రావు రమేష్‌ టైటిల్‌ పాత్రలో పీబీఆర్‌ సినిమాస్‌, లోకమాత్రే సినిమాటిక్స్‌ సంస్థలు సంయుక్తంగా నిర్మిస్తున్న సినిమా ‘మారుతి నగర్‌ సుబ్రమణ్యం’. ఇంద్రజ కీలక పాత్రధారి. ‘హ్యాపీ వెడ్డింగ్‌’ ఫేమ్‌ లక్షణ్‌ కార్య దర్శకుడు. పూర్తి స్థాయి ఎంటర్‌టైనర్‌గా రూపొందుతున్న ఈ సినిమా చిత్రీకరణ పూర్తి అయ్యింది. దర్శకుడు లక్ష్మణ్‌ కార్య మాట్లాడుతూ, ‘రావు రమేష్‌ని ఇప్పటి వరకు చూసిన దాని కన్నా పదిరెట్లు ఎక్కువ ఎంటెర్టైన్‌ క్యారెక్టర్లో కనిపిస్తారు. ప్రేక్షకులకు ఈ సినిమా మంచి వినోదాన్ని అందిస్తుంది’ అని చెప్పారు. ‘క్యారెక్టర్స్‌ సెలక్షన్‌ విషయంలో నిజాయతీగా ఉండే రావు రమేష్‌ ఈ సినిమా చేయడానికి ప్రధాన కారణం మా దర్శకుడు లక్ష్మణ్‌ కార్య రాసిన కథ. కథలో భాగంగా కామెడీ ఉంటుంది. ముఖ్యంగా లక్ష్మణ్‌ కార్య రాసిన మాటలు అందరినీ నవ్విస్తాయి. ఆ డైలాగులను రావు రమేష్‌ చెప్పిన తీరు థియేటర్లలో విజిల్స్‌ వేయిస్తూ నవ్వించడం ఖాయం. సోషల్‌ మీడియాలో మీమ్స్‌ రూపంలో కూడా హల్‌చల్‌ చేస్తాయి. అజీజ్‌ నగర్‌, బీహెచ్‌ఈఎల్‌, కనకమామిడి, వనస్థలిపురం… హైదరాబాద్‌ పరిసర ప్రాంతాల్లో సినిమా షూటింగ్‌ చేశాం’ అని నిర్మాతలు తెలిపారు. అంకిత్‌ కొయ్య, రమ్య పసుపులేటి, అజరు, హర్షవర్ధన్‌, ప్రవీణ్‌ ఇతర ప్రధాన తారాగణం. కళ్యాణ్ నాయక్‌ ఈ సినిమాకు సంగీతం అందిస్తున్నారు. ‘బేబీ’ ఫేమ్‌ బాల్‌ రెడ్డి సినిమాటోగ్రఫీ అందించారు.
