‘డెవిల్‌: ది బ్రిటిష్‌ సీక్రెట్‌ ఏజెంట్‌’తో నిర్మాత అభిషేక్‌ నామా దర్శకుడిగా తనకంటూ ఓ ప్రత్యేకతను సొంతం చేసుకున్నారు. తాజాగా ఆయన ‘నాగబంధం- ది సీక్రెట్‌ ట్రెజర్‌’ ప్రాజెక్ట్‌ని అనౌన్స్‌ చేశారు. దీనికి ఆయన కథ, స్క్రీన్‌ ప్లే కూడా అందిస్తున్నారు. అభిషేక్‌ పిక్చర్స్‌తో కలిసి ఎన్‌ఐకె స్టూడియోస్‌ ప్రొడక్షన్‌ నెం.1గా కిషోర్‌ అన్నపురెడ్డి ఈ చిత్రాన్ని నిర్మించనున్నారు. తారక్‌ సినిమాస్‌ సంయుక్తంగా నిర్మిస్తున్న ఈ చిత్రానికి లక్ష్మీ ఐరా, దేవాన్ష్‌ నామా సమర్పిస్తున్నారు. ‘పెదకాపు’ ఫేమ్‌ విరాట్‌ కర్ణ లీడ్‌ రోల్‌ పోషిస్తున్నారు. నభా నటేష్‌, ఐశ్వర్య మీనన్‌ ఫిమేల్‌ లీడ్స్‌గా, జగపతి బాబు, జయప్రకాష్‌, మురళీ శర్మ, బి.ఎస్‌.అవినాష్‌ ముఖ్యమైన పాత్రల్లో కనిపించనున్నారు. భారీ అంచనాలున్న ఈ చిత్రం సోమవారం చిత్ర బృందంతోపాటు ప్రత్యేక అతిథుల సమక్షంలో ఘనంగా ప్రారంభమైంది. ముఖ్య అతిథిగా విచ్చేసిన చిరంజీవి ముహూర్తం షాట్‌కి క్లాప్‌ కొట్టారు. తలసాని శ్రీనివాస్‌ యాదవ్‌ కెమెరా స్విచాన్‌ చేయగా, తొలి షాట్‌కి అజరు భూపతి దర్శకత్వం వహించారు. ఆసియన్‌ సునీల్‌ స్క్రిప్ట్‌ని మేకర్స్‌కి అందజేశారు. డివైన్‌, అడ్వంచర్‌ ఎలిమెంట్స్‌తో ఓ పవర్‌ ఫుల్‌ స్క్రిప్ట్‌ను అభిషేక్‌ నామా రాశారు. తిరువనంతపురంలోని పద్మనాభస్వామి ఆలయంలో నిధి, పూరీ జగన్నాథ ఆలయంలో రత్న భండార్‌ను తెరిచిన తర్వాత గుప్త నిధుల అంశం దేశంలో హాట్‌ టాపిక్‌గా మారింది. భారతదేశంలోని 108 విష్ణు దేవాలయాలు నాగబంధం ద్వారా రక్షించబడుతున్నాయి. సినిమా కథ భారతదేశంలోని 108 విష్ణు దేవాలయాలకు సంబంధించిన నాగబంధం చుట్టూ తిరుగుతుంది. మెస్మరైజ్‌ చేసే ఇంట్రో వీడియో ప్రేక్షకులను కట్టిపడేసింది. పాన్‌ ఇండియా మూవీగా దీన్ని వచ్చే ఏడాది తెలుగు, హిందీ, తమిళం, కన్నడ, మలయాళంలో విడుదల చేయనున్నారు. ఈ నెల 23న రెగ్యులర్‌ షూటింగ్‌ ప్రారంభిస్తామని మేకర్స్‌ అనౌన్స్‌ చేశారు.
