కాంగ్రెస్ చేతికి నల్గొండ డీసీసీబీ..

నల్లగొండ జిల్లా డీసీసీబీ చైర్మన్ గొంగిడి మహేందర్ రెడ్డిపై డైరెక్టర్లు పెట్టిన అవిశ్వాస తీర్మనం నెగ్గింది. బీఆర్ఎస్ పార్టీకి చెందిన డీసీసీబీ చైర్మన్ గొంగిడి మహేందర్ రెడ్డిపై 14 మంది డైరెక్టర్లు ఈనెల 10వ తేదీన జిల్లా కలెక్టరేట్ కార్యాలయంలోని డిసిఓ కార్యాలయంలో డిసిఓ కిరణ్ కుమార్ కు అవిశ్వాస తీర్మానం కోరుతూ  లేఖ అందజేశారు. డిసిఓ గతంలో తెలిపిన తేదీ ప్రకారం శుక్రవారం ఉదయం 11 గంటలకు నల్లగొండ డీసీసీబీ కార్యాలయంలో అవిశ్వాస తీర్మానంపై ఓటింగ్ నిర్వహించారు. ఇందులో 15 మంది డైరెక్టర్లు మహేందర్ హేందర్ రెడ్డికి వ్యతిరేకంగా ఓటు వేశారు. దీంతో అవిశ్వాస తీర్మానం నెగ్గింది. మహేందర్ రెడ్డి తన చైర్మన్ పదవిని కోల్పోయారు.  నూతనంగా చైర్మన్ బాధ్యతలను కాంగ్రెస్ పార్టీకి చెందిన కుంభం శ్రీనివాస్ రెడ్డి చేపట్టే అవకాశం ఉంది. ఇందుకు అధికారులు ఏర్పాట్లను చేస్తున్నారు. కాగా ప్రస్తుతం వైస్ చైర్మన్ గా కొనసాగుతున్న దయాకర్ రెడ్డి ఇంచార్జ్ చైర్మన్ గా వ్యవహరించనున్నారు.

అవిశ్వాసం నెగ్గిన  అనంతరం డైరెక్టర్ కుంభం శ్రీనివాస్ రెడ్డి మీడియాతో మాట్లాడారు. నల్లగొండ డీసీసీబీపై మరోసారి కాంగ్రెస్ పార్టీ జెండా ఎగిరిందని అన్నారు. రాజకీయాలకు అతీతంగా రైతు సంక్షేమమే ధ్యేయంగా బ్యాంకును ముందుకు తీసుకుపోతామని అన్నారు. బ్యాంకును దినదిన అభివృద్ధి చేస్తూ రైతులకు అన్ని విధాలుగా సహాయ, సహకారాలు అందిస్తామని పేర్కొన్నారు.కాంగ్రెస్ పార్టీ అధికారంలో ఉందనో .. బిఆర్ఎస్ ప్రతిపక్షంలో ఉందనో  అవిశ్వాసం పెట్టలేదు. ఇందులో ఎలాంటి రాజకీయ కోణం లేదు. కేవలం మహేందర్ రెడ్డి ఒంటెద్దు పోకడలు, అవినీతి అక్రమాలకు వ్యతిరేకంగా 19 మంది డైరెక్టర్లకు గాను 15 మంది అవిశ్వాసంలో పాల్గొన్నారు. అవిశ్వాసం పై ఈనెల 10న డిసిఒకు తీర్మానం ఇచ్చాం. ఈ 18 రోజులుగా మహేందర్ రెడ్డి మమ్మల్ని ఇబ్బంది పెట్టాలని చూసినా డైరెక్టర్లు నాకు మద్దతుగా నిలిచారు. వారందరికీ కృతజ్ఞతలు అన్నారు. గత పాలకులు డిసిసిబికి రాజకీయ రంగు పులిమి ఇష్టానుసారంగా వ్యవహరించారని ఆరోపించారు. తాము రాజకీయాలకు అతీతంగా పనిచేస్తామని స్పష్టం చేశారు.బ్యాంకు డైరెక్టర్లు, అధికారులు,ఉద్యోగుల సలహాలు సూచనలతో  అన్ని విధాలుగా రైతుల సంక్షేమం కోసం కృషి చేస్తామని అన్నారు. ఎన్ని ఇబ్బందుల గురిచేసిన డైరెక్టర్లంతా అవిశ్వాసానికి హాజరయ్యారని తెలిపారు.