నవతెలంగాణ వరుస కథనాలతో “అధికారుల” స్పందన 

చట్టం ముందు అందరూ సమానులే.. తప్పు చేస్తే ఎంతటి పెద్దవారినైనా శిక్షించాల్సిందే. కానీ చాలాసార్లు ఇది జరిగే అవకాశం లేదు. కానీ నల్లగొండ జిల్లా అధికార యంత్రాంగా మాత్రం ఇది చేసి చూపించింది. నల్లగొండ జిల్లా కేంద్రంలోని ఎనిమిది మంది జర్నలిస్టులు జీవో నెంబర్ 59 లోని లొసుగులను ఆసరా చేసుకొని ఇరిగేషన్ శాఖకు చెందిన  కోట్ల విలువ చేసే భూమిని గత ఏడాది అక్రమంగా చేసుకున్న రిజిస్ట్రేషన్ లను రద్దుచేసి పారేశారు. వివరాల్లోకి వెళితే  నల్లగొండ జిల్లా కేంద్రంలో  న్యాయం,  ధర్మం కాపాడే నాలుగవ స్తంభం ముసుగు వేసుకున్న ఎనిమిది  మంది జర్నలిస్టులు తప్పుడు ధృవీకరణ పత్రాలను సృష్టించి వారికున్న బలంతో.. రాజకీయ నాయకులతో ఒత్తిడి తీసుకువచ్చి అధికారులను తప్పుదోవ పట్టించి కోట్ల విలువ చేసే ప్రభుత్వ స్థలాన్ని దోచుకున్నారు. జీవోనెంబర్ 59 ప్రకారం జర్నలిస్టులు నకిలీ పత్రాలను సృష్టించి గత ఏడాది జూలై 28న నలగొండ రిజిస్ట్రేషన్ కార్యాలయంలో ఇరిగేషన్ ల్యాండ్ ను రిజిస్ట్రేషన్ చేసుకున్నారు. దీనిపై జిల్లాలోని జర్నలిస్టు సంఘాలు ఒక్కతాటిపైకి వచ్చి అత్యవసర సమావేశాన్ని ఏర్పాటు చేసి నల్లగొండ జిల్లా జర్నలిస్ట్  హౌసింగ్ సొసైటీ ని ఏర్పర్చి ఆందోళన కార్యక్రమాలు చేపట్టారు. కాగా అక్రమ రిజిస్ట్రేషన్ల విషయాన్ని మొట్టమొదటిసారిగా నవతెలంగాణ పత్రికలో గత ఏడాది అక్టోబర్ 13 తేదీన దోచుకున్నోనికి దోచుకున్నంత కథనాన్ని ప్రచురితం చేసింది. ఆ తర్వాత నల్లగొండ జిల్లా జర్నలిస్ట్ హౌసింగ్ సొసైటీ ఆధ్వర్యంలో జర్నలిస్టులు నల్లగొండ పట్టణం బస్టాండ్ నుండి కలెక్టరేట్ వరకు భారీ ర్యాలీ నిర్వహించి అప్పటి కలెక్టర్ ఆర్వి. కర్ణన్ ను కలిసి అక్రమ పట్టాలను రద్దు చేయాలని డిమాండ్ చేశారు. తదనంతరం నల్లగొండ జిల్లా జర్నలిస్ట్ హౌసింగ్ సొసైటీ ఆధ్వర్యంలో వరుసగా ఆందోళన కార్యక్రమాలు చేపట్టారు. నల్లగొండ జిల్లా జర్నలిస్ట్ హౌసింగ్ సొసైటీ కి మద్దతుగా, అక్రమ రిజిస్ట్రేషన్ లను రద్దు చేయాలని కోరుతూ నవతెలంగాణ పత్రికలో వరుస కథనాలు ప్రచురితమయ్యాయి. విలేకరుల ముసుగులో ప్రభుత్వ భూమి క్రమబద్ధీకరణకై చర్యలు, రద్దు చేయాల్సిందే చర్యలు తీసుకోవాల్సిందే, స్థలాలు కాపాడుకునేందుకు యత్నాలు.. ఇప్పటికే ప్రభుత్వ పెద్దలను కలిసిన అక్రమ పట్టాదారులు, భూ ఆక్రమణపై చర్యలు తీసుకోవాలి, జిల్లా ప్రధాన అధికారి ఆదేశాలు అమలయ్యేనా, భూ కుంభకోణం పై కొనసాగుతున్న విచారణ, వంటి వరుస కథనాలు ప్రచురితమయ్యాయి.

ఈ కథనాలు అప్పట్లో ఉమ్మడి నల్లగొండ జిల్లా వ్యాప్తంగానే కాకుండా రాష్ట్రవ్యాప్తంగా   చర్చనీయాంశంగా మారాయి. నవతెలంగాణ పత్రికలో వచ్చిన కథనాలతో నల్లగొండ జిల్లా హౌసింగ్ సొసైటీ సభ్యులు అక్రమ పట్టాల రద్దుకై పోరును మరింత ఉదృతం చేశారు. దీంతో   అప్పటి కలెక్టర్ ఆర్వి కర్జన్ స్పందించి అదనపు కలెక్టర్ శ్రీనివాసును విచారణ అధికారిగా నియమించారు. జరిగిన అక్రమా లపై పూర్తిస్థాయిలో విచారణ జరిపిన అదనపు కలెక్టర్ జర్నలిస్టులు అక్రమంగా ప్రభుత్వ భూమిని రిజిస్ట్రేషన్ చేయించుకున్నారని, వీటిని రద్దు చేయాలని సీసీఎల్ఎకు నివేదిక ఇచ్చారు. ఈ మేరకు సీసీఎల్ఎ ఈ రిజిస్ట్రేషన్ లను రద్దు చేసేందుకు నిర్ణయించింది. సీసీఎస్ఏ ఆదేశాల మేరకు అదనపు కలెక్టర్ శ్రీనివాస్ 8 మంది జర్నలిస్టులు చేసుకున్న 2232 గజాల భూమి రిజిస్ట్రే షన్ లను రద్దు చేస్తూ గత నెల 14న ఉత్తర్వులు (E1/6257/2023-2) జారీ చేశారు. కానీ అనివార్య కారణాలవల్ల ఈ ఉత్తర్వులను అధికారులు బహిర్గతం చేయలేదు. అధికారుల అలసత్వం పై జర్నలిస్టు సంఘాలు గత రెండు రోజుల నుంచి ఆందోళన జరుపుతున్న నేపథ్యంలో జిల్లా యంత్రాంగం బుధవారం ఉత్తర్వుల కాపీని బహిర్గతం చేసింది. అక్రమ పట్టాలు రద్దు కావడంతో నల్లగొండ జిల్లా ప్రజలు,  నల్లగొండ జిల్లా జర్నలిస్ట్ హౌసింగ్ సొసైటీ హర్షం వ్యక్తం చేసింది. ఈ సందర్భంగా పలువురు జర్నలిస్ట్ హౌసింగ్ సొసైటీ నాయకులు మాట్లాడుతూ అక్రమాలకు పాల్పడ్డ విలేకరుల రిజిస్ట్రేషన్ లను రద్దు సంతోషించే పరిణామమే. కానీ  అక్రమాలకు అండగా నిలబడి ప్రభుత్వ భూమిని రిజిస్ట్రేషన్ చేసిన అధికారులపై, అదేవిధంగా అక్రమంగా పట్టాలు చేయించుకున్న 8 మంది జర్నలిస్టులపై కూడా క్రిమినల్ కేసులు నమోదు చేసి ప్రజలకు చట్టాలపై మరింత గౌరవం పెరిగేలా అధికారులు చర్యలు తీసుకోవాలని వారు కోరుతున్నారు. కాగా ప్రభుత్వ భూ అక్రమ క్రమబద్దీకరణ పై వరుస కథనాలు రాసి ప్రభుత్వ భూమి కాపాడిన నవతెలంగాణ పత్రికకు నల్లగొండ జిల్లా ప్రజలు, నల్లగొండ జిల్లా జర్నలిస్ట్ హౌసింగ్ సొసైటీ సభ్యులు ప్రత్యేక అభినందనలు తెలిపారు.

అక్రమ భూ రిజిస్ట్రేషన్ల పట్టాలను రద్దు చేసే విషయంలో రాష్ట్ర రోడ్డు భవనాలు సినిమాటోగ్రఫీ శాఖ మంత్రి కోమటిరెడ్డి వెంకటరెడ్డి ప్రత్యేక శ్రద్ధ కనబరిచారు. మంత్రిగా బాధ్యతలు చేపట్టిన నాటి నుండి నల్లగొండ జిల్లా జర్నలిస్ట్ హౌసింగ్ సొసైటీ ఆధ్వర్యంలో పలుమార్లు విషయాన్ని మంత్రి దృష్టికి తీసుకువెళ్లారు. దీంతో స్పందించిన మంత్రి విషయంపై ప్రత్యేక చొరవ తీసుకొని అక్రమ రిజిస్ట్రేషన్లు రద్దు అయ్యేలా చర్యలు తీసుకోవాలని అధికారులను ఆదేశించారు. ప్రస్తుతం అక్రమ రిజిస్ట్రేషన్లు రద్దు కావడంతో అక్రమ రిజిస్ట్రేషన్లకు పాల్పడ్డ వారిపై, అదేవిధంగా వారికి సహకరించిన అధికారులపై చట్టపరమైన, శాఖ పరమైన చర్యలు తీసుకునేలా అధికారులకు ఆదేశాలు జారీ చేయాలని నల్లగొండ జిల్లా జర్నలిస్ట్ హౌసింగ్ సొసైటీ సభ్యులు మంత్రి కోమటిరెడ్డి ని కోరుతున్నారు.