ప్రజల నాడిని బట్టి పరిపాలన కొనసాగిస్తే అది కొంత వరకు సుపరిపాలన అవుతుంది. ప్రజలను ఖాతరు చేయకుం డా బానిసలుగా చూసి, ఆధిపత్యాన్ని చలాయించి, అహంకా రాన్ని ప్రదర్శించి, అధికార దుర్వినియోగానికి పాల్పడితే ఏ ప్రభుత్వానికైనా ఓటమి, అవమానం, ఛీత్కారాలు తప్పవు. పరిపాలనకు ఉన్న ఈ కనీస ధర్మాలను, రాజ్యాంగ నేపథ్యం లో సామాజిక బాధ్యతలను ఏ ప్రభుత్వాలు అయితే విస్మరి స్తాయో అవి శాశ్వతంగా ప్రజల చేతిలో ఓటమి పాలు కాక తప్పదు. అయితే సవరించుకొని, తప్పులను అంగీకరించి, ప్రజలను ప్రభువులుగా చూసే సంస్కారాన్ని ప్రదర్శించే రాజకీయ పార్టీలకు కొంత అవకాశం ఉండే పరిస్థితులు ఉంటాయి. కానీ అదే అహంకారాన్ని ఓటమి తర్వాత కూడా చట్టసభల్లో ప్రదర్శించి, ప్రజల ఆకాంక్షలను పరిగణనలోకి తీసుకోకుండా, తమ ఓటమికి కల కారణాలను విశ్లేషించుకోకుండా, ప్రభుత్వం మీద నియంతృత్వ ధోరణితో విమర్శలకు పాల్పడి, సభను విచ్చిన్నం చేసే ప్రయత్నం చేస్తే మాత్రం ఆ రాజకీయ పార్టీకి ప్రజలు ప్రభుత్వం చేతిలో పరాభవమే మిగులుతుంది. ఈనాడు అలాంటి పరిస్థితులు కేంద్ర ప్రభుత్వంతో సహా దేశవ్యాప్తంగా అనేక రాష్ట్రాలలో కొనసాగుతున్నప్పటికీ ముఖ్యంగా తెలంగాణ రాష్ట్రంలో ఇటీవల జరిగిన ఎన్నికల్లో ఓటమిపాలైన బీఆర్‌ఎస్‌ పోషిస్తున్న పాత్ర అక్షరాల ఈ సన్నివేశానికి వర్తిస్తుంది. ఇతర విపక్షాలు, ప్రజాస్వామ్యవాదులు, ప్రభుత్వం ముప్పేట విమర్శలకు దిగినా, చేసిన నేరాన్ని అంగీకరించని, ప్రజల ముందు తలవంచని పరిస్థితులు తెలంగాణ రాష్ట్రంలోని ప్రధాన ప్రతిపక్షం బీఆర్‌ఎస్‌లో చూడవచ్చు.
తొమ్మిదిన్నరేండ్ల సుదీర్ఘ పాలనలో వెనుకముందు చూడ కుండా చేసిన అప్పులు, యువతకు చేసిన అన్యాయం, సంక్షేమ పథకాలలోని డొల్లతనం, రాజకీయ ఉద్యోగ వర్గాల్లో నెలకొన్న అవినీతి అంతాఇంతా కాదు. ఈ దుస్థితికి బీఆర్‌ఎస్‌ బాధ్యులు మాజీ ముఖ్యమంత్రి, మంత్రివర్గంపైన విచారణ జరిపించి దోషులను శిక్షించ వలసిన అవసరం ఉందని అనేక వర్గాల నుండి ఒత్తిడి వస్తున్న నేపథ్యంలో కూడా రాజీ పడకపోతే, సభా కార్యక్రమాలకు విఘ్నాతం కలిగిస్తే అందుకు తగిన మూల్యం చెల్లించుకోక తప్పదు. ఇది ప్రజాధనంతో ప్రజల కోసం పనిచేసే సుపరిపాలన కోరుకునే కోట్లాది ప్రజల ఆకాంక్ష.
కేసీఆర్‌ కుటుంబ పాలనలో రాష్ట్రం సర్వనాశనమైందని, ప్రజల సొమ్మును కొల్లగొట్టిన వారి పైన తగు చర్యలు తీసు కొని శిక్షించాలంటే బాధ్యులైన బీఆర్‌ఎస్‌ నాయకుల పాస్‌ పోర్టులను వెంటనే సీజ్‌ చేయాలి. కేసీఆర్‌ కుటుంబీకులు చేసిన విచ్చలవిడి అవినీతి, అక్రమాలను బయటికి తీయాలి. వారి కుటుంబీకులకు సహకరించిన అధికారుల పాస్‌పోర్టు లను కూడా సీజ్‌ చేయాలి. భూకబ్జాలు, ఇతర అవినీతి ఆరోపణల్లో బీఆర్‌ఎస్‌ ఎమ్మెల్యేలు మంత్రులు కూరుకుపో యారు. కాళేశ్వరం ప్రాజెక్టుతో సహా ఇతర ప్రాజెక్టులలోని అవినీతిపై విచారణ జరిపించాల్సిన అవసరం ఉన్నది. ఇది ప్రజల పక్షాన ప్రభుత్వానికి చేసిన డిమాండ్‌గా భావించ వలసి ఉంటుంది. అయినా ఇవన్నీ బీఆర్‌ఎస్‌ ప్రధాన బాధ్యులకు తలకెక్కడం లేదంటే తమ గోతిని తామే తవ్వుకోవడానికి సిద్ధంగా ఉన్నారని అర్థం.
గవర్నర్‌ ప్రసంగానికి ధన్యవాదాలు తెలిపే తీర్మానంపైన మాజీ మంత్రి కేటీఆర్‌ మాట్లాడుతూ కాంగ్రెస్‌ ప్రభుత్వం మూడు నెలల్లో అట్టర్‌ ప్లాప్‌ అవుతుందని అనడం సరికాదు. ఇది ప్రజాతీర్పును అవమానించడమే. తెలంగాణ రాష్ట్రం ఏర్పడి 2014 నుండి బీఆర్‌ఏస్‌ ప్రభుత్వమే పదేళ్లుగా పరిపాలించినప్పుడు ఇక కాంగ్రెస్‌ పార్టీని విమర్శించే అధికారం ఎక్కడిది ? పదే పదే 50 ఏండ్ల కాంగ్రెస్‌ పాలన గూర్చి మాట్లాడి విమర్శలకు గురైన కేటీఆర్‌, హరీష్‌ రావులపై ఒక దశలో సీపీఐ శాసనసభ్యులు కూనంనేని సాంబశివరావు అసహనం వ్యక్తం చేయడంతో పాటు బేరసారాలు మొద లుపెడతారా? ఎమ్మెల్యేలను కొనుగోలు చేస్తారా? కేటీఆర్‌ అలా మాట్లాడడం మంచిది కాదు అని హెచ్చరించిన తీరు బీఆర్‌ఏస్‌ శాసనసభ్యుల అసందర్భ వాదనకు చెక్‌ పెట్టినట్లుగా భావించాలి. పదే పదే కాంగ్రెస్‌కు 65 మంది సభ్యులు ఉంటే తమకు 39 మంది సభ్యులు ఉన్నారని, ఎలా పరిపాలన చేస్తారో చూస్తామని కేటీఆర్‌ బెదిరించడం ఆయన అహంకారానికి నిదర్శనం. ప్రజలు, ప్రజాస్వామికవాదులు తీవ్ర అభ్యంతరం తెలపాల్సిన విషయం ఇది.
ఈ ప్రభుత్వం ఏడాది కూడా ఉండదు అని బీఆర్‌ఎస్‌ శాసనసభ్యులు హెచ్చరిస్తున్నారంటే ఎమ్మెల్యేలను కొనుగోలు చేయడానికి సిద్ధంగా ఉన్నారా? కొంతమంది శాసనసభ్యులు ఉత్సాహాన్ని ప్రదర్శిస్తున్నారని అది మంచిది కాదు. ఓడిపోవడం అనేది ప్రజాస్వామ్య ప్రక్రియలో ఒక భాగం. ప్రతిపక్షంగా కొత్త ప్రభుత్వానికి సహకరించాల్సిన బాధ్యత ఉంటుంది. స్వేచ్ఛ లేని జీవితాన్ని తెలంగాణ ప్రజలు అంగీకరించబోరు. బీఆర్‌ఎస్‌ ప్రభుత్వంలో మాట్లాడే స్వేచ్ఛ లేని కారణంగానే ప్రజలు తిరుగుబాటు చేసి ఓడించారు. అసెంబ్లీ సాక్షిగా కేటీఆర్‌ చేసిన ప్రసంగం ఇతర బీఆర్‌ఎస్‌ ఎమ్మెల్యేలలో సోయి తెప్పిస్తే సంతోషం. తెలంగాణ ధనిక రాష్ట్రమని, అన్నింటిలో నంబర్‌వన్‌ అని, బంగారు తెలంగాణ అని పదే పదే ప్రచారం చేసుకున్న బీఆర్‌ఎస్‌ ప్రభుత్వ హయాంలో ఏనాడైనా ఒకటో తేదీన ఉద్యోగులకు జీతాలు చెల్లించారా? ఇప్పటికీ విద్యార్థులకు సుమారు రూ.7000 కోట్ల స్కాలర్‌ షిప్‌, ఫీజు రీయంబర్స్‌ మెంట్‌ నిధులు పెండింగ్‌లో ఉన్నాయంటే గత పాలన ఎంత దుర్మార్గమయిందో అర్థం అవుతుంది. అసెంబ్లీలో సీపీఐ ఎమ్మెల్యే ప్రసంగిస్తుంటే పదేపదే అడ్డు తగిలిన బీఆర్‌ఎస్‌ సభ్యులను ”సభలో ఇంత మంది కలిసి ఇబ్బంది పెడతారా. నన్ను బెదిరించ లేరు” అని ఆయన వారించవలసి వచ్చిందంటే ప్రభుత్వంతో పాటు ఇతర విపక్షాలను కూడా బీఆర్‌ఎస్‌ సభ్యులు ఎంత ఇబ్బందులకు గురి చేస్తున్నారో, ఎంత అహంకారాన్ని ప్రదర్శిస్తున్నారో తెలు స్తోంది. ఇదంతా టీవీ ప్రసారాల ద్వారా ప్రజలు గమనిస్తున్నారు. ప్రజలు అవసర మైన సందర్భంలో తప్పకుండా ప్రతిస్పందిస్తారు. గత ఎన్నికల్లో ఓటమి పాలైనారంటే ప్రజల పరిశీలన మేరకే కదా!
ఇక ముఖ్యమంత్రి రేవంత్‌రెడ్డి ప్రసంగిస్తున్న సందర్భంలో బీఆర్‌ఎస్‌ పార్టీకి చెందిన అనేకమంది శాసనసభ్యులు అడ్డు తగలడం, కొత్తగా శాసనసభ్యునిగా గెలిచిన పాడి కౌశిక్‌రెడ్డి సభలో వ్యవహరించిన తీరుపైన స్పీకర్‌ కలగజేసుకొని ”కొత్త సభ్యుడివి. శాసనసభలో గడ్‌బడ్‌ చేయకు” అని చేసిన హెచ్చరిక ఆ పార్టీ మొత్తానికి గుణపాఠమైతే బాగుండు. టీవీలు, పత్రికలు ప్రసార మాధ్యమాలతో పాటు అన్నింటా వారి ప్రవర్తనను ప్రజలు గమనించడం చర్చనీయాంశం కాగా సుపరిపాలనకు ఏ రకంగాను బీఆర్‌ఏస్‌ పార్టీ సహకరించే పరిస్థితులు లేవని అందరూ అసహ్యించుకోవడం గమనించదగిన విషయం. ”ఇదే పరిస్థితి కొనసాగితే సభలో కూడా కొనసాగలేరు. ప్రజలు తరిమికొడతారు” అని స్వయంగా ముఖ్యమంత్రి రేవంత్‌ రెడ్డి హెచ్చరించవలసి వచ్చిందంటే బీఆర్‌ఎస్‌ పార్టీ దిగజారుడుతనం అర్థం చేసుకోవచ్చు. ఇప్పటికైనా ప్రజా ఆకాంక్షలకు అనుగుణంగా, ప్రజాతీర్పును శిరసావహించి, ప్రజల పక్షాన పనిచేయడం ద్వారా విశ్వాసాన్ని చూరగొనాలి. కానీ అడుగడుగునా సభలో అడ్డు తలిగి అహంకారాన్ని ప్రదర్శిస్తే ప్రజల నుండి ఎదురయ్యేది చేదు అనుభవాలే.
ఎం. అరుణ్‌కుమార్‌
9010962016
