అది నిజంకాదు..

– కేఆర్‌ఎంబీకి ప్రాజెక్టుల అప్పగింతపై మంత్రి ఉత్తమ్‌
– సీతారామ ప్రాజెక్టుపై కేసీఆర్‌ అబద్ధాలు చెప్పారు
– అదో భారీ కుంభకోణం : భట్టి విమర్శ
నవతెలంగాణ ప్రత్యేక ప్రతినిధి-హైదరాబాద్‌
బీఆర్‌ఎస్‌ పరిపాలనలో ప్రజాధనం దుర్వినియోగమైం దని రాష్ట్ర సాగునీటి శాఖ మంత్రి ఎన్‌.ఉత్తమ్‌కుమార్‌రెడ్డి ఆరోపించారు. కేఆర్‌ఎంబీకి ప్రాజెక్టులను అప్పగించడానికి ప్రభుత్వం అంగీకరించలేదని వ్యాఖ్యానించారు. కేసీఆర్‌ పదేండ్ల కాలంలో ప్రాజెక్టులకు జాతీయ హోదా కోసం ఫార్మాట్‌లో దరఖాస్తు చేయలేదని విమర్శించారు. ఉమ్మడి ఖమ్మం జిల్లాలోని సాగునీటి ప్రాజెక్టులపై సచివాలయంలో ఉపముఖ్యమంత్రి మల్లు భట్టి విక్రమార్క, మంత్రులు పొంగులేటి శ్రీనివాస్‌రెడ్డి, తుమ్మల నాగేశ్వర్‌రావుతో కలిసి సమీక్ష నిర్వహించారు. అనంతరం మీడియాతో మాట్లాడారు. ‘రాష్ట్రంలోని ఒక్కో ప్రాజెక్టుపై సమీక్ష చేస్తున్నాం. ఇందులో భాగంగా శుక్రవారం ఉమ్మడి ఖమ్మం జిల్లాలోని సీతారామ, ఇతర సాగునీటి ప్రాజెక్టు పనుల వేగవంతంపై చర్చించాం. అన్ని నీటిపారుదల ప్రాజెక్టుల్లో జరిగినట్టుగానే ఇందులో భారీ కుంభకోణం జరిగింది. ప్రాజెక్టుల పేరిట భారీమొత్తంలో ప్రజాధనం దుర్వినియోగమూంది. ఈ ప్రాజెక్టు గతంలో రాజీవ్‌ దుమ్ముగూడెం, ఇందిరాసాగర్‌ అని రెండు వేర్వేరుగా ఉండేవి. ఆ రెండింటిని ఏవిధంగా ఒక్కటి చేసి సీతారామ ప్రాజెక్టుగా తీర్చిదిద్దారో తెలియడం లేదు. దీనిపై వేల కోట్లు ఖర్చు చేశారు. గత ప్రభుత్వంలో సీఎం గా ఉన్న కేసీఆర్‌ సైతం సీతారామ ప్రాజెక్టుపై అసెంబ్లీలో అబద్ధాలు చెప్పారు. 2014లో బీఆర్‌ఎస్‌ ప్రభుత్వం అధికారంలోకి వచ్చేనాటికి రూ.1400 కోట్ల నుంచి రూ.1500 కోట్లు ఖర్చు చేసిఉంటే దుమ్ముగూడెం, ఇందిరాసాగర్‌ లిఫ్ట్‌ ఇరిగేషన్‌ పథకాలు పూర్తయ్యేవి. 3.32 లక్షల ఎకరాలకు నీరు వచ్చేది. పదేండ్లు దాటింది. మరో రూ.7500 ఖర్చుచేశారు. ఒక్క ఎకరాకు కూడా నీరు ఇవ్వలేదు. సీతారామ ప్రాజెక్టు వ్యయం పెంచి రూ.18 వేలకోట్లకు తీసుకొచ్చారు’ అని ఉత్తమ్‌కుమార్‌రెడ్డి చెప్పారు. కృష్జా జలాల గురించి బీఆర్‌ఎస్‌కు మాట్లాడే అర్హత లేదన్నారు. ఏ ప్రాజెక్టు చూసినా పైసల కోసమే తప్ప, నీళ్ల కోసం కాదని విమర్శించారు. నిబంధనలు పాటించని అధికారులపై చట్ట ప్రకారం చర్యలు తీసుకుంటామన్నారు. జాతీయ హోదా అనేది దేశంలో ఎక్కడా ఇవ్వలేదని కేంద్ర మంత్రి గజేంద్రసింగ్‌ షెకావత్‌ మాతో చెప్పారని అన్నారు. భట్టి విక్రమార్క మాట్లాడుతూ తెలంగాణ రాష్ట్రం తెచ్చుకుందే నీటికోసమని అన్నారు. ‘ప్రత్యేక రాష్ట్రం ఏర్పాటయ్యే నాటికి డిజైన్‌ చేసిన రాజీవ్‌సాగర్‌ ప్రాజెక్టు వ్యయం రూ.1681 కోట్లు. ఉమ్మడి రాష్ట్రంలో అప్పటికే రూ.889 కోట్లు ఖర్చుచేశారు. ఇందిరాసాగర్‌ మొత్తం వ్యయం రూ.1824 కోట్లు. ఉమ్మడి రాష్ట్రంలో దీనిపై ఖర్చు చేసింది రూ.1064 కోట్లు. ఈ రెండు ప్రాజెక్టులు పూర్తిచేసేందుకు ఇంకా ఖర్చు చేయాల్సింది కేవలం రూ.12 కోట్లు మాత్రమే. ఇది పట్టించుకోకుండా రీడిజైన్‌ పేరుతో కొత్తవి తీసుకొచ్చారు. దీనికి అదనంగా సీతమ్మసాగర్‌ బ్యారేజీ అని ప్రారంభించారు. దాని వ్యయం రూ.4481 కోట్లు. అంటే కేవలం రూ.1581 కోట్లతో పూర్తి కావాల్సిన ప్రాజెక్టుల వ్యయాన్ని రూ.22,981 కోట్లకు పెంచారు. వీటి కోసం టన్నెల్‌ అన్నారు. దాని పరిస్థితి ఏంటో తెలియడం లేదు.ఇంత దోపిడీ నుంచి రాష్ట్రాన్ని కాపాడేందుకు ప్రజల సహకారం కావాలి’ అని అభిప్రాయపడ్డారు.

Related posts: