గ్రామీణ ప్రేమ కథా చిత్రాలు ఈ మధ్య ఎక్కువగా రావడం లేదు. అచ్చమైన ప్రేమ కథను తెరపై చూసి చాలా కాలమే అవుతోంది. ప్రేమకు అర్థం చెప్పేలా ప్రస్తుతం ‘రాధా మాధవం’ అనే సినిమా రాబోతోంది. వినాయక్‌ దేశారు, అపర్ణా దేవీ హీరో. హీరోయిన్లుగా గోనాల్‌ వెంకటేష్‌ నిర్మించిన అందమైన ప్రేమ కథా చిత్రమిది. ఈ మూవీకి దాసరి ఇస్సాకు దర్శకత్వం వహించారు. వసంత్‌ వెంకట్‌ బాలా ఈ చిత్రానికి కథ, మాటలు, పాటలను అందించారు. సతీష్‌ ఈ చిత్రానికి లైన్‌ ప్రొడ్యూసర్‌గా వ్యవహరిస్తున్నారు. ఈ సినిమా సాంగ్‌, టీజర్‌, ట్రైలర్‌ ఇలా అన్నీ కూడా సోషల్‌ మీడియాలో మంచి రెస్పాన్స్‌ను దక్కించుకున్నాయి. ప్రస్తుతం ఈ చిత్రానికి సంబంధించిన సెన్సార్‌ కార్యక్రమాలు కూడా పూర్తయ్యాయి. సెన్సార్‌ సభ్యులు ఈ మూవీకి యూ/ఏ సర్టిఫికేట్‌ను జారీ చేశారు. చక్కని సందేశాత్మక చిత్రమని సినిమా మీద ప్రశంసలు కురిపించారు. మార్చి 1న ఈ మూవీ భారీ ఎత్తున విడుదల కానుంది. ఈ సందర్భంగా మేకర్స్‌ మాట్లాడుతూ, ‘మంచి కంటెంట్‌ ఉన్న మూవీతో ప్రేక్షకుల ముందుకు రాబోతున్నాం. ఈ సినిమా కచ్చితంగా మంచి విజయం సాధిస్తుందనే నమ్మకంతో ఉన్నాం’ అని తెలిపారు. మేక రామకష్ణ, జయ ప్రకాష్‌, ప్రియ, నవీన్‌, రవి శివతేజ, సుమన్‌, రాచర్ల లాస్య, ధనుష్‌ ఆచార్య, రాచర్ల మహేష్‌, శ్రీకాంత్‌ పర్కాల, సతీష్‌ కొల్లిపల్లి, శ్రీను, అడెపు మణిదీప్‌, చిరంజీవి, కామనగరి జ్యోతి, సురభి శ్యామల తదితరులు ఈ చిత్రంలో ఇతర పాత్రల్ని పోషిస్తున్నారు.
