మధ్యాహ్నం మరింత భారం.?

– పెరిగిన ధరలతో ఏజన్సీలు తప్పలు
– ఒక్కొక్క విద్యార్ధికి ప్రతిరోజూ రూ.16.84 ఖర్చు
– అధికారులు చెల్లిస్తుంది రూ.7.95 పైసలే.
– పెండింగ్ బిల్లులతో ఇబ్బందులు
నవతెలంగాణ- మల్హర్ రావు
ప్రభుత్వ పాఠశాలల్లో మధ్యాహ్నం భోజనం ఏజన్సీ నిర్వాహకులు ఆర్థిక భారం ఎదుర్కొంటున్నారు.పెరిగిన ధరల వల్ల కూరగాయలు, నిత్యావసర సరుకులు కొనుగోలు చేయలేకపోతున్నారు. దీంతో విద్యార్థులకు నాణ్యమైన ఆహారం అందించలేకపోతున్నారు.మరోవైపు కొన్ని నెలలుగా బిల్లులు పెండింగ్ లో ఉండడంతో రోజువారీ భోజనానికి ఇబ్బందులు ఎదుర్కొంటున్నారు.
పెరిగిన ధరలతో ఇబ్బందులు..
మండలంలో 5 జిల్లా పరిషత్,రెండు ప్రాథమికోన్నత, 27 ప్రాధమిక, ఒక కస్తూరిబ్బా, ఒక మోడల్ స్కూల్ మొత్తం 37 పాఠశాలలు ఉన్నాయి. ఇందులో మొత్తం 1,853 మంది విద్యార్థులు విద్యానభ్యసిస్తున్నారు.కాగా వీరికి ప్రతిరోజు మధ్యాహ్న భోజనం అందించాల్సి ఉంటుంది.ప్రభుత్వ నిబంధనల ప్రకారం 1 నుంచి 5వ తరగతి విద్యార్థికి ప్రతిరోజూ రూ.5.45 పైసలు చెల్లిస్తున్నారు. 6 నుంచి 10వ తరగతి విద్యార్థులకు రూ.8.15 పైసలు చెల్లిస్తున్నారు. ప్రస్తుతం కూరగాయలు, నిత్యావసర సరుకుల ధరలు పెరగడంతో 1 నుంచి 5వ తరగతి విద్యార్థులకు రూ.ప్రతిరోజూ రూ.16.84 పైసలు ఖర్చు అవుతుంది. 6 నుంచి 10వ తరగతి విద్యార్థులకు రూ.19.44 పైసలు ఖర్చు అవుతుంది. కాగా వారంలో మూడురోజులు గుడ్లు అందించాల్సి ఉంటుంది.దీనికి రూ.15 ప్రభుత్వం చెల్లిస్తుంది.ప్రస్తుతం ఒక్కొక్క గుడ్డుకు రూ.7 పెరిగింది. దీంతో మూడు రోజులకు రూ.21 అవుతుంది.అదనంగా ఒక్కొక్క విద్యార్థిపై రూ.6 భారం పడనుంది. పప్పులు, కూరగాయలు 1 నుంచి 10వ తరగతి విద్యార్థులకు రోజుకు రూ.40 చెల్లిస్తున్నారు.ప్రస్తుతం పెరిగిన ధరలు వల్ల రూ.150 అధికంగా ఖర్చు అవుతుంది. మంచినూనె, చింతపండు రోజుకు రూ.140, కారం రోజుకు రూ.300 ఖర్చు అవుతుంది. పెరిగిన ధరలతో ఏజన్సీ నిర్వహకులు ఇబ్బందులకు గురివుతున్నారు. గత ప్రభుత్వం మధ్యాహ్న ఏజన్సీలు స్లాబ్ రేటు పెంచినట్లుగా అమల్లోకి రాలేదు.పెరిగిన ధరలు ప్రకారం ఒక్కొక్క విద్యార్థికి రూ.20 స్లాబ్ రేటు పెంచితే మంచి ఆహారం అందే అవకాశం ఉంది. శనివారం, గురువారం బిర్యానీ, కిచిడి అందించాల్సి ఉండగా ఒక్కొక్క విద్యార్థిపై అదనంగా భారం పడడంతో కొన్ని పాఠశాలల్లో వడ్డించడం లేదు.దీనికి తోడుగా గత ఆరు నెలలుగా ఏజన్సీలకు రావాల్సిన దాదాపు మండల వ్యాప్తంగా రూ.5లక్షల బకాయిలు రావడం లేదని నిర్వాహకులు వాపోతున్నారు. కొన్ని పాఠశాలల్లో నామమాత్రంగా పప్పు,చారుతో భోజనం అందిస్తున్నారు.గుడ్డు కూడా సక్రమంగా అందించడం లేదు.ఇప్పటికైనా అదికారులు స్పందించి పెరిగిన ధరలకు అనుగుణంగా బిల్లులు చెల్లించాలని, పెండింగ్ బిల్లులు మంజూరు చేయాలని నిర్వాహకులు కోరుతున్నారు.
పెరిగిన ధరల ప్రకారం ఇవ్వాలి..
అక్కల బాపు యాదవ్..
యువైఏప్ఐ రాష్ట్ర అధ్యక్షుడు
ఇటీవల పెరిగిన ధరలు వల్ల విద్యార్థులకు మధ్యాహ్న భోజనం అందించడం నిర్వాహకులకు ఆర్థికంగా ఇబ్బందులు ఎదుర్కొంటున్నారు.ప్రభుత్వమే పెరిగిన ధరలకు అనుగుణంగా బిల్లులు చెల్లించాలి.అలాగే పెండింగ్ లో ఉన్న బకాయిలు తక్షణమే చెల్లించాలి.