నవతెలంగాణ-హైదరాబాద్‌
రాజధాని అమరావతి ఇన్నర్‌ రింగ్‌ రోడ్డు కేసులో టీడీపీ అధినేత చంద్రబాబు నాయుడుకు ఏపీ హైకోర్టు ఊరటను కల్పించింది. చంద్రబాబు దాఖలు చేసిన ముందస్తు బెయిల్‌ పిటిషన్‌ను మంగళవారం హైకోర్టు విచారించింది. ఇరువైపు వాదనలు విన్న హైకోర్టు తదుపరి విచారణను ఈ నెల 22కి వాయిదా వేసింది. అప్పటి వరకు చంద్రబాబును అరెస్ట్‌ చేయకూడదని సీఐడీని ఆదేశించింది. మరోవైపు వాదనల సందర్భంగా ప్రభుత్వం తరపున అడ్వొకేట్‌ జనరల్‌ వాదనలు వినిపిస్తూ స్కిల్‌ డెవలప్‌మెంట్‌ కేసులో చంద్రబాబు మధ్యంతర బెయిల్‌పై ఉన్నారని ఆ గడువు ముగిసే వరకు ఆయనను అరెస్ట్‌ చేయబోమని కోర్టుకు తెలిపారు. ఆయన స్టేట్మెంట్‌ను రికార్డ్‌ చేసిన హైకోర్టు అరెస్ట్‌ చేయవద్దని ఆదేశిస్తూ తదుపరి విచారణను 22కి వాయిదా వేసింది.
