– మాజీ మంత్రి హరీశ్‌రావు
నవతెలంగాణ బ్యూరో-హైదరాబాద్‌
డిసెంబరు నెలలో 14 రోజులు గడిచినా ఇప్పటి వరకు నవంబర్‌ అంగన్‌వాడీలకు జీతాలు ఇవ్వక పోవడమేంటని మాజీ మంత్రి హరీశ్‌రావు ప్రశ్నించారు. ఒకటో తేదీ నాడే ఉద్యోగులకు జీతాలు అంటూ గప్పాలు కొట్టిన సీఎం రేవంత్‌రెడ్డి 39,568 మంది అంగన్వాడీ టీచర్లు, ఆయాలు జీతాలు రాక ఆవేదన చెందుతున్న పరిస్థితిపై సమాధానం చెప్పాలని నిలదీశారు. 10 నెల్లుగా అంగన్వాడీ కేంద్రాలకు అద్దెలు కూడా చెల్లించని దుస్థితిలో ప్రభుత్వం ఉందని ఎద్దేవా చేశారు. ఏడాది కాంగ్రెస్‌ పాలనలో సాధించిన ఘనత ఇదేనన్నారు.
విశ్రాంత ఉపాధ్యాయులను, ఉద్యోగులను సైతం ఇబ్బందులకు గురి చేస్తున్నారని తెలిపారు. హైకోర్టు ఉత్తర్వులు ఉంటే తప్ప హక్కుగా రావాల్సిన రిటైర్మెంట్‌ బెనిఫిట్స్‌ ఇవ్వకుండా వారిని, వారి కుటుంబాలను క్షోభకు గురి చేస్తున్నదన్నారు. ఉద్యోగులందరికీ సకాలంలో జీతాలు చెల్లించి మాట నిలుపుకోవాలని రేవంత్ ప్రభుత్వానికి సూచించారు.
