2024 ఎన్నికల సర్వేలతో దేశమంతా ఉత్కంఠ పెరుగుతున్నవేళ తెలుగు రాష్ట్రాల పరిస్థితి మరింత వేడెక్కుతున్నది. ఏపీ ముఖ్యమంత్రి జగన్మోహనరెడ్డి, ఆయ నకన్నా ముందు మాజీ ముఖ్యమంత్రి టీడీపీ అధ్యక్షుడు చంద్రబాబు నాయుడు ఢిల్లీ పర్యటనలు చేసి వచ్చారు. జగన్‌ ప్రధాని మోడీని కలిస్తే చంద్రబాబు హోంమంత్రి అమిత్‌షాతో కలవడం పెద్ద సంచలనంగా ప్రచారమైంది. ఈ రెండు పర్యటనలపై వారి వారి హడావుడి తప్ప అవతలివైపు నుంచి ఎలాంటి అధికారిక స్పందనలు రా లేదు, ఇక తెలంగాణ శాసనసభలో ముఖ్యమంత్రి రేవంత్‌ రెడ్డి ప్రతిపక్ష బీఆర్‌ఎస్‌పై ప్రత్యేకించి మాజీ ముఖ్యమంత్రి కేసీఆర్‌పై రోజూ నిప్పులు కక్కుతుంటే మధ్య లో బీజేపీ ఉభయులపై అస్త్రాలు సంధిస్తు న్నది. ప్రభుత్వం కూలిపోతుందని బీఆర్‌ఎస్‌ మాట్లాడుతుంటే, ఆ పార్టీనే కూలిపోతుందని కాంగ్రెస్‌ వ్యాఖ్యానిస్తున్నది. ఏపీలో పార్టీల ఎమ్మెల్యేలు, ఎంపీలు అటూ ఇటూ మారు తుంటే తెలంగాణలో కాంగ్రెస్‌ బీఆర్‌ఎస్‌ నుంచి ఒక ఎంపీని చేర్చుకున్నది. లోక్‌సభ ఎన్నికల్లో ఎక్కువ సీట్లు గెలవడం రేవంత్‌కు అనివార్యమైన అవసరమనే భావన బలంగా వ్యాపిస్తుంటే ఏపీలో చంద్రబాబుకు ఇది ఆఖ రి పరీక్ష అన్న వాతావరణం నెలకొన్నది. మరో వైపు జగన్‌ ప్రజల్లో పెరిగిన అసంతృప్తి అధిగమించి మరోసారి గద్దె కాపాడుకోవడమెలాగనే వ్యూహాల్లో మునిగివున్నారు. చంద్రబాబు ‘రా కదలిరా’ అంటూ సభలు పెడుతుంటే జగన్‌ ‘సిద్ధం’ సభలతో యుద్ధం ప్రకటిస్తున్నారు. చంద్ర బాబుతో పొత్తు పెట్టుకున్న పెట్టుకున్న జనసేనాని పవన్‌ కళ్యాణ్‌ శాసనసభలోకి ప్రవేశించడమే లక్ష్యంగా తంటాలు పడుతున్నారు. కాంగ్రెస్‌ అధ్యక్ష పీఠం స్వీకరించిన వైఎస్‌ షర్మిల బీజేపీ మత రాజకీయాలను ఖండిస్తున్నా అన్నయ్య తో తనకున్న కుటుంబ విభేదాలపై చేసిన వ్యాఖ్యలతోనే విస్త్రత ప్రచారం పొందుతున్నారు. వీటికి తోడు రెండు రాష్ట్రాల మధ్య కృష్ణా ప్రాజెక్టుల నిర్వహణ రాజకీయంగా కేసీఆర్‌, జగన్‌ స్నేహం, తెలుగుదేశం రేవంత్‌ మంత్రుల మధ్య మైత్రి వంటివి అదనపు అంశాలుగా తయారైనాయి. వీటన్నిటి మధ్యనా వెలువడుతున్న వివిధ సర్వేలు రక రకాల అంచనాలతో ప్రజలను ప్రభావితం చేసేందుకు ప్రయత్నిస్తున్నాయి.
చంద్రబాబు విన్యాసాలు, జగన్‌ సంబంధాలు
బీజేపీతో మళ్లీ జట్టుకట్టడం, దాని నాయకత్వంలో చేరడం కోసం చంద్రబాబు చాలాకాలంగా తలుపులు తెరుచుకుని కూచునేవున్నారు.2018లో ఎన్నికల ముందు ప్రత్యేక హోదా బదులు ప్యాకేజీకి ఒప్పుకున్న చంద్రబాబు చివరలో బీజేపీ నుంచి విడిపోవడం, ఎన్‌డిఎ నుంచి బయటకు రావడం కేవలం ప్రజలను నమ్మించడానికేనని అందరికీ తెలుసు. అందుకే ఆ క్రీడలు ఆయన ఓటమిని ఆపలేకపోయాయి. ఎన్నికల అనంతరం ఎన్నడూ ఆయన గానీ ఆ పార్టీ గాని బీజేపీపై పల్లెత్తు విమర్శ చేయలేదు. ఇక ప్యాకేజీని పాచిపోయిన లడ్డుగా అభివర్ణించి ఎన్నికల్లో వామపక్షాలతో పొత్తు పెట్టుకుని చేగువేరా బొమ్మతో వూరేగిన పవన్‌ కళ్యాణ్‌ ఫలి తాల తర్వాత నేరుగా బీజేపీ కూటమిలో దూరడమే గాక నేరుగా సంఘ పరివార్‌ భావజాలాన్ని కీర్తించడం మొదలుపెట్టారు. మోడీ, అమిత్‌ షాలే అద్భుత నాయకులుగా అనుక్షణం విధే యత ప్రకటిస్తూ వచ్చారు.అదే సమయంలో జగన్‌ ప్రభుత్వాన్ని గద్దెదించడం కోసం ప్రతి పక్షాల ఓట్లు చీలకుండా చూడాలని అందు కు అందరినీ కలుపుతానని టీడీపీతో పొత్తు పెట్టుకున్నారు. ఈ ఉభయులు కూడా రాష్ట్ర సమస్యలపై కేంద్రం నుంచి సాధించుకోవ లసినవి వదిలిపెట్టి కేవలం రాష్ట్ర ప్రభుత్వమే తప్పు చేస్తుందన్న పాట ఎత్తుకున్నారు. మరోవైపు ముఖ్యమంత్రి జగన్‌ కూడా రాష్రానికి రావలసిన ఆర్థిక సహాయం, విభ జన సమస్యల కోసం పట్టుపట్టవలసింది పోయి మోడీకి వంతపాడటం విధానంగా చేసుకు న్నారు. ఆయనకు పూర్తి మెజార్టి వుంది గనక ‘మనమేం చేయలేమని’ చేతులెత్తేశారు.ఈ విధం గా మూడు ప్రాంతీయ పార్టీలూ మోడీ ప్రదక్షణా లలో మునిగితేలడంతో ఏపీ ప్రయోజనాలు ఘోరంగా దెబ్బతిన్నాయి. జగన్‌ తన మీదున్న కేసుల కారణంగా మోడీకి లొంగిపోయారని అం దరూ భావిస్తూవచ్చారు. అయితే గతేడాది చివర లో చంద్రబాబును కూడా జగన్‌ ప్రభుత్వం అనేక కేసులలో కోర్టుకెక్కించడంతో ఆయన కూడా అదే స్థితిలో పడిపోయారనే భావం ప్రజల్లో వచ్చింది. అంతేగాని దేశంలో మతతత్వ రాజకీయాలు, రా ష్ట్రాల హక్కులపై దాడి, వనరుల కోత, పౌర హక్కులపై భావస్వేచ్చపై వేటు వేయడం వంటి రాజకీయ అంశాలేవీ ఈ మూడు పార్టీల ఎజెండాలో లేకపోగా పర స్పర దూషణలే సర్వస్వంగా రాష్ట్ర వ్యవహరాలు నడి చాయి. రాష్ట్రానికి విభజన హామీలు నెరవేర్చని కేంద్రం కొత్తగా విశాఖ ఉక్కు ప్రయివేటీకరణ వంటి దారుణాలకు తెగబడింది.అమరావతి రాజధానికి నాలుగు పైసలు విది ల్చి చేతులు దులుపుకుంది.పోలవరం నత్తనడకకూ ఆటం కాలు కల్పించింది. ఇక రెవెన్యూలోటు భర్తీ వెనకబడిన ప్రాంతాల నిధులు వంటివి ఎండ మావులయ్యాయి. ఇంత జరుగుతున్నా మూడు పార్టీలు పోటీపడి మోడీని మోశా యి తప్ప నిలదీసింది లేదు. వైసీపీ, టీడీపీ పార్లమెం టులో పోటీపడి కేంద్రానికి అనుకూలంగా ఓటు వేస్తూ వచ్చాయి. అదనంగా తెలుగుదేశం అధినేత పొత్తుకోసం తలకిందులుగా తపస్సు చేసినంత పనిచేశారు.
బలం లేని బీజేపీకి దాసోహం
బీజేపీకి నిజానికి గత ఎన్నికల్లో 0.96 శాతం అంటే ఒకశాతం కన్నా తక్కువ ఓట్లు వచ్చాయి. అదే నోటాకు 1.5శాతం ఓట్లు వచ్చాయి.అలాంటి బీజేపీతో పొత్తు ఎం దుకంటే ఎన్నికలు సజావుగా జరిపించుకోవడానికి ఓట్లు వేయించుకోవడానికి అని సమర్థన వినిపిస్తున్నారు. జగన్‌ ను గద్దె దించాలంటే ఇదే మార్గమని టీడీపీ, జనసేన అదేపనిగా వాదించాయి. వాస్తవానికి ఈ రెండు పార్టీలు 2014లోనూ బీజేపీతో కలిసి పనిచేశాయి. కాకుంటే అప్పటికి మోడీ ప్రధానికాదు. జనసేన ఎన్నికల్లో పోటీ కూడా లేకుండా బలపర్చింది.1996లో పదమూడు రోజు ల్లో దిగిపోవలసి వచ్చిన వాజ్‌పేయి సర్కారు 1998లో కొనసాగగలిగిందంటే టీడీపీ ప్లేటు ఫిరాయించి ఆ పం చన చేరడమే కారణం. ఆ విధంగా దేశంలో బీజేపీ సర్కా రు రావడానికి దక్షిణ భారతంలో కాలూనడానికి తొలి కారకుడు చంద్రబాబే. అప్పుడు జగన్‌ కాదు కదా, వాళ్ల నాన్న వైఎస్‌ రాజశేఖరరెడ్డి కూడా అధికారంలో లేరు. కనుక చంద్రబాబుకు సంబంధించినంతవరకూ అధికారం లోకి రావడం తప్ప మరో విధానమేదీ లేదు,అందుకోసం ఎవరితోనైనా కలవడానికి ఆయన సిద్ధమే.ఈ కారణం గానే యుటర్న్‌ ముద్రపడింది. ఈ విషయంలో ఆయనతో పోటీ పడగలిగింది ఒక్క బీహార్‌ సీఎం నితీశ్‌కుమార్‌ ఒక్కరే! ఒక మోడీని కలసి రాజకీయం మొదలెట్టిన పవన్‌ కళ్యాణ్‌ సనాతన ధర్మాన్ని అనుక్షణం పొగిడి పరవశిస్తుం టారు.కనుకనే ఉభయులూ తొలి ఎన్‌డిఎలోనే సభ్యుల య్యారు.తర్వాత కొన్నిసార్లు అటూ ఇటూ తిరిగినా మళ్లీ ఆ గూటికే చేరారు. వైసీపీ విషయానికొస్తే కేంద్రంతో సత్సం బంధాలు అనే మంత్రమే వినిపిస్తుంది.25 మంది ఎంపీలను ఇస్తే కేంద్రం మెడలు వంచి ప్రత్యేక హోదా తేవడం వంటి గొప్పలు అధికారంలోకి వచ్చిన ఆవిరైపో యాయి. ఏతావాతా ఏపీ కాస్త బీజేఏపీగా మార్చేందుకు కారకులైనారు. తానుగా ఆ పార్టీ ఒక్క స్థానం కూడా గెల వలేకపోయినా దాంతో పొత్తు పెట్టుకోవడం తమ విద్యుక్త ధర్మమైనట్టు దాంతో గెలుపు గ్యారంటీ అయినట్టు రెచ్చి పోతున్నారు. చంద్రబాబు ఢిల్లీ వెళ్లిన ప్రతిసారీ అదో జైత్రయాత్రగా చిత్రిస్తుంది అనుకూల మీడియా. బాబు అరెస్టు తర్వాత లోకేశ్‌ ఢిల్లీలో పడిగాపులు కాసిన తీరు దేశమంతా చూసింది. కనక ఈ పొత్తు రాజకీయ వర్గాలకు ఏ మాత్రం ఆశ్యర్యం కలిగించలేదు.బాబు చర్చల తర్వాత ఢిల్లీ వెళ్లి ప్రధానిని కలిసిన జగన్‌ రాష్ట్ర సమస్యలతో పాటు రాజకీయాలు కూడా చర్చించి వచ్చినట్టు సమా చారం. ముఖ్యంగా టీడీపీ గతంలోనూ ఇప్పుడూ కాంగ్రెస్‌ కు మద్దతిస్తున్నదనేది వైసీపీ ప్రధానారోపణ. షర్మిల వెనక కూడా టీడీపీయే వుందంటారు.ఇవన్నీ వారి అభియో గాలు. మీకు వ్యతిరేకమైన కాంగ్రెస్‌ను తెలంగాణలో ఏపీ లో టీడీపీ పరోక్షంగా ఎగదోస్తున్నదని జగన్‌ ఫిర్యాదు చేస్తే క్రైస్తవాన్ని అనుసరించే జగన్‌ హిందూత్వ వ్యతిరేకి అన్నది టీడీపీ సంకేతం. ఇవి బీజేపీకి తెలియనవని వీరి భ్రమ. అన్నీ తెలిసినా అవకాశవాదంతోనూ అవతలి వారి ని దెబ్బతీయడం కోసమూ బీజేపీి ద్వంద్వక్రీడ ఆడుతుంద నేది అసలు విషయం. అది తెలిసీ తమ జుట్టుతోపాటు రాష్ట్ర భవిష్యత్తును కూడా మోడీ ముందు సమర్పణం చేయడం రాజకీయ దివాళాకోరుతనం, నిజం చెప్పాలంటే టీడీపీతో జరిగిన చర్చలను బీజేపీ అధికారికంగా ధృవీక రించడం లేదు కూడా, వారే వెళ్లారు వచ్చారన్న రీతిలో అమిత్‌షా మాట్లాడుతున్నారు.టీడీపీలోనే ఒక వర్గం బలంగా వ్యతిరేకిస్తున్నా చంద్రబాబు మాత్రం చివరి ఛాన్సు బీజేపీతో చేతులు కలపడానికే నిర్ణయిం చుకున్నారు.
ఏపీ, తెలంగాణ భవిష్యత్తు చిత్రం
తెలంగాణలోనూ కాంగ్రెస్‌, బీఆర్‌ఎస్‌ మధ్య ఇదే విధంగా బీజేపీ రాజకీయం నడి పిస్తున్నది. పరస్పర వివాదాలే ముఖ్యమన్నట్టు వ్యవహరిస్తున్న ఆ రెండు పార్టీలూ బీజేపీ ము ప్పును విస్మరిస్తున్నాయి. కాంగ్రెస్‌ ముఖ్య మంత్రి గనక రేవంత్‌ రెడ్డి అప్పుడప్పుడు బీజేపీ పేరు ప్రస్తావిస్తున్నా దాడి మొత్తం బీఆర్‌ఎస్‌ పైనే. ఇక ఆ మధ్య బీజేపీిని చీల్చిచెండాడిన ఆ పార్టీ కూడా ఇప్పుడు పూర్తిగా కాంగ్రెస్‌పైనే గురి పెట్టింది. కొన్నిసార్లు బీజేపీ భాష కూడా మాట్లాడుతున్నది. కాంగ్రెస్‌ కూడా బీజేపీ వ్యతిరేకంగా రాజకీయ పోరాటం ప్రధానమ న్నట్టు వ్యవహరిస్తున సంకేతాలు లేవు. ఎన్నిక ల్లోనూ ఇతరత్రా వామపక్షాలతో కలసి పోరాడ దామంటున్న రేవంత్‌ రెడ్డి ఆచరణలో చర్యలు చేపట్ట వలసే వుంది. మళ్లీ ఏపీకి వస్తే టీడీపీ, జనసేన వామ పక్షాలు కలిస్తే బావుంటుందని ఆశలు వెలిబుచ్చిన సీపీఐ కూడా వాస్తవాలు చూశాక దూరం కావడం అనివార్య మైంది. ఈ మూడు పార్టీల కూటమి టీడీపీకి మరణ శాసనం ఉభయ కమ్యూనిస్టు పార్టీలు విమర్శించాయంటే ఆశ్చర్యం లేదు. దీంతో కేవలం వైసీపీ, టీడీపీ మధ్యనే గిరిటీలు కొడుతున్న ఏపీ రాజకీయ రంగంలో గుణాత్మ కమైన మార్పు వచ్చిందని చెప్పాలి.నిజానికి ఈ వారం ఢిల్లీలో ఈ శక్తులే విశాఖ ఉక్కుపై,ప్రత్యేక హోదాపై పోరా టం ప్రారంభించాయి కూడా. ఈ క్రమంలోనే వైసీపీ, టిడిపీ, జనసేన గాక ఇతర లౌకిక పార్టీలను సంఘాలను కలుపుకుని పోరాడాలని కూడా ఉభయ కమ్యూనిస్టు పార్టీలు నిర్ణయించాయి. బీజేపీ, టీడీపీ కూటమిని ఓడిం చేందుకు, ప్రజా వ్యతిరేక వైసీపీ సర్కారుపై పోరాడేందుకు 20 వతేదీన సదస్సు జరుపుతున్నాయి.ఈ ప్రయత్నాలన్నీ ఫలప్రదం కావాలనీ, ఏపీ ప్రయోజనాలు సాధించేవరకూ పోరాటం కొనసాగాలనీ ఆశిద్దాం. ఎన్నికలలో వైసీపీ, టీడీపీ బీజేపీ, జనసేనలకు తగిన పాఠం చెబితేనే అది సాధ్యమవుతుంది. తెలంగాణలోనూ ప్రజల తీర్పు సార్థకం కావాలంటే కాంగ్రెస్‌ పార్టీ మరింత సమగ్రమైన విధానం తో లౌకిక శక్తుల వేదికను కూడగట్టవలసి వుంటుంది.
