నేటి యువతరం అనంత విశ్వమే హద్దుగా కృత్రిమ మేధ వంటి సాంకేతికతతో ఎన్నో అద్భుతాలు సృష్టిస్తుందన్నది మన కళ్ల ముందు కదలాడుతున్నది.కానీ కొన్ని సందర్భాల్లో ఐఐటీ, మెడిసిన్‌,విశ్వవిద్యాలయాల స్థాయిలో ఉన్నత విద్యనభ్యసించిన ప్రతిభావంతులైన విద్యార్ధులతో పాటు సామాన్యవ్యక్తులు సైతం జీవితంలో ఎదురయ్యే వివిధ రకాల, రంగాల శారీరక , మానసిక ఓటమిలను, సమస్యలను తట్టుకోలేక డిప్రెషన్‌కు లోనవుతున్నారు. పరీక్షలలో ఫెయిలై కొందరు,ఉద్యోగ అర్హత పరీక్షలో జాబ్‌ రానివారు మరికొందరు,వ్యాపారాల్లో దివాలా తీసినవారు ఇంకొందరు, ప్రేమించిన వ్యక్తులతో జీవితం పొందలేకవారు…ఇలా ఎన్నో సమస్యల సంద్రంలో, కాలపరిణామ క్రమంలో వస్తున్న మార్పులను స్వాగతించలేక ఆత్మవిశ్వాసం కోల్పోయిన కొందరు ఈ పోటీ ప్రపంచంలో తీవ్ర ఒత్తిడికి చిత్తవుతున్నారు.
జీవితం విలువ తెలుసుకోలేక కొన్ని క్షణిక పాటు నిర్ణయాలు తీసుకొని తమతో పాటు తమ కుటుంబాలకు కూడా తీవ్ర సంఘర్షణలను మిగులుస్తున్నారు.ఆశావాద దృక్పథాన్ని వీడి నిరాశ వాదంలో పిచ్చికలలు కంటున్నారు.కొన్ని సందర్భాల్లో ఆత్మహత్యలు చేసుకుంటున్నారు.శాంతిని మరచి ద్వేషపు అభిప్రాయాలతో హత్యలు చేసి హంతకులుగా కూడా మారుతున్నారు. ఏదేమైనా నవతరం ప్రపంచాన్ని ప్రభావితం చేసిన మహానుభావుల జీవితచరిత్రలు చదవడం లేదు.తెలుసుకోవడం లేదు.విద్యాసంస్థల్లో కూడా మార్కులు,గ్రేడుల చాటున వ్యక్తిత్వపు పాఠాలకు సమయం లేదు.చరితను ప్రభావితం చేసిన అసాధారణ వ్యక్తులు కూడా మనలాంటి సాధారణ వ్యక్తులని, వారు కూడా తమ జీవితంలో ఎన్నో సమస్యల్ని అధిగమించారని గుర్తెరగాలి. మొక్కవోని దీక్షతో నిరంతరం ప్రయత్నించి వైఫల్యాల నిశ్శబ్దం చాటున గెలుపు శబ్దమై మిగిలారని, వెలుగు దివ్వెలై నేడు ప్రకాశిస్తున్నారని తెలుసుకోవాలి.
శరీర అవయవాలు పనిచేయకపోయినప్పటికీ కొన్ని దశాబ్దాలుగా తన జీవితం వీల్‌ చైర్‌ కే పరిమితమైన ఆధునిక ఐన్‌ స్టీన్‌ గా ఎదిగిన స్టీఫెన్‌ హాకింగ్‌ జీవన ప్రస్తానం ఎంతో స్ఫూర్తిదాయకం.”ఈ విశ్వం ఎంత పెద్దదైనా కావచ్చు..కానీ మన ప్రయత్నాల ముందు చాలా చిన్నది” అనే హాకింగ్‌ తన అసాధారణ మేధా సంపత్తితో బ్లాకహేోల్స్‌ పై చేసిన పరిశోధనలు నేటి ఆధునిక సైన్సుకు, సైంటిస్టులకు సవాళ్లు గా మారాయి.”ఎ బ్రీఫ్‌ హిస్టరీ ఆఫ్‌ టైమ్‌” పేరుతో ఆయన రాసిన పుస్తకం నేటి బెస్ట్‌ సైన్స్‌ పుస్తకాల్లో ఒకటిగా నిలిచింది.అనంత విశ్వ ఆవిర్భావం నుచి ఎలక్ట్రాన్‌, ప్రోటాన్‌ వంటి సూక్ష్మ పరమాణు కణాల వరకు సైన్స్‌ ప్రస్థానాన్ని హైస్కూల్‌ విద్యార్థులక్కూడా అర్థమయ్యే రీతిలో ఆయన వివరించారు.ప్రపంచవ్యాప్తంగా ”వైకల్యం ఏనాటికీ వైఫల్యం కాదనే” పాఠంతో కొన్ని కోట్ల మందికి స్ఫూర్తి పాఠ్యాంశంగా నిలిచారు.
పెద్దగా అసాధారణ నైపుణ్యాలు లేని బక్కపలుచని గాంధీ 34 కోట్లమంది భారతీయులను ఏకతాటిపై నిలిపి అహింస,సత్యాగ్రహాలతో ఆయన చేసిన రాజకీయ పోరాటం మన దేశానికి స్వాతంత్య్రం సంపాదించడమే కాకుండా విశ్వ విఖ్యాత మేధావుల జీవితాలనే కదిలించింది.ఈ శతాబ్దపు అత్యున్నత వ్యక్తుల్లో ప్రముఖున్ని చేసింది.ఐన్‌ స్టీన్‌,స్టీవ్‌ జాబ్స్‌, సివిరామన్‌, మార్టిన్‌ లూథర్‌ కింగ్‌, నెల్సన్‌ మండేలా వంటి విశ్వ విఖ్యాతులకే గాంధీ జీవితం స్ఫూర్తిగా నిలిచింది.ఆయన జీవితంపై వచ్చిన ”గాంధీ” సినిమా విశేష ప్రాచుర్యం పొంది ఆస్కార్‌ అవార్డుల పంట పండించింది.గాంధీజీ సూక్తులు భవిష్యత్తు తరాలకు జీవిత బాటలయ్యాయి.
‘మహిళవు కాబట్టి ఉన్నత విద్యకు అర్హురాలివి కావంటూ, పరిశోధనలకు అవకాశం ఇవ్వలేమంటూ’ చేసిన అవహేళనలను మేడం క్యూరీ తన అసాధారణ ప్రయత్నాల పట్టుదల పరంపరలో భౌతిక, రసాయన శాస్త్రాల్లో రెండింటిలో నోబెల్‌ గెలిచిన ఏకైక వ్యక్తిగా నిలిచారు నేటికి.రేడియోధార్మికత అంశంపై ఆమె చేసిన ప్రయోగాల ఫలితాలు వైద్యరంగంలో విప్లవాత్మక మార్పులను తీసుకొచ్చాయి.ఆనాటి ప్రఖ్యాత భౌతిక,రసాయన శాస్త్రవేత్తలకే కాక నేటి తరంలో కూడా ఆమె మేధస్సు, కృషి ఆదర్శాలయ్యాయి. దక్షిణాఫ్రికా ప్రజల స్వాతంత్య్రం కోసం దాదాపు ఇరవై ఏండు సంవత్సరాల జైలు జీవితం అనుభవించి ”ఎ లాంగ్‌ వాక్‌ టూ ఫ్రీడం” అంటూ తన జీవిత చరిత్రను విరచించిన నెల్సన్‌ మండేలా నల్లజాతి విప్లవసూర్యుడయ్యాడు.ఐక్యరాజ్యసమితి ఆయన జయంతిని మండేలాడేగా ప్రపంచవ్యాప్తంగా నిర్వహిస్తున్నది. క్షమాగుణం,సహనం, శాంతి వంటి ఆయన అనుసరించిన మార్గాలు ేటి తరానికి విజయ సోపానాలు.
బల్బును కనుగొనే ప్రయత్నంలో వందల ప్రయత్నాలను పట్టుదల వదలకుండా చేసి ప్రపంచానికే వెలుగునిచ్చిన థామస్‌ అల్వా ఎడిసన్‌ మనకు స్ఫూర్తి ప్రదాత. నిరుపేద కుటుంబంలో పుట్టి అడుగడుగునా వివక్షతకు లోనై పట్టుదల వదలకుండా విశ్వమేధావిగా ఎదిగిన భారతరత్న అంబేద్కర్‌ మన పోరాటానికి ఎప్పటికీ ఆద్యుడే. రామేశ్వరం వీధుల నుంచి అంతరిక్షంలోకి ఓ మిస్సైల్‌ లా మారి, రాష్ట్రపతి భవన్‌ వరకు సాగిన అబ్దుల్‌ కలాం సుదూర స్ఫూర్తి ప్రయాణం మనందరికీ ఒక దిక్సూచియే. సచిన్‌ టెండూల్కర్‌, మహెంద్ర సింగ్‌ ధోనీ, అమితాబ్‌ బచ్చన్‌, ఆంగ్‌ సాన్‌ సూకీ, కల్పనా చావ్లా, మదర్‌ థెరిస్సా, సుధామూర్తి వంటి ఇలా ఎందరో వివిధ రంగాల ప్రముఖుల జీవిత చరిత్రలు మన జీవితాలకు వ్యక్తిత్వపు శిఖరాలై మన జీవితాలకు మార్గదర్శనం చేస్తూనే వుంటాయి. మన ఎదుగుదల కోసం, జీవితం విలువ తెలుసుకోవడం కోసం కనీసం నెలకు ఓ ఇద్దరి ప్రఖ్యాత వ్యక్తుల జీవితాలను అధ్యయనం చేద్దాం.నేను ఆరంభించాను ఈ రోజు నుంచే.. మరి మీరు..?
పి. అరుణ్‌ కుమార్‌
9394749536
