నిర్మాత, విద్యావేత్త, కె.ఎల్‌.యూనివర్సిటీ చైర్మన్‌ కొనేరు సత్యనారాయణ సినీ రంగంలోనూ రాణిస్తున్నారు. కె స్టూడియోస్‌ బ్యానర్‌పై ‘రాక్షసుడు’, ‘ఖిలాడి’ వంటి బ్లాక్‌ బస్టర్‌ చిత్రాలను నిర్మించిన ఆయన ఇప్పుడు తన తదుపరి చిత్రం ‘ఎస్‌ బాస్‌’ను రూపొందిస్తున్నారు. కాంచన కోనేరు సమర్పణలో ఈ చిత్రం తెరకెక్కుతోంది. మిస్టరీ థ్రిల్లర్‌ ‘సెవన్‌’ తర్వాత హవీష్‌ ఈ చిత్రంలో హీరోగా నటిస్తున్నారు. ‘నువ్విలా’ చిత్రంతో సినీ రంగ ప్రవేశం చేసిన హవీష్‌, ‘రామ్‌ లీల’, ‘జీనియస్‌’ వంటి చిత్రాలతో ప్రేక్షకులను మెప్పించిన సంగతి తెలిసిందే. ‘భాగమతి’ వంటి బ్లాక్‌ బస్టర్‌ చిత్రాన్ని తెరకెక్కించిన దర్శకుడు అశోక్‌ ‘ఎస్‌ బాస్‌’ చిత్రాన్ని తెరకెక్కించారు. ఇది పక్కా కమర్షియల్‌ ఎంటర్‌టైనర్‌లా అన్నీ అంశాలతో రూపొందుతోంది. మంగళవారం హవీష్‌ పుట్టినరోజు. ఈ సందర్భంగా ఈ చిత్రం నుంచి హవీష్‌ స్టైలిష్‌ లుక్‌ పోస్టర్‌ను మేకర్స్‌ విడుదల చేశారు. సినిమా షూటింగ్‌ పూర్తయ్యింది. డిఫరెంట్‌ కాన్సెప్ట్‌తో తెరకెక్కతున్న ఈ చిత్రంలో ఎంటర్‌టైన్‌మెంట్‌ ప్రధానంగా ప్రేక్షకులను ఆకట్టుకోనుంది. ఆకుల శివ ఈ చిత్రానికి కథ, మాటలు అందించారు. బ్రహ్మానందం ఈ చిత్రంలో కీలక పాత్రను పోషించారు. ఆయన ఈ చిత్రంలో నటిస్తుండటంతో ఎంటర్‌టైన్‌మెంట్‌ నెక్ట్స్‌ రేంజ్‌లో ఉంటుందనటంలో సందేహం లేదు. కబీర్‌ లాల్‌ సినిమాటోగ్రఫీ అందిస్తోన్న ఈ చిత్రానికి అనూప్‌ రూబెన్స్‌ సంగీతాన్ని సమకూరుస్తున్నారు. ‘భిన్న కంటెంట్‌ చిత్రాలను ఎంచుకుంటూ తనకంటూ ఓ ప్రత్యేక గుర్తింపు తెచ్చుకున్న కథానాయకుడు హవీష్‌కు ఈ సినిమా సైతం మంచి పేరు తీసుకొస్తుందనే నమ్మకం ఉంది’ అని మేకర్స్‌ తెలిపారు.
