విష్ణు మంచు నటిస్తూ, నిర్మిస్తున్న ప్రాజెక్ట్‌ ‘కన్నప్ప’. ప్రభాస్‌, అక్షరు కుమార్‌, మోహన్‌ లాల్‌ లాంటి స్టార్లు భిన్న పాత్రల్లో ప్రేక్షకుల్ని సర్‌ప్రైజ్‌ చేయబోతున్నారు. తాజాగా మాలీవుడ్‌ సూపర్‌ స్టార్‌ మోహన్‌ లాల్‌ ఫస్ట్‌ లుక్‌ పోస్టర్‌ రిలీజ్‌ చేశారు. ఈ సినిమాలో కిరాట అనే పవర్‌ఫుల్‌ రోల్‌లో ఆయన కనిపించబోతున్నట్లు తెలుపుతూ ఈ పోస్టర్‌ రిలీజ్‌ చేశారు. గంభీరమైన మోహన్‌ లాల్‌ లుక్‌ చూస్తుంటే చిత్ర మేజర్‌ హైలైట్స్‌లో ఈయన క్యారెక్టర్‌ కూడా ఒకటని స్పష్టమవుతోంది. విడుదల చేసిన కాసేపట్లోనే ఈ పోస్టర్‌ వైరల్‌గా మారింది. విష్ణు మంచు టైటిల్‌ రోల్‌లో కనిపించనున్న ఈ సినిమా అత్యంత ప్రతిష్టాత్మక ప్రాజెక్ట్‌గా రాబోతోంది. ప్రీతి ముకుందన్‌ కథానాయికగా నటిస్తోంది. అవా ఎంటర్టైన్మెంట్స్‌, 24 ఫ్రేమ్స్‌ ఫ్యాక్టరీ బ్యానర్లపై మోహన్‌ బాబు నిర్మిస్తున్న
ఈ చిత్రానికి ముఖేష్‌ కుమార్‌ సింగ్‌ దర్శకత్వం వహించారు. వచ్చే ఏడాది ఏప్రిల్‌ 25న ఈ సినిమా గ్రాండ్‌గా విడుదల కానుంది. ‘కన్నప్ప’ మూవీ ఏ తరానికి అయినా కొత్తగానే ఉంటుందని.. భక్తి భావం, ధూర్జటి మహాకవి ఎలా రాశారు? శ్రీకాళహస్తి మహత్యం ఏంటి? అన్నది ఈ చిత్రంలో చూపించనున్నాం. ఎంతో వ్యయప్రయాసలతో భారత దేశంలోని నాలుగు మూలల ఉన్న మహానటుల్ని ఈ చిత్రంలో తీసుకున్నాం. ఇది కేవలం భక్తి చిత్రమే కాదు. అన్ని రకాల అంశాలుంటాయి. పరమేశ్వరుడు ఇచ్చిన ఆజ్ఞతోనే ఈ సినిమా తీశాం. ఈ సినిమాతో విష్ణు మంచు తనయుడు అవ్రామ్‌ భక్త మంచు ఆరంగేట్రం చేస్తుండటం సంతోషంగా ఉంది’ అని మోహన్‌బాబు చెప్పారు.
