రామ్‌ పోతినేని కథానాయకుడిగా మైత్రీ మూవీ మేకర్స్‌ నిర్మాణంలో దర్శకుడు మహేష్‌ బాబు పి ఓ సినిమాను తెరకెక్కిస్తున్నారు. ఈ చిత్రానికి నవీన్‌ ఎర్నేని, వై. రవి శంకర్‌ నిర్మాతలు. హీరోగా రామ్‌ 22వ చిత్రమిది. ఇందులో రామ్‌ జంటగా భాగ్యశ్రీ బోర్సే నటిస్తున్న సంగతి తెలిసిందే. ఈ సినిమాలో సాగర్‌ పాత్రలో రామ్‌ పోతినేని నటిస్తున్నారు. న్యూ ఇయర్‌ సందర్భంగా బుధవారం హీరోయిన్‌ భాగ్య శ్రీ బోర్సే ఫస్ట్‌ లుక్‌ విడుదల చేశారు. ‘మన సాగర్‌గాడి లవ్వు… మహా లక్ష్మి’ అంటూ హీరో, హీరోయిన్లు జంటగా ఉన్న పోస్టర్‌ని విడుదల చేశారు. ఇంకా టైటిల్‌ ఖరారు చేయని ఈ సినిమా ఫస్ట్‌ షెడ్యూల్‌ ఇటీవల పూర్తయింది. ‘హైదరాబాద్‌లో మొదలైన ఫస్ట్‌ షెడ్యూల్‌ షూటింగ్‌ ఇటీవల పూర్తి అయ్యింది. రామ్‌, ఇంకా ఇతర ప్రధాన తారాగణం మీద కీలక సన్నివేశాలు తీశాం. సాగర్‌ పాత్రలో రామ్‌ ఒదిగిన తీరు, ఆయన నటన ప్రేక్షకులందరికీ ఒక ట్రీట్‌ అని చెప్పాలి. ప్రేక్షకులు నోస్టాల్జియాలోకి వెళతారు. ఆ పాత్రలో తమను తాము చూసుకుంటారు. హీరోయిన్‌ భాగ్య శ్రీ బోర్సే లుక్‌ సైతం అందర్నీ ఆకట్టు కుంటోంది. రామ్‌, భాగ్య శ్రీ జోడీ క్యూట్‌గా ఉందని అందరూ చెబుతున్నారు. సినిమాలో వీళ్లిద్దరి మధ్య వచ్చే సీన్లు హైలెట్‌ అవుతాయి’ అని దర్శక, నిర్మాతలు తెలిపారు.
