యువ నటీనటులు, సాంకేతిక నిపుణులతో సితార ఎంటర్‌టైన్‌మెంట్స్‌ రూపొందించిన ‘మ్యాడ్‌’ చిత్రం గతేడాది విడుదలై, ఎంతటి విజయాన్ని సాధించిందో తెలిసిందే. నార్నే నితిన్‌, సంగీత్‌ శోభన్‌, రామ్‌ నితిన్‌ ప్రధాన పాత్రలు పోషించిన ఈ వినోదాత్మక చిత్రం ప్రేక్షకులను విశేషంగా ఆకట్టుకొని, భారీ బ్లాక్‌ బస్టర్‌ను సాధించింది. కొన్ని నెలల క్రితం ‘మ్యాడ్‌’కి సీక్వెల్‌గా ‘మ్యాడ్‌ స్క్వేర్‌’ని రూపొందిస్తున్నట్లు ప్రకటించిన చిత్ర బృందం, వైభవంగా ప్రారంభ వేడుకను నిర్వహించింది. కేవలం ప్రకటనతోనే ఈ సినిమాపై భారీ అంచనాలు ఏర్పడ్డాయి. ముఖ్యంగా యువత ఈ మ్యాడ్‌ మ్యాక్స్‌ ఎంటర్‌టైనర్‌ కోసం ఎంతగానో ఎదురు చూస్తున్నారు. ఈ క్రమంలో నిర్మాతలు ఒక తీపి కబురు చెప్పారు. ఈ చిత్రం నుంచి మొదటి గీతాన్ని ఈనెల 20వ తేదీన విడుదల చేయనున్నట్లు ప్రకటించారు. ఈ సందర్భంగా సాంప్రదాయ దుస్తులలో ఉన్న మ్యాడ్‌ గ్యాంగ్‌ ఫస్ట్‌ లుక్‌ పోస్టర్‌ని చిత్ర బృందం విడుదల చేసింది.ఈ పోస్టర్‌లో వారి వేషధారణ, శైలి మొదటి భాగానికి భిన్నంగా ఉంది. మ్యాడ్‌ గ్యాంగ్‌ను సరికొత్తగా పరిచయం చేస్తున్న ఈ పోస్టర్‌ అందర్నీ ఆకట్టుకుంటోంది. ఈ పోస్టర్‌ని చూడగానే ‘మ్యాడ్‌’ అభిమానులు ప్రేమలో పడిపోతారు అనడంలో సందేహం లేదు అని మేకర్స్‌ చెబుతున్నారు.మొదటి భాగానికి భీమ్స్‌ సిసిరోలియో స్వరపరిచిన పాటలన్నీ చార్ట్‌ బస్టర్‌లుగా నిలిచాయి. ఇప్పుడు రెండో భాగంలో అంతకుమించిన చార్ట్‌బస్టర్‌ పాటలు ఉంటాయని, అందరూ మెచ్చుకునేలా ‘మ్యాడ్‌’ చిత్రాన్ని రూపొందించిన రచయిత, దర్శకుడు కళ్యాణ్ శంకర్‌.. సీక్వెల్‌ను మరింత వినోదాత్మకంగా మలిచే పనిలో ఉన్నారు. మొదటి భాగాన్ని ఇష్టపడిన ప్రతి ఒక్కరూ, రెండో భాగాన్ని మరింత ఇష్టపడతారని, రెట్టింపు వినోదంతో, రెట్టింపు విజయాన్ని ఖాతాలో వేసుకుంటామని నిర్మాతలు దీమా వ్యక్తం చేస్తున్నారు.శ్రీకర స్టూడియోస్‌తో కలిసి సితార ఎంటర్‌టైన్‌మెంట్స్‌, ఫార్చ్యూన్‌ ఫోర్‌ సినిమాస్‌ పతాకాలపై హారిక సూర్యదేవర, సాయి సౌజన్య సంయుక్తంగా ఈ చిత్రాన్ని నిర్మిస్తున్నారు. నిర్మాత సూర్యదేవ నాగవంశీ ఈ చిత్రాన్ని సమర్పిస్తున్నారు. నార్నే నితిన్‌, సంగీత్‌ శోభన్‌, రామ్‌ నితిన్‌ తదితరులు నటిస్తున్న ఈ చిత్రానికి రచన, దర్శకత్వం: కళ్యాణ్ శంకర్‌, సమర్పణ: సూర్యదేవ నాగవంశీ, నిర్మాతలు: హారిక సూర్యదేవర, సాయి సౌజన్య, సంగీతం: భీమ్స్‌ సిసిరోలియో, కూర్పు : నవీన్‌ నూలి, ఛాయాగ్రహణం : షామ్‌దత్‌, కళా దర్శకత్వం: శ్రీ నాగేంద్ర తంగాల.
