– ఎంపీ మల్లు రవికి ఎస్‌కేఎం వినతి
నవతెలంగాణబ్యూరో-హైదరాబాద్‌
అన్ని పంటలకు మద్దతు ధరల చట్టం తీసుకురావాలంటూ లోక్‌సభలో కేంద్ర ప్రభుత్వాన్ని నిలదీయాలని సంయుక్త కిసాన్‌ మోర్చా (ఎస్‌కేఎం) రాష్ట్ర బృందం ఎంపీ మల్లు రవిని కోరింది. ఆదివారం హైదరాబాద్‌లో ఆయన నివాసంలో ఎస్‌కేఎం తెలంగాణ రాష్ట్ర కన్వీనర్‌ పశ్యపద్మ, దళిత బహుజన ఫ్రంట్‌ జాతీయ కార్యదర్శి శంకర్‌, వ్యవసాయ కార్మిక సంఘం రాష్ట్ర ఉపాధ్యక్షులు బుర్రి ప్రసాద్‌, రాష్ట్ర నాయకులు మూడ్‌ శోభన్‌ తదితరులు వినతిపత్రాన్ని అందజేశారు. అన్ని పంటలకు కనీస మద్దతు ధర (ఎంఎస్‌పీి) సీ2 ప్లస్‌ 50 శాతం ప్రాతిపదికన ఇచ్చేందుకు చట్టబద్ధత కల్పించాలని కేంద్రంపై ఒత్తిడి తీసుకరావాలని కోరారు. అన్ని పంటలను గ్యారంటీగా సేకరించాలని విన్నవించారు. రైతులు, వ్యవసాయ కార్మికులందరికీ నెలకు రూ.10 వేలు చొప్పున పెన్షన్‌ ఇవ్వాలని డిమాండ్‌ చేశారు. లోక్‌సభలో రైతు సమస్యలపై ప్రస్తావిస్తానంటూ మల్లు రవి హామీ ఇచ్చారని ఈ సందర్భంగా వారు తెలిపారు.
