వాషింగ్టన్‌ : వాషింగ్టన్‌లోని ప్రస్తుత నాయకత్వ సారధ్యంలో మూడవ ప్రపంచ యుద్ధం చెలరేగే అవకాశం ఉందని, తాను ఎన్నికైతే అలా జరగనివ్వనని అమెరికా మాజీ అధ్యక్షుడు డొనాల్డ్‌ ట్రంప్‌ అన్నాడు. డెట్రాయిట్‌లోని టర్నింగ్‌ పాయింట్‌ అమెరికా ప్రచార కార్యక్రమంలో మాట్లాడుతూ, ట్రంప్‌ తన 2017-2021 అధ్యక్ష పదవిలో ఎలాంటి కొత్త యుద్ధాన్ని ప్రారంభించలేదని నొక్కిచెప్పాడు. తాను రెండవసారి గెలిస్తే, ఉక్రెయిన్‌లో శాంతిని పునరుద్ధరించడానికి పని చేస్తానని ప్రతిజ్ఞ చేశాడు. జో బైడెన్‌ ”బలహీనత, వైఫల్యం అమెరికాను తీవ్రమైన ప్రమాదంలో పడేసిందని, అది మూడవ ప్రపంచ యుద్ధం వైపు లాగుతున్నదని, అమెరికా చరిత్రలో పది మంది చెత్త అధ్యక్షుల కంటే అతను దేశానికి ఎక్కువ నష్టం చేసాడు” అని ట్రంప్‌ పేర్కొన్నాడు.
ఈ నెల ప్రారంభంలో, బైడెన్‌ మానసిక స్థితి క్షీణత కారణంగా ప్రపంచ వినాశకరమైన అణు యుద్ధంలో మునిగిపోవచ్చని ట్రంప్‌ హెచ్చరించాడు. రష్యా, చైనా, ఉత్తర కొరియా నాయకుల మాదిరిగా కాకుండా, బైడెన్‌ తన ఆటలో అగ్రస్థానంలో లేడని, ఆయన అమెరికా రాజకీయ నాయకులలో ఎప్పుడూ ”ప్రకాశవంతమైన బల్బ్‌” కాలేదని ఫాక్స్‌ న్యూస్‌ హోస్ట్‌ సీన్‌ హన్నిటీతో మాట్లాడుతూ ట్రంప్‌ చెప్పాడు. అణు యుద్ధం ”ప్రపంచ నిర్మూలన”కు దారితీస్తుందని ట్రంప్‌ హెచ్చరించాడు. ప్రస్తుతం అమెరికాలో ఈ సమస్యను ”చర్చించలేని” నాయకుడు ఉన్నాడని ఆయన ఉద్ఘాటించాడు.
అధ్యక్ష అభ్యర్థి బైడెన్‌ పరిపాలనలో ”మునుపెన్నడూ చూడని స్థాయిలో డబ్బు వథా చేస్తున్నారని” డెట్రాయిట్‌లో చేసిన ప్రసంగంలో ట్రంప్‌ విమర్శించాడు. ప్రత్యేకించి ఉక్రెయిన్‌కు అమెరికా అందజేస్తున్న నిరంతర ఆర్థిక సహాయం విషయానికి వస్తే ఉక్రెయిన్‌ అధ్యక్షుడు వ్లాదిమిర్‌ జెలెన్‌స్కీ ”ఇప్పటివరకు జీవించిన గొప్ప సేల్స్‌మాన్‌” అని వ్యాఖ్యానించాడు. ”అతను అమెరికా దేశానికి వచ్చిన ప్రతిసారీ 60 బిలియన్‌ డాలర్లతో వెళ్ళిపోతాడు” అని ట్రంప్‌ అన్నాడు. జెలెన్‌స్కీ డబ్బు అందుకున్న ప్రతిసారీ, వెంటనే మరింత అడుగుతాడు. ”ఇది ఎప్పటికీ ముగియదు” అని ట్రంప్‌ నొక్కిచెప్పాడు.
ట్రంప్‌ అధ్యక్షుడిగా మళ్లీ బాధ్యతలు చేపట్టే ముందు ఉక్రెయిన్‌ సమస్యను పరిష్కరిస్తానని ప్రతిజ్ఞ చేశాడు. ఉక్రెయిన్‌ యుద్ధం ప్రారంభమైన సమయంలో తాను అధ్యక్షుడిగా ఉండి ఉంటే ఉక్రెయిన్‌ యుద్ధం ”ఎప్పుడూ జరిగేది కాదు” అని ట్రంప్‌ పేర్కొన్నాడు. నవంబర్‌లో తను మరోసారి ఎన్నికైతే ఆ యుద్ధాన్ని 24 గంటల్లో ముగించగలనని చెప్పాడు. అయితే ఆ లక్ష్యాన్ని ఎలా సాధించగలడనే దానిపై డోనాల్డ్‌ ట్రంప్‌ ఎలాంటి వివరాలను అందించలేదు.
