ఎప్పుడూ ఒకేలాంటి వంటలంటే ఎవరికైనా బోరు కొడుతుంది. పిల్లలకైతే మరీనూ. అమ్మా ఈరోజు ఏం చేస్తాం అంటూ తెగ మారాం చేస్తుంటారు. అలాంటి వారి కోసం అప్పుడప్పుడు కొత్త వెరైటీలు చేయాల్సిందే. సాధారణంగా మినపప్పుతోనే గారెలు, వడలు చేస్తుంటాం. ఎప్పుడూ మినపప్పుతోనేనా? ఈ సారి కొంచెం కొత్తగా ప్రయత్నిద్దాం. నోరూరించే ఈ వడలు, గారెల తయారీ చూద్దాం. రుచికి రుచి.. ఆరోగ్యానికి ఆరోగ్యం. మరి అవేంటో చూద్దాం…
మైసూరు వడ
కావలసిన పదార్థాలు: పచ్చి శెనగపప్పు, కంది పప్పు, పెసర పప్పు, మినపప్పు – ఒక్కొక్క కప్పు చొప్పున, కొత్తిమీర, కరివేపాకు, అల్లం, పచ్చిమిర్చి – మూడు చెంచాల చొప్పున(సన్నగా తరిగినవి), ఉప్పు, నూనె – తగినంత.
తయారీ విధానం: అన్ని రకాల పప్పులను మూడు గంటల సేపు నీటిలో నానబెట్టి బరకగా రుబ్బుకోవాలి. దీనికి ఉప్పు, తరిగిన పదార్థాలన్నింటినీ కలిపి వడలుగా చేసి నూనెలో దోరగా వేయించాలి. అంతే వేడివేడి మైసూరు వడ రెడీ…
క్యాబేజీ వడ
కావలసిన పదార్థాలు: మినపప్పు, తరిగిన క్యాబేజీ – కప్పు చొప్పున, కరివేపాకు – రెండు రెబ్బలు, ఉప్పు, నూనె – తగినంత.
తయారీ విధానం: మినపప్పును నానబెట్టి రుబ్బుకోవాలి. దీనిలో క్యాబేజీ తరుగు, కరివేపాకు, ఉప్పు కలిపి వడలుగా చేసి నూనెలో దోరగా వేయించాలి.
అరటి గారెలు
కావల్సిన పదార్థాలు: మినపప్పు – కప్పు, అరటికాయ – ఒకటి(పొట్టు తీసి చిన్న ముక్కల్లా తరగాలి), పచ్చిమిర్చి – మూడు, కరివేపాకు – రెండు రెబ్బలు, అల్లం – చిన్నముక్క, ఉప్పు, నూనె – తగినంత.
తయారీ విధానం: నానబెట్టిన మినపప్పుకు అరటి ముక్కలు, పచ్చిమిర్చి, అల్లం, కరివేపాకు, ఉప్పు చేర్చి గట్టిగా రుబ్బాలి. తర్వాత గారెల్లా చేసి, మధ్యలో చిన్న చిల్లు పెట్టి నూనెలో వేయించాలి.
బొబ్బర్ల వడలు
కావలసిన పదార్థాలు: బొబ్బర్లు – కప్పు, అల్లం – చిన్న ముక్క (తరగాలి), పచ్చిమిర్చి తరుగు – మూడు, కరివేపాకు – రెండు రెబ్బలు, ఉప్పు, నూనె – తగినంత.
తయారీ విధానం: బొబ్బర్లను నానబెట్టి గట్టిగా రుబ్బాలి. దీనికి అల్లం, పచ్చిమిర్చి, కరివేపాకు, ఉప్పు కలిపి వడల్లా చేసి నూనెలో వేయించాలి.
స్వీట్‌ కార్న్‌-తోటకూరతో..
కావలసిన పదార్థాలు: లేత స్వీట్‌ కార్న్‌ గింజలు, లేత తోటకూర ఆకులు రెండున్నర కప్పుల చొప్పున (శుభ్రం చేసి పెట్టుకోవాలి), అల్లం- కొద్దిగా, వెల్లుల్లి రెమ్మలు – 7, ఉప్పు – తగినంత, జీలకర్ర – ఒక టీ స్పూన్‌, సోంపు – అర టీ స్పూన్‌, ఉల్లిపాయ ముక్కలు – అర కప్పు (చిన్నగా తరుగుకోవాలి)
బియ్యంపిండి – పావు కప్పు, పచ్చిమిర్చి – 4 (చిన్నగా తరగాలి), నూనె – సరిపడా.
తయారీ విధానం : ముందుగా మిక్సీలో స్వీట్‌ కార్న్‌, వెల్లుల్లి రెమ్మలు, అల్లం, తోటకూర ఆకులు (కాడల్లేకుండా) బరకగా మిక్సీ పట్టుకోవాలి. అవసరం అయితే కొన్ని నీళ్లు కలుపుకోవాలి. ఆ మిశ్రమాన్ని ఒక బౌల్లోకి తీసుకుని.. జీలకర్ర, సోంపు, బియ్యప్పిండి, ఉల్లిపాయముక్కలు, పచ్చిమిర్చి ముక్కలు, ఉప్పు వేసుకుని బాగా కలుపుకోవాలి. మిశ్రమం మరీ జారుగా మారితే బియ్యప్పిండి పెంచుకోవచ్చు. వీటిని చిన్న చిన్న వడల్లా చేసుకుని నూనెలో దోరగా వేయించుకోవాలి.
