ఊడిపోతున్నాయి.ఈ కాలంలో దాదాపు ఒక కోటి 50లక్షల మంది ఉద్యోగాలు కోల్పోయారు. కేంద్ర ప్రభుత్వ ఉద్యోగాలే లక్షలాదిగా ఖాళీలున్నాయి. వాటిని భర్తీ చేయడానికి ప్రభుత్వం సిద్ధపడటం లేదు. దళిత, గిరిజన బ్యాక్‌లాగ్‌ పోస్టులు నింపడం లేదు. సైన్యంలో రిక్రూట్‌మెంట్‌ కొరకు యువత ఎదురు చూస్తున్న తరుణంలో అగ్నిపథ్‌ పేరుతో కాంట్రాక్ట్‌ ఉద్యోగాలను నింపాలని చూసింది. దీన్ని యువత పెద్దఎత్తున వ్యతిరేకించి, ఆందోళనలు చేసింది. అయినా మోడీ ప్రభు త్వం అమలు చేసింది. నేడు దేశంలో నిరుద్యోగం 10శాతం వరకు వున్నదని లెక్కలు చెపుతున్నాయి. ప్రయివేటు కంపెనీ లలో నిర్ధాక్షిణ్యంగా ఉద్యోగులను తొలగిస్తున్నారు. దీంతో పాటు మోడీ సర్కార్‌ లేబర్‌కోడ్‌లు తెచ్చి కార్పొరేట్లకు రక్షణ కల్పిస్తున్నది. యువతే దేశానికి దిక్సూచి అని ప్రగల్బాలు పలుకుతున్న మోడీ ప్రభుత్వం యువతను నిర్వీర్యం చేస్తున్నది. వారి అసంతృప్తి మతోన్మాదంవైపు మళ్లించి చెలగాట మాడుతున్నది. దీనికితోడు దళిత, గిరిజన, మైనారిటీలకు కేటాయి ంచిన ఉప ప్రణాళిక నిధులను, సబ్సిడీలను 50శాతం వరకు తగ్గించింది. ఆ వర్గాలను సంతృప్తిపరడానికి రకరకాల పథకాలున్నాయని ఊకదంపుడు ఉపన్యాసాలతో మభ్యపెడుతున్నది ప్రభుత్వం. ఉపాధితోపాటు, ఆవాసాలు లేకుండా చేయడానికి చట్టాలను మారుస్తున్నది. వారి స్వాధీనంలో ఉన్న భూములను కార్పోరేట్ల హస్తగతం చేయడానికి ప్రయ త్నాలు చేస్తున్నది. ఈ కాలంలో అటవీహక్కుల చట్టానికి సవరణలు తెచ్చింది. భూసేకరణ చట్టానికి మార్పులు తెచ్చారు. నిర్వాసితులకు పరిహారం ఇవ్వకుండా తరిమేస్తోంది. విద్యా, వైద్యానికి దూరం చేస్తున్నది.
మోడీ ప్రభుత్వం కార్పొరేట్ల పక్షమే..
ఉపాధి అవకాశాలను దెబ్బతీస్తూ కార్పోరేట్లకు లాభాలు కట్టబెడుతున్నారు. పన్నుల భారాన్ని పేదలపై పెద్దఎత్తున పెంచారు. పరోక్ష పన్నులు అనగా జీఎస్టీ, నిత్యావసర సరుకులపై సెస్సులు వేస్తున్నారు. దీని ద్వారా కేంద్ర ప్రభుత్వానికి 2022-23లో రూ.19.35 లక్షల కోట్ల ఆదాయం రాగా, 2023-24కు రూ.23.30 లక్షల కోట్లకు పెరిగింది. పరోక్ష పన్నులు 39శాతం నుండి 42.74శాతానికి పెంచారు. ధనికులపై వేసే ప్రత్యక్ష పన్నులు మాత్రం ఇతర దేశాలలో 35శాతం ఉండగా మన దేశంలో 25-28శాతం మాత్రమే విధిస్తున్నారు. ఇది ప్రత్యక్షంగా కార్పోరేట్లకు లాభాలు కట్టబెట్టడమే. అంతేకాక ఉపాధి కల్పించే ప్రభుత్వరంగ సంస్థలను తక్కువ ధరలకు కార్పోరేట్లకు అమ్మేసి రూ.లక్షల కోట్లు ఖజానాలో వేసుకుంటున్నారు. రిజర్వుబ్యాంకు మిగులు నిధులను పేదలకు ఉపయోగపడే పథకాలకు బదులుగా కార్పోరేట్లకు ఈ కాలంలోనే రూ.4.69 లక్షల కోట్లు కేంద్ర ప్రభుత్వం ద్వారా అందించారు.
బ్యాంకులలో లక్షల కోట్ల రూపాయల రుణాలు తీసుకుని ఎగవేసిన సంస్థలకు ప్రభుత్వం సహకరించడంతో వారు దేశం విడిచి వెళ్ళారు. బ్యాంకులు దివాళా తీశారు. ఇదిలా వుంటే దేశంలో 22శాతం సంపద ఒక్క శాతం కోటీశ్వరుల చేతుల్లో వున్నది. మరోవైపు 40శాతం సంపద కేవలం 20శాతం మంది వద్ద వున్నది. ఇదిలా వుంటే కేంద్ర ప్రభుత్వం ఇబ్బడిముబ్బడిగా అప్పులు చేస్తూ ప్రజలను అప్పుల్లోకి దించుతోంది. గత 67 ఏండ్లలో దేశం మొత్తం అప్పు 55.87లక్షల కోట్లు ఉండగా గత తొమ్మి దేండ్లలో మోడీ ప్రభుత్వం రూ.100 లక్షల కోట్లు ఎఫ్‌ఆర్‌బిఎం పరిధికి మించి అప్పు చేసింది. జీడీపీలో 40శాతానికి మించి అప్పు చేయకూడదనే నిబంధన వున్నా, నేడు 57శాతానికి చేరింది. ఈ అప్పుల వల్ల ప్రతి భారతీయుని తలపై ఒక లక్షా 10 వేల రూపాయల అప్పు కత్తిలా వేలాడుతున్నది.
తెలంగాణకు శుష్క వాగ్దానాలే..
రాష్ట్ర విభజన అనంతరం కేంద్రం తెలంగాణకు అనేక వాగ్దానాలు చేసింది.కాజీపేట రైల్వేకోచ్‌ ఫ్యాక్టరీ, పాలమూరు -రంగారెడ్డి ప్రాజెక్టుకు జాతీయహోదా, బయ్యారంలో ఉక్కు ఫ్యాక్టరీ, నిజామాబాద్‌లో పసుపుబోర్డు, రాష్ట్రానికి గిరిజన యూనివర్సిటీ, రాష్ట్రంలో మూడు ఎయిర్‌ పోర్టులు, చేనేతపై జీఎస్టీ తొలగింపు వంటివి వున్నాయి. వాటి ఊసే లేదు.రాష్ట్ర విభజన సమస్యలు పెండింగులోనే వున్నాయి. నీటి వాటా కేటాయింపు నానుతూనే వున్నది. కేంద్రం తెలం గాణపై కక్షపూరితంగా వ్యవహరిస్తున్నది. ఇప్పటికే రాష్ట్రాల హక్కులను హరిస్తున్నది. అనేక సమస్యలతో పేదలు, సామాన్య మధ్యతరగతి ప్రజలు ఎదుర్కొంటున్న దుర్భర పరిస్థితుల నేపథ్యంలో కేంద్ర ప్రభుత్వం తక్షణమే ప్రజల డిమాండ్ల పరిష్కారానికి పూనుకోవాల్సిన అవసరం ఉంది. నిత్యావసర సరుకుల ధరల నియంత్రణకు చర్యలు తీసుకోవాలి. మార్కెటింగ్‌ వ్యవస్ధను పట్టిష్టపరిచి, బ్లాక్‌మార్కెట్‌ను అరికట్టి, పేదలపై వేసిన పన్నుల భారాన్ని పూర్తిగా తగ్గించి కార్పోరేట్‌ సంస్థలపై ఆదాయపు పన్నును 50శాతానికి పెంచేందుకు చర్యలు తీసుకోవాలి. ఉపాధిహామీ పనులకు కేటాయింపులను మూడు రెట్లు పెంచి, విద్య, వైద్య సౌకర్యాలు ఉచితంగా అందిం చేందుకు, పేదలందరికీ ఆవాసాలు కల్పించేందుకు, కేంద్ర ప్రభుత్వ ఖాళీ ఉద్యోగాలను భర్తీ చేసేందుకు చర్యలు చేప ట్టాల్సిన అవసరం ఉంది. ఈ డిమాండ్ల సాధనకు సీపీఐ(ఎం) ఆధ్వర్యంలో సెప్టెంబర్‌1-7 వరకు దేశవ్యాపితంగా జరిగే నిరసన ఉద్యమంలో రాష్ట్ర ప్రజలందరూ భాగస్వాములు కావడం ద్వారా కేంద్ర ప్రభుత్వ మెడలు వంచేందుకు సిద్ధమవ్వాలి.
– తీగల సాగర్‌ 9490098055
