ప్రభుత్వ కళాశాలల బలోపేతానికి కృషి చేయాలి: ఎమ్మెల్యే సుంకె రవిశంకర్

నవతెలంగాణ-గంగాధర : సర్వీసు క్రమబద్ధీకరించబడిన జూనియర్ లెక్చరర్లు మరింత చిత్తశుద్ధితో, బాధ్యతా యుతంగా పనిచేసి ప్రభుత్వ జూనియర్ కళాశాలల బలోపేతానికి కృషి చేయాలని శాసనసభ్యులు సుంకె రవిశంకర్ పిలుపు నిచ్చారు. రెగ్యులరైజ్ అయిన సందర్భాన్ని పురస్కరించుకుని చొప్పదండి నియోజక వర్గంలోని వివిధ కళాశాలలకు చెందిన పలువురు జూనియర్ లెక్చరర్లు ఆదివారం సుంకెను గంగాధర మండలం బూర్గుపల్లిలోని ఎమ్మెల్యే నివాస కార్యాలయంలో కలిసి శాలువా కప్పి కృతజ్ఞతలు తెలిపారు. ఈ సందర్భంగా ఎమ్మెల్యే సుంకె రవిశంకర్ మాట్లాడుతూ సెర్ఫ్ ఉద్యోగులు, ఆశా వర్కర్లు, విద్యా ,వైద్య రంగాల ఉద్యోగులు, వీఆర్ఏలతో పాటు పలు ప్రభుత్వ విభాగాలలో పనిచేసే ఉద్యోగులకు మేలు చేసే నిర్ణయాలను సీఎం తీసుకున్నారని అన్నారు. ప్రభుత్వం కల్పించిన అవకాశాన్ని లెక్చరర్లు వినియోగించుకుని ప్రభుత్వ కళాశాలల్లో విద్యాభ్యాసం చేసే బడుగు బలహీన వర్గాల విద్యార్థుల ఉన్నతికి కృషి చేయాలని సూచించారు. రెండు దశాబ్దాలకు పైగా విధులు నిర్వహిస్తున్న తమ చిరకాల వాంఛను ముఖ్యమంత్రి కేసీఆర్ తీర్చారని లెక్చరర్లు ఆనందం వ్యక్తం చేశారు. ఈ సందర్భంగా ఎమ్మెల్యే రవిశంకర్ ను లెక్చరర్ల సంఘం నాయకులు శాలువా బొకేలతో సన్మానించారు. కార్యక్రమంలో జూనియర్ లెక్చరర్లు తిరుపతిరెడ్డి, శ్రీనివాస్, జైపాల్ రెడ్డి, నరసయ్య, రాజయ్య , బాలకృష్ణారెడ్డి, భాస్కర్, రాజు , రాజగోపాల్, శ్రీధర్ పాల్గొన్నారు.