”నరేంద్రమోడీకి దమ్ముంటే మణిపూర్‌ వెళ్లి అక్కడి ప్రజలకు ప్రాణప్రతిష్ట చేయాలి. అయోధ్య రాముడి ప్రాణప్రతిష్టకు హాజరు కాని శంకరాచార్యు లపై ఈడితో రైడ్‌లు చేయించాలి. అసలు నరేంద్ర మోడీ ఈ దేశ ప్రధాన మంత్రా లేక దేశంలోని దేవాలయాలన్నింటికీ ఆయనే ప్రధాన అర్చకుడా? పదేళ్ళలో ఒక్కటంటే ఒక్క ప్రెస్‌మీట్‌ పెట్టని ఆయన, ప్రాప్టర్స్‌ లేకుండా మట్లాడలేని ఆయన, తనకు యాబై ఆరు అంగుళాల ఛాతి ఉందని చెప్పుకోవడానికి సిగ్గుపడాలి కదా? ఈ దేశంలో ధైవ విశ్వాసకులంతా గాంధీ నమ్మిన రాముణ్ణి నమ్ముతున్నారు. మోడీ, షా, యోగి, బీజేపీ, ఆరెస్సెస్‌లు మాత్రం నాథూరామ్‌ను నమ్ముతున్నారు”- అని పార్లమెంట్‌లో ప్రకటించాడు-జాన్‌ బ్రిటన్‌ కేరళ రాజ్యసభ యంపి! అంతే కాదు. ఈ దేశద్రోహుల్ని నమ్మగూడదని ఆయన ఈ దేశ ప్రజలకు ఒక హెచ్చరిక కూడా చేశాడు. ఎలక్టోరల్‌ బాండ్స్‌ విషయంలో ఏం తేలిందీ? ”చందా ఇవ్వు-దందా చేస్కో” అని మోడీ ప్రభుత్వం లెక్కలేని అవినీతికి పాల్పడిందని వెల్లడయ్యింది కదా?
స్వతంత్ర భారతావనిలో ఎన్నడూ ఎరగని విధంగా ఎన్నికల కమిషన్‌ అధికారులని కొనేసి చంఢఘీర్‌ మేయర్‌ పదవికి రేటు కడదామనుకున్న దుష్ట ప్రణాళిక ఎవరిదీ? మోడీ అండ్‌ పార్టీదే కదా? పైగా కనీవినీ ఎరగని రామభక్తి పారవశ్యంలో కండ్లు మూసుకుపోయినట్టు నటించాడు కదా? ఏం నటన అదీ? ఆస్కార్‌ కూడా తల దించుకునేంత అసహ్యకరమైన కుటిలనటన! మెజార్టీ ఉన్న ఆమ్‌ ఆద్మీ పార్టీ కార్పోరేటర్లను కొని, ఎన్నికల అధి కారులను కొని, బీజేపీకి వ్యతిరేకంగా పడిన బేలట్‌ పేపర్లపై గీతలు గీయించి, చెల్లనివిగా చేయించి, ఎలాగైనా మేయర్‌ పదవి దక్కించుకోవాలని ప్రయత్నించి, సుప్రీంకోర్టు ప్రధాన న్యాయమూర్తి ముందు అడ్డంగా దొరికిపోయిన మోడీి సత్యనిష్టాగరిష్టుడా? ఇలాంటివాడు గనకనే పీఠాధిపతులంతా అయోధ్య రాముడికి ఈయన ప్రాణప్రతిష్ట చెయ్యొద్దని గగ్గోలు పెట్టారు. ఈ రోజు ఏమైందీ? రామభక్తులంతా తల దించుకోవాల్సిన పరిస్థితి ఏర్పడింది. రామ భక్తులు, మోడీ భక్తులు నిజాలు గ్రహించాల్సిన అవసరం వచ్చింది. మోడీ ఒక దేవుడి అవతారంగా భావించే అంధ విశ్వాసకుల కండ్లు ఇకనైనా తెరుచుకోవాలి. ఎందుకంటే, ఎలక్టోరల్‌ బాండ్లపై సుప్రీంకోర్టు ఇచ్చిన తీర్పు ప్రధాని మోడీకి ఊపిరి ఆడనివ్వడం లేదు. అందుకే శ్రీ కృష్ణ కుచేలుల కథ ముందుకు తెచ్చి – ”అదే ఈ కాలంలోనైతే కుచేలుడు శ్రీకృష్ణుడు ఇద్దరూ అవినీతి పరులయ్యేవారు. అని తన అక్కసు వెళ్ళగక్కుకున్నాడు. నిజానికి తన అవినీతి. తన పార్టీ అవినీతి బయటపడిందని ఆయన తన ఉక్రోషం వెళ్ళగక్కుకున్నాడని – ఈ దేశ ప్రజలకు అర్థమయ్యింది.
నేలను దున్ని ఈ దేశానికి అన్నం పెడుతున్న రైతులు ప్రధాని మోడీ ఇంటికీ, ఆఫీసుకీ కూత వేటు దూరంలో ఢిల్లీ సరిహద్దుల్లో ధర్నా చేస్తుంటే పోయి మాట్లాడి సమస్య పరిష్కరించడానికి తీరికలేదు- చిత్తశుద్ది లేదు. వారి మీద డ్రోన్‌లు ఉపయోగించి, బాష్పవాయువు ప్రయోగించ మంటాడు. వారిపై బుల్లెట్ల వర్షం కురిపించమంటాడు. రోడ్డు మీద మేకులు కొట్టిస్తాడు. అవన్నీ దాటు కుని వస్తారేమోనన్న భయంతో రోడ్లు కోయించి, గోతులు తవ్విస్తాడు. ఇన్ని చేసిన వాడు పారిపోయి సముద్రంలో దాక్కుం టాడు. అదేమంటే ద్వారక భూమికి పూజ చేస్తున్నానని ఫొటో షూట్‌ చేయించుకుంటాడు. అసలు ఫొటోషూట్‌ ఎప్పుడు చేయించుకోలేదూ? ఎక్కడ చేయించు కోలేదూ? బతుకే విచిత్ర వేషధారణ అయినట్లు ఫొటో షూట్‌ చేయించు కునే వ్యక్తికి ఇక పరిపాలనకు తీరిక ఎక్కడా? తన తల్లి దగ్గరికి వెళ్ళినా యాభై మంది కెమెరా మెన్‌లతో వెళ్ళిన గొప్ప పుత్ర రత్నం. ప్రపంచ మంతా వెతికినా మరొకరు దొరకరు కదా? ఇప్పటికైనా ఈ దేశ ప్రజలు నిజాలు గ్రహించి ఈ అబద్దపు రాజును ఓ మూల కూర్చోబెడితే గాని ఈ దేశం బాగుపడదు. సముద్రంలో రెడ్‌ కార్పెట్‌ మీద కూర్చుని పోజులిచ్చాడంటే-ఈ దేశ ప్రజలు ఏమని ఆలోచించాలి’ అతణ్ణి శాశ్వతంగా ఆందులోనే కలిపేయాలని నిర్ణయించుకోవాలి కదా? అతడి ఉత్తుత్తి యాక్షన్లను జనం నిజం చేసి చూపించాలని కదా? కన్నతల్లిని, కట్టుకున్న భార్యను దూరం పెట్టి ఈ దేశ ప్రజల సొమ్ముతో విదేశాల్లో బలాదూరు తిరిగే వాడు- ఈ దేశ ప్రజల బతుకులు ఉద్దరిస్తాడని ఎలా నమ్ముదాం? కట్టుకున్న భార్యకు విడాకులివ్వకుండా వదిలేసిన ఈ అనైతికజీవి-అబద్దాల బ్రాండ్‌ ఎంబాసిడర్‌ ”ఈ దేశ ప్రజలే నా కుటుంబం”! అని అంటే ప్రజలు నమ్ముతారా? పదేండ్లుగా చూస్తున్నాం కదా? కోట్ల రూపాయల విలువగల సూట్లు వేసుకుని తిరగడం కోట్లు విలువ చేసే తిండి తినడం కోట్లు ఖర్చు చేసి దేశ దేశాలు తిరిగిరావడం – సరే కాని దేశానికి ఆవగింజంత మేలు జరిగిందా? లేదు కదా? ఎంత ఖరీదైన దుస్తులు వేసుకున్నా, ఎంత మేకప్‌ చేసుకున్నా – దేశాన్ని మరింత పేదరికంలోకి నెట్టిన ప్రేతకళ ఆయన ముఖంలోనూ ఆయన టీం సభ్యుల ముఖాల్లోనూ తాండవమాడుతునే ఉంది కదా?
”ప్రతి తల్లీ ప్రతి కూతురూ నాకు స్వరూపిణియే. నాకు తల్లులూ చెళ్లెళ్ళూ అందరూ శక్తి స్వరూపణులే నేను భారతమాత పూజారిని”- అని గొంతు చించుకుని చెప్పుకున్న భారత ప్రధాని నరేంద్ర మోడీ – మరి, ఈ కింది సమస్యలు ఎదురైనప్పుడు ఎందుకు నోరు కుట్టేసుకున్నారు? ఏ శక్తి ఆయనని ఆపిందీ?
1. ఢిల్లీలో ఆయన ఇంటి ముందే మహిళా రెజిలెర్స్‌ (పహిల్వాన్‌లు) లైంగిక దాడులకు గురైనప్పుడు ఏమైంది? వారు శక్తి స్వరూపిణులు కారా – ప్రపంచ మీడియా ఈ దేశ ప్రభుత్వ విధానాన్ని తీవ్రంగా కడిగేసింది కదా?
2. కతువా, ఉన్నావ్‌, హత్రాస్‌లలో శారీరక దోపిడీలకు గురైన మహిళలంతా శక్తి స్వరూపిణులు కారా? వారు తల్లులూ, అక్కా చెళ్ళెళ్ళూ, కూతుర్లూ కారా?
3. కాన్పూర్‌లో ఇద్దరు మైనర్‌ బాలికలు ఉరేసుకుంటే- ఈ శక్తి పూజారికి ఈ భరతమాత పూజారికి- ఒక్క చీమైనా కుట్టలేదా? అవసరమైనప్పుడు చెవిటివాడిగా, తప్పని సరైనప్పుడు గుడ్డివాడుగా ఉండడం ఆయన నటనా కౌశల పాండిత్య ప్రదర్శన లో భాగమేనా?
4.మణిపూర్‌లో మహిళలు రేప్‌ చేయబడి, నగంగా ఊరేగించ బడ్డప్పుడు ఆయనలోని పూజారి ఏమయ్యాడు? భరత మాతనే నగంగా ఊరేగించినట్టుగా ఉందని అవమాన భారంతో దేశ ప్రజలు అట్టుడికి పోయారే-అప్పుడు కూడా ప్రపంచ మీడియా కన్నెర్ర చేసిందే? మరి అప్పుడు ఈయన కేమయ్యిందీ? ఈయన పూజారితనానికేమయ్యింది? ఈయన అంటున్న ఆ శక్తిని వెనక ఉండి అంతహీనంగా చేయించింది ఈయనే కదా? కనీసం నోరు విప్పలేదు, క్షమాపణ కోరలేదు. వెళ్లి కనీసం ఈ నాటికీ సానుభూతి చూపలేదు కదా?
నోరు ఎవరు కుట్టేశారూ? అనవసరమైన వాటి మీద గొంతు చించుకునే ఈ నాటకాల రాయుడు స్పందించ లేదెందుకూ? ఇలాంటి ఎన్నెన్నో సందర్భాలలో భారత ప్రధాని నోరు ఎందుకు మెదపలేదో, ఎందుకు కాలు కదిపి అక్కడికి వెళ్లలేక పోయాడో- ‘నేషన్‌ వాంట్స్‌ టు నో’ అండీ! తమాషాకన్నా ఊరికే మాటలు చెప్పడం కాదు. ”ఆధ్యా త్మికత – అనేది మనిషిని అజ్ఞానిగా ఆలోచనాహీనుడిగా, పరాధీనుడిగా, బానిసగా, ప్రశ్నించలేని వాడిగా నిష్క్రియా శీలుడిగా, తయారు చేసే ఒక ప్రక్రియ” అన్నది ఈ దేశంలోని యువతీ యువకులు గ్రహిస్తున్నారు. ఇప్పుడిక రామాలయాలు, పూజారి వేషాలూ పనిచేయవు రాముణ్ణి నమ్మే జనం ఉన్నా నాథూరామ్‌ను నమ్మే ప్రజలు లేరు. ఆ పని బీజేపీ, ఆరెస్సెస్‌ చేసుకోవాల్సిందే!
ఒక ఏనుగూ, మురికి గుంటలోంచి లేచి వచ్చిన పందీ-రెండూ ఒక చిన్న వంతెన మీద ఎదురు పడ్డాయి. ఏనుగు పక్కకు తొలగి పందికి దారిచ్చింది. అంతే తనకు ఏనుగు భయపడుతోందని పంది ప్రచారం మొదలు పెట్టింది ”అలా ఎందుకు చేశావని” కొన్ని జంతువులు ఏనుగును అడిగాయి. ”నిజమే! ఒక్క తొక్కు తొక్కితే పంది చస్తుంది. కాని దాని మీద ఉన్న బురద నా మీద పడుతుంది. ఆ బురద కడుక్కోవడం మళ్లీ నాకొక పెద్ద పని- అందుకని అలా చేశానని” చెప్పింది ఏనుగు. తన విలువ తన స్థాయి ఏమిటో తెలుసుకోకుండా దుష్ప్రచారానికి దిగింది వరాహవతారం! సమాజంలో కొందరు మనుషులు, కొన్ని రాజకీయ పార్టీలు కూడా అంతే! వారి స్థాయి ఏమిటో వారు గ్రహించుకోరు. ఎదుటివారి సామర్థ్యాన్ని కూడా అంచనా వేయలేరు. ఇది ఈ దేశ కాల పరిస్థితు లకు కూడా అన్వయించుకోవచ్చు. సహనం, సంయమనం పాటిస్తున్న ఈ దేశ ప్రజలు ఏనుగులాంటి వారే. వారి మంచి తనాన్ని ఆసరా చేసుకుని ఎగిరెగిరిపడే వరాహమూర్తులే మన ప్రస్తుత బీజేపీ నాయకులు. ప్రజా ఏనుగు ఇప్పుడు బురద కడుక్కుం దామని అనుకుంటోంది. అందుకే తొక్కెయ్యడానికి సిద్ధంగా ఉంది!
ఒక వ్యక్తి ఏదో తప్పు చేశాడన్న అనుమానంతో ఆ దేశపు రాజు అతనికి జైలు శిక్ష విధించాడు. అలా నెలలు, ఏండ్లుగా ఆ వ్యక్తి జైల్లో బందీగా ఉన్నాడు. జైల్లో విసిగిపోయి, ఆహారం అందించే భటుడి సహాయంతో ఎలాగైనా బయటపడాలనుకున్నాడు- జైల్లోని వ్యక్తి! బయట పడే మార్గం ఆలోచించుకునే క్రమంలో తలుపుతోశాడు. అంతే – అది తీసే ఉంది. తెరుచుకుంది. అయితే, బయటంతా చీకటిగా ఉంది. అందులోంచి ధైర్యంగా నడిచి వెళుతూ ఉంటే ఎవరూ అడ్డుపడలేదు. అలా నడిచి, నడిచి వెలుగులోకి వెళ్లాడు. అప్పుడసలు విషయం గ్రహించాడు. అమా యకత్వం, మంచితనం, అపరాధ భావన, వ్యాకులత వంటి వాటి మధ్య తను ఈ పదేండ్లు బందీగా ఉండిపోయానా? అని అనుకున్నాడు. వాటినుంచి ఎప్పుడో బయట పడాల్సింది-అని కూడా అనుకున్నాడు. అసలు విషయం గ్రహిం చాడు ఇప్పుడు ఈ దేశ ప్రజలంతా అలాంటి పరిస్థితుల్లో ఇరుక్కున్న వాళ్లే-సత్వరం మేల్కొని, పునరుద్ధరించుకుని బయట పడాలి! చుట్టుముట్టి ఉక్కిరిబిక్కిరి చేస్తున్న దేశ కాల పరిస్థితుల్ని అదుపులోకి తెచ్చుకోవాలి. అబద్దాల్ని నిజాలతోను, అనైతికతను నైతికతతోనూ, అజ్ఞానాన్ని జ్ఞానంతోనూ, మోసాల్ని వివేకంతోనూ… ఛేదిస్తూ – ‘మానవ్‌ మానవ్‌ ఏక్‌ సమాన్‌’- నినాదంతో ముందుకు కదలాలి. ఊరికే నిశ్చేష్టులై చూస్తున్నంత కాలం మార్పు రాదు! కదలాలి!! తోటి వారిని కదిలించాలి!! పునర్నిర్మాణ కార్యక్రమం సత్వరం ప్రారంభించాలి. రాముడు ఒక కల్పిత పాత్ర అనీ, నాథూ రామ్‌ ఒక దేశ ద్రోహి అని చెప్పకుండా, అబద్దాలతో అధికారంలో కొనసాగుదామని అనుకుంటే వారికి బుద్ధి చెప్పాలి. అందుకే ఆస్కార్‌ వైల్డ్‌ అన్నాడు- ”ప్రతి అబద్దం విషంలాంటిది. హానిచేయని అబద్దాలు ఉండవు. కేవలం యదార్థమే సురక్షితం, క్షేమకరం-అది ఏ రకంగానూ పగులగొట్ట లేని ర్నతం లాంటిది!” అని!
– కేంద్ర సాహిత్య అకాడమీ విజేత, జీవశాస్త్ర వేత్త
(మెల్బోర్న్‌ నుంచి)
– డాక్టర్‌ దేవరాజు మహారాజు
