సుహాస్‌ హీరోగా నటిస్తున్న మరో వైవిధ్యమైన ప్రేమకథా చిత్రం ‘ఓ భామ అయ్యో రామ’. మాళవిక మనోజ్‌ హీరోయిన్‌. ఈ చిత్ర షూటింగ్‌ పూజా కార్యక్రమాలు శనివారం ఫిలింనగర్‌ దైవసన్ని ధానంలో ఘనంగా జరిగాయి. విఆర్ట్స్‌అండ్‌ చిత్రలహరి టాకీస్‌ పతాకంపై హరీష్‌ నల్లా, ప్రదీప్‌ తాళ్లపు రెడ్డి ఈ చిత్రాన్ని నిర్మిస్తున్నారు. రామ్‌ గోదాల దర్శకుడు. హీరో, హీరోయిన్‌పై చిత్రీకరించిన ముహుర్తపు సన్నివేశానికి నిర్మాత దిల్‌ రాజు క్లాప్‌ ఇచ్చారు. దర్శకుడు వశిష్ట కెమెరా స్విచ్చాన్‌ చేశారు. మరో దర్శకుడు కొలను శైలేష్‌ బౌండెడ్‌ స్కిప్ట్‌ను దర్శకుడికి అందజేశారు. టైటిల్‌ పోస్టర్‌ను దర్శకులు విజరు కనకమేడల, కిషోర్‌ తిరుమల, నిర్మాత సుదర్శన్‌ రెడ్డి ఆవిష్కరించారు. ఈ సందర్భంగా సుహాస్‌ మాట్లాడుతూ, ‘దర్శకుడు రామ్‌ గోదాల మంచి కథతో ఈ చిత్రాన్ని తెరకెక్కిస్తున్నాడు. నా అభిమాన నటులతో నటించే అవకాశం నాకు ఈ సినిమాతో దొరికింది’ అని తెలిపారు. అనితా హస్సానందని మాట్లాడుతూ,’నా సెకండ్‌ ఇన్నింగ్స్‌కు ఫర్‌ఫెక్ట్‌గా కుదిరిన చిత్రమిది. నన్ను ఎంతగానో ఆకర్షించిన కథ ఇది’ అని అన్నారు. ‘ఇదొక బ్యూటిఫుల్‌ లవ్‌స్టోరీ. సుహాస్‌ కొత్తగా దర్శకత్వం చేసే వాళ్లకు దొరికిన వరం. రథన్‌ సంగీతం చిత్రానికి అదనపు బలంగా ఉంటుంది’ అని దర్శకుడు రామ్‌ గోదాల అన్నారు. నిర్మాతలు మాట్లాడుతూ,’సినిమా ప్రారంభం నుంచే మంచి పాజిటివ్‌ వైబ్‌ కనిపిస్తుంది’ అని తెలిపారు.
