స్లేట్‌ పెన్సిల్‌ స్టోరీస్‌ బ్యానర్‌ పై ప్రభాకర్‌ ఆరిపాక సమర్పణలో పథ్వి పొలవరపు నిర్మాణంలో ప్రొడక్షన్‌ నెం.1గా తెరకెక్కుతున్న ద్విభాషా చిత్రానికి ‘రామం రాఘవం’ అనే టైటిల్‌ను ఖరారు చేశారు. సోమవారం అయోధ్యలో బాలరాముడి విగ్రహ ప్రతిష్ఠ సందర్భంగా ఈ చిత్ర ఫస్ట్‌ లుక్‌ను ఇరవై రెండు మంది సినీ ప్రముఖుల చేతుల మీదుగా విడుదల చేశారు. అలాగే ఈ సినిమా పెద్ద సక్సెస్‌ కావాలని ఆకాంక్షిస్తూ ట్వీట్‌లో అభినందనలు తెలిపారు. నటుడు ధనరాజ్‌ మొదటిసారి దర్శకత్వం వహిస్తున్న ఈ సినిమాలో సముద్రఖని ప్రధాన పాత్రలో నటిస్తున్నారు. ఈ ఫస్ట్‌ లుక్‌ పోస్టర్‌లో తండ్రీ కొడుకులుగా సముద్రఖని, ధనరాజ్‌ డైనమిక్‌గా కనిపిస్తున్నారు. ఇదివరకు ఎప్పుడూ చూడని ఒక తండ్రీ కొడుకుల కథను అద్భుతంగా తెరమీద ఆవిష్కరిస్తున్నామని దర్శకుడు ధనరాజ్‌ కొరనాని తెలిపారు. మోక్ష, హరీష్‌ ఉత్తమన్‌, సత్య పద్వి, శ్రీనివాసరెడ్డి, చిత్రం శ్రీను, ప్రమోదిని, రాకెట్‌ రాఘవ, రచ్చ రవి, ఇంటూరి వాసు తదితరులు నటిస్తున్న ఈ చిత్రానికి ‘విమానం’ చిత్ర దర్శకుడు శివ ప్రసాద్‌ యానా కథను సమకూర్చగా అరుణ్‌ చిలువేరు సంగీతం అందిస్తున్నారు. హైదరాబాద్‌, చెన్నై, అమలాపురం, రాజమండ్రి, రాజోలు పరిసర ప్రాంతాల్లో శరవేగంగా షూటింగ్‌ జరుపుకుంటున్న ఈ చిత్రానికి తమిళ, తెలుగు భాషలలో ఒకేసారి విడుదల కానుంది. ఈ చిత్రానికి ఎడిటింగ్‌ : మార్తాండ్‌ కె వెంకటేష్‌, కెమెరా : దుర్గా ప్రసాద్‌.
