సీనియర్‌ నటి జయలలిత సమర్పకులుగా వ్యవహిరిస్తూ ఓ కీలక పాత్రలో నటిస్తున్న చిత్రం ‘రుద్రంకోట’. ఏఆర్‌ కె విజువల్స్‌ పతాకంపై రాము కోన దర్శకత్వంలో అనిల్‌ ఆర్కా కండవల్లి ఈ చిత్రాన్ని నిర్మిస్తున్నారు. అనిల్‌, విభీష, రియా హీరో, హీరోయిన్లుగా నటిస్తున్నారు. సినిమా విడుదలకు సిద్దమైన సందర్భంగా హీరో, నిర్మాత అనిల్‌ ఆర్క కండవల్లి మాట్లాడుతూ, ‘శ్మశాన వాటికలో పెరిగి పెద్దైన ఓ యువకుడి ప్రేమకథా చిత్రమిది. భద్రాచలం దగ్గర రుద్రంకోట అనే ఊరి నేపథ్యంలో కథ నడుస్తుంది. ఇప్పటి వరకు ఎవరూ చూపించని అంశాలను మా చిత్రంలో చూపిస్తున్నాం. ఇందులో అన్ని వర్గాల ప్రేక్షకులను ఆకట్టుకునే అంశాలుంటాయి. జయలలిత సమర్పకులుగా వ్యవహరిస్తూ ఈ చిత్రంలో ఓ కీలక పాత్రలో నటించారు. సంగీత దర్శకులు కోటి మా చిత్రానికి అద్భుతమైన బ్యాక్‌ గ్రౌండ్‌ స్కోర్‌ అందించారు. సుభాష్‌ ఆనంద్‌ అందించిన రెండు పాటలు ఇప్పటికే విడుదలై ప్రజాదరణ పొందాయి. ఇటీవల సెన్సార్‌ పూర్తయ్యింది. యు/ఏ సర్టిఫికెట్‌తో పాటు సినిమా బావుందంటూ సెన్సార్‌ సభ్యులు ప్రశంసించారు. మా సినిమా నచ్చడంతో స్క్రీన్‌ మాక్స్‌ పిక్చర్స్‌ ఈనెల 22న విడుదల చేస్తున్నారు’ అని తెలిపారు.
