ఎర్ర కాగడా

sita ram yechuriఉదయ కిరణ బాణాలు
ఒక నిరంకుశత్వాన్ని చీల్చేస్తూ
నిత్య నిర్మల వికాసానికి
వారధిగా నిలబడి గెలిచింది
ఎర్ర జెండా రెపరెపలు
ఒక వినూత్న గేయాలాపనకు
సమసమాజ గీతికగా
నిరంతరం పోరాటం చేసింది
అట్టడుగు నిర్బంధాలతో
ఒక గీత అడ్డంగా వచ్చినప్పుడు
ఎరుపు కండ్ల పరిష్కారపు ఒరవడి
ఉవ్వెత్తున లేచి నిలబడింది

అణగదొక్కే పరిణామపు కోరల్ని
ఎర్రటి కాగడా వెలుగు ఖడ్గం
ఖండించే పనిలో నిమఘ్నమైంది
ఆ ఎర్ర సూరీడు మండుతుంటే
వెక్కిరించే అరచేతుల మధ్యన
పెడబబ్బల గుణపాఠం
ఒక పరిష్కారపు మార్గమైంది

చిన్న చూపుల పరంపరలో
దూరమౌతున్న మానవతకు
బుద్ధి చెప్పే ఉద్యమాల పోరు గడ్డ
ఒక్కసారిగా దండెత్తి కదిలింది

ఎగురుతున్న ఎరుపు పతాకం
కొడవండ్లు చేతబట్టి
కలుపు మొక్కల కొతకై కదులుతూ
సమధర్మ పాలిత ప్రాంతానికై
సమర శంఖం పూరిస్తూ కదిలింది
బడుగు సమర భేరి నినాదంలో
అనచబడే ప్రక్రియకు తిలోదకాలిస్తూ
పగ్గాలను చేతబట్టే చైతన్యానికి
ఊతమిస్తూ ఉరకలేస్తోంది
ఎర్రసూరీడు సాక్షిగా
ఒక ఉద్యమ బాట
ఒక ఉద్ధారణ హోమానికి
ఆజ్యం పోస్తూ బతుకునిస్తోంది
సమాజంలో బతకనిస్తోంది

– నరెద్దుల రాజారెడ్డి, 9666016636