– అన్ని పార్టీల మద్దతు
– మూజువాణి ఓటుతో ఆమోదం
– వరంగల్‌ జిల్లా ములుగులో యూనివర్సిటీ
– విద్యార్థుల డ్రాపౌట్స్‌కు కుటుంబ పరిమితులే కారణం : కేంద్ర మంత్రి ధర్మేంద్ర ప్రధాన్‌
– విద్యతో రాజకీయాలు చేయొద్దు : కేంద్రానికి ప్రతిపక్షాల హితవు
పార్లమెంటులో తెలంగాణ సెంట్రల్‌ గిరిజన వర్సిటీ బిల్లు
నవతెలంగాణ – న్యూఢిల్లీ బ్యూరో
తెలంగాణలోని సమ్మక్క సారక్క సెంట్రల్‌ గిరిజన యూనివర్సిటీ ఏర్పాటుకు సంబంధించిన సెంట్రల్‌ యూనివర్సిటీ సవరణ బిల్లును లోక్‌సభ గురువారం ఆమోదించింది. ఈ బిల్లుకు అన్ని పార్టీలూ మద్దతు తెలిపాయి. రెండు రోజుల పాటు వివిధ పార్టీల ఎంపీలు ఈ బిల్లుపై జరిగిన చర్చల్లో పాల్గొన్నారు. బిల్లుకు 40 మంది ఎంపీలు సవరణలు సూచించారు. అనంతరం బిల్లు మూజువాణి ఓటుతో ఆమోదం పొందింది. చర్చల అనంతరం కేంద్ర విద్యాశాఖ మంత్రి ధర్మేంద్ర ప్రధాన్‌ మాట్లాడుతూ సవరణలు సూచించిన ఎంపీలందరికీ ధన్యవాదాలు తెలిపారు. గిరిజన డ్రాపౌట్స్‌, వివక్ష వంటి ప్రతిపక్ష ఎంపీలు చేసిన విమర్శలపై కేంద్ర మంత్రి సమాధానమిస్తూ కుటుంబ పరిమితులు చాలా మంది విద్యార్థులను విద్యకు దూరం చేశాయని అన్నారు. ‘ఈ బిల్లును ఆమోదించడానికి మాకు తొమ్మిదేండ్లు పట్టింది. మీరు చాలా కాలం అధికారంలో ఉండి గిరిజనులకు చేసిందేమీ లేదు. ఇప్పుడు మొసలి కన్నీరు కార్చడం వల్ల ప్రయోజనం లేదు’ అని అన్నారు. యూనివర్సిటీ నిర్మాణానికి భూములు సేకరించడంలో కేసీఆర్‌ ప్రభుత్వమే జాప్యం చేసిందని విమర్శించారు. రాబోయే కాలంలో ఈ యూనివర్సిటీ ఏర్పాటు ప్రాంతీయ ఆకాంక్షలను తీర్చగలదని అన్నారు. అలాగే ఉన్నత విద్య నాణ్యతను పెంచుతుందని తెలిపారు. తెలంగాణ ప్రజలకు ఉన్నత విద్య, పరిశోధనా సౌకర్యాలను సులభతరం చేస్తుందని, ప్రోత్సహిస్తుందని పేర్కొన్నారు. దేశంలోని గిరిజన జనాభాకు గిరిజన కళలు, సంస్కృతి, ఆచారాలు, సాంకేతికతలో పురోగతిలో బోధన, పరిశోధన సౌకర్యాలను అందించడంతో అధునాతన జ్ఞానాన్ని కూడా ప్రోత్సహిస్తుందని అన్నారు. వరంగల్‌ జిల్లా ములుగులో సెంట్రల్‌ ట్రైబల్‌ యూనివర్సిటీని ఏర్పాటు చేయనున్నారు. ఆంధ్రప్రదేశ్‌ పునర్విభజన చట్టంలో ఇచ్చిన హామీ మేరకు ఈ యూనివర్సిటీ ఏర్పాటుకానుంది. గిరిజన యూనివర్సిటీని ఏడేండ్లలో రెండు దశల్లో రూ.889.07 కోట్లతో నిర్మించనున్నారు.
విద్యతో రాజకీయాలొద్దు :కేంద్రానికి ప్రతిపక్షాల హితవు
విద్యతో రాజకీయాలు చేయొద్దని కేంద్ర ప్రభుత్వానికి ప్రతిపక్ష ఎంపీలు హితవు పలికారు. ఆర్‌ఎస్‌పీ ఎంపీ ఎన్‌కె ప్రేమచంద్రన్‌ మాట్లాడుతూ.. ‘ప్రధాని బొమ్మతో విద్యార్థులు ఫోటోలు దిగేందుకు వీలుగా కళాశాలల్లో సెల్ఫీ పాయింట్లు ఉంచితే, దాన్ని రాష్ట్రాలు కూడా అనుసరిస్తాయి. రాష్ట్ర విశ్వవిద్యాలయాల్లో సెల్ఫీ పాయింట్లు ఉంచాలని ముఖ్యమంత్రులు నోటీసులు జారీ చేస్తారు. ఇలాంటి రాజకీయాలే దేశ విశ్వవిద్యాలయాల ప్రతిష్టను దిగజార్చడానికి కారణమవుతాయి’ అని విమర్శించారు. కాంగ్రెస్‌ ఎంపీ అధీర్‌ రంజన్‌ చౌదరి చర్చను ముగించి ‘సెల్ఫీ-అవగాహన’ గల ప్రధాని.. ‘విద్యా అవగాహన’ కలిగి ఉండాలని ఎద్దేవా చేశారు. అలీగఢ్‌ ముస్లిం యూనివర్సిటీ (ఏఎంయూ), జామియా మిలియా ఇస్లామియా యూనివర్సిటీ (జేఎంయూ) వంటి ముస్లీం యూనివర్సిటీలకు 15 శాతం బడ్జెట్‌ను ఎందుకు తగ్గించారని కాంగ్రెస్‌ ఎంపీ మహ్మద్‌ జావేద్‌ కేంద్రాన్ని ప్రశ్నించారు. ‘కొత్త విశ్వవిద్యాలయాలను మాత్రమే ఎందుకు ప్రారంభిస్తున్నారు? ఇప్పటికే ఉన్న విశ్వవిద్యాలయాలను ఎందుకు బలోపేతం చేయరు?’ అని ప్రశ్నించారు. బీఎస్‌పీ ఎంపీ రితేష్‌ పాండే మాట్లాడుతూ అటువంటి కేంద్రీయ విశ్వవిద్యాలయాలు తెరవకముందే దేశం అంతటా గిరిజనులకు అందించే ఏకలవ్య పాఠశాలలను బలోపేతం చేయాలని పునరుద్ఘాటించారు.
గిరిజన, మైనారిటీ విద్యార్థులపై వివక్ష
సమాజ్‌వాదీ పార్టీ ఎంపీ ఎస్‌టీ హసన్‌ మాట్లాడుతూ యూనివర్సిటీల్లో గిరిజన, మైనారిటీ విద్యార్థులు ఎదుర్కొంటున్న వివక్షను ఎత్తిచూపారు. విద్యపై కేంద్రం ఎక్కువ ఖర్చు చేయాలని కోరుతూ, ఈ విశ్వవిద్యాలయాలు అందించే పాఠాలు ప్రాచీన భారతీయ విలువలను ప్రతిబింబించేలా చూడాలని ప్రభుత్వానికి సూచించారు. బీజేపీ ఎంపీ సత్యపాల్‌ సింగ్‌ మాట్లాడుతూ ఉత్తరప్రదేశ్‌లోనూ కేంద్రీయ విశ్వవిద్యాలయాలను ఏర్పాటుచేయాలని కేంద్రాన్ని కోరారు. అదేవిధంగా, బిల్లుకు మద్దతు ఇస్తున్న శివసేన ఎంపీ అరవింద్‌ సావంత్‌ మాట్లాడుతూ గిరిజన విద్యార్థులను ప్రధాన స్రవంతి ఉన్నత విద్యలోకి తీసుకురావడానికి ఇటువంటి విశ్వవిద్యాలయాలలో సిలబస్‌లో సమానత్వం తీసుకురావాలని కోరారు.
విద్యార్థుల ఆత్మహత్యలకు కులతత్వమే కారణం
యూనివర్సిటీల్లో విద్యార్థుల ఆత్మహత్యలకు కులతత్వమే కారణమని ఎఐఎంఐఎం ఎంపీ ఇంతియాజ్‌ జలీల్‌ అన్నారు. ముస్లింల తరువాత ఎస్‌టీ వర్గంలో డ్రాప్‌ అవుట్‌ రేట్లు ఎక్కువగా ఉన్నాయన్నారు. ఈ విశ్వవిద్యాలయాలలో కులతత్వం ప్రబలంగా ఉందని, దీన్ని ఖండించాలని అన్నారు.
