రాఘవ లారెన్స్‌ హీరోగా, బాలీవుడ్‌ నటి కంగనా రనౌత్‌ టైటిల్‌ పాత్రలో నటించిన చిత్రం ‘చంద్రముఖి 2’. లైకా ప్రొడక్షన్స్‌ బ్యానర్‌పై సుభాస్కరన్‌ నిర్మిస్తోన్న ఈ చిత్రాన్ని సీనియర్‌ డైరెక్టర్‌ పి.వాసు తెరకెక్కిస్తున్నారు. భారీ బడ్జెట్‌తో రూపొందుతోన్న ఈ చిత్రం తెలుగు, తమిళ, హిందీ, కన్నడ, మలయాళ భాషల్లో పాన్‌ ఇండియా మూవీగా ఈనెల 28న విడుదలవుతుంది. తెలుగు రాష్ట్రాల్లో ఈ చిత్రాన్ని రాధాకష్ణ ఎంటర్‌టైన్‌మెంట్స్‌ బ్యానర్‌పై వెంకట్‌ ఉప్పుటూరి, వెంకట రత్నం శాఖమూరి రిలీజ్‌ చేస్తున్నారు.
ఈ సినిమాను ముందుగా ఈనెల 15న రిలీజ్‌ చేస్తున్నట్లు ప్రకటన చేశారు. అయితే కొన్ని సాంకేతిక కారణాలతో సినిమాను ఈనెల 15న విడుదల చేయటం లేదని, ఈనెల 28న ప్రపంచవ్యాప్తంగా గ్రాండ్‌ రిలీజ్‌ చేయబోతున్నట్లు మేకర్స్‌ తెలియజేస్తూ ఓ వీడియోను విడుదల చేశారు.
రీసెంట్‌గా రిలీజైన ట్రైలర్‌ సినిమాపై ఉన్న ఎక్స్‌పెక్టేషన్స్‌ను నెక్ట్స్‌ రేంజ్‌కి తీసుకెళ్లింది. 17 సంవత్సరాల క్రితం లక లక అంటూ చంద్రముఖి తాను బందీగా ఉంటున్న గది తలుపులు తెరుచుకుని వేట్టయ రాజాపై పగ తీర్చుకోవటానికి ప్రయత్నించి విఫలమైంది. ఇన్నేళ్ల తర్వాత మళ్లీ ఇప్పుడు తన పగ తీర్చుకోవటానికి చంద్రముఖి మరోసారి రెడీ అయ్యింది.
