– వ్యవసాయ, మార్కెటింగ్‌ శాఖ అధికారులకు మంత్రి తుమ్మల ఆదేశాలు
– పామాయిల్‌ సాగును అగ్రస్థానంలో నిలుపుతామని వ్యాఖ్య
నవతెలంగాణబ్యూరో-హైదరాబాద్‌
రైతాంగానికి దన్నుగా ఉండేలా వ్యవసాయ, ఉద్యాన, మార్కెటింగ్‌ శాఖలు సమన్వయంతో పని చేయాలని ఆయా శాఖల మంత్రి తుమ్మల నాగేశ్వరరావు ఆదేశించారు. మంగళవారం హైదరాబాద్‌లోని వ్యవసాయశాఖ కార్యదర్శి కార్యాలయంలో ఆ శాఖల ఉన్నతాధికారులతో మంత్రి సమీక్షా సమావేశం నిర్వహించారు. రాష్ట్రంలో వ్యవసాయ, ఉద్యాన, మార్కెటింగ్‌ శాఖల పని తీరు వివరాలను అడిగి తెలుసుకున్నారు. ఈ సందర్భంగా ఆయన మాట్లాడుతూ వ్యవసాయ రంగంపై సీఎం రేవంత్‌రెడ్డి ప్రత్యేక దృష్టి సారిస్తున్నారన్నారు. ఈ రంగంలో అనేక సంస్కరణలు చేపట్టేందుకు ప్రభుత్వాలు కృషి చేస్తోందని తెలిపారు. ఆ శాఖల పూర్తి సమాచారంతో ప్రత్యేక నివేదిక సిద్ధం చేయాలనీ ఉన్నతాధికారుల సమావేశం నిర్వహించాలని సూచించారు. ఉద్యానశాఖకు సంబంధించి రాష్ట్రవ్యాప్తంగా ఉన్న భూముల వివరాలు సమర్పించాలన్నారు. వ్యవసాయ పరిధిలోని అన్ని కార్పొరేషన్ల ఉన్నతాధికారులతో సచివాలయంలో ప్రత్యేక సమావేశం ఏర్పాటు చేసి పూర్తిస్థాయిలో అన్ని అంశాలపై చర్చిద్దామన్నారు. వ్యవసాయ రంగ అభివృద్ధి పనుల కోసం స్థానికంగా ఇరిగేషన్‌, ఆర్‌ అండ్‌ బీ, పంచాయతీ రాజ్‌ శాఖల సేవలు వినియోగించుకోవాలని సూచించారు. ఎక్కడైనా ఇబ్బందులు తలెత్తితే తన దృష్టికి తీసుకురావాలని సూచించారు. రాష్ట్రంలోని 197 మార్కెట్‌ యార్డుల స్థితిగతులు, వాటి పనితీరు, ప్రస్తుత పరిస్థితులపై సమగ్ర వివరాలు అందించాలని మార్కెటింగ్‌ శాఖ అధికారులను ఆదేశిం చారు. వ్యవసాయ మార్కె టింగ్‌ శాఖల్లో సాగుతున్న అభివృద్ధి పనుల పురోగతిపై వీడియో రూపంలో సమగ్ర నివే దిక అందిం చాలని సూచిం చారు. ఇప్పటికే మంజూరైన పనులు, మొదలు కాని పనుల వివరాలు జత చేయాలని ఆదేశించారు. ఇతర రాష్ట్రాలతో పోల్చి మన రాష్ట్రంలో మార్కెటింగ్‌ సమస్యలు, క్రయవిక్రయాలు, ధరలు తదితర అంశాలపై పూర్తి వివరాలు సమర్పించాలని కోరారు. ఆరుగాలం కష్టపడి రైతు పండించిన పంటల ఉత్పత్తులను అమ్ముకునే మార్కెట్‌ యార్డులను వారికి దన్నుగా ఉండేలా తీర్దిదిద్దాలని సూచించారు. మార్కెట్‌ యార్డుల్లో సమస్యల్ని ఎప్పటికప్పుడు మార్కెటింగ్‌ అధికారులు పర్యవేక్షించాలని..ఎక్కడా ఇబ్బందులు లేకుండా చూడాలని సూచించారు. వర్షాలు, ఇతర ఇబ్బందులతో ఎక్కాడా రైతులకు ఇబ్బందులు తలెత్తకుండా చూడాలన్నారు. రాష్ట్రంలోని అన్ని మార్కెట్‌ యార్డుల్ని ఆధునిక హంగులతో తీర్చిదిద్దేలా చర్యలు తీసుకుంటామని చెప్పారు. ఇందుకోసం ఇతర రాష్ట్రాల్లో గొప్పగా పనితీరు కనబరుస్తున్న మార్కెట్లను మోడల్‌గా తీసుకుని ఇక్కడ ఒకటి రెండు మార్కెట్‌ యార్డుల్ని తీర్చిదిద్దేలా చర్యలు తీసుకోవాలన్నారు. మార్కెటింగ్‌ శాఖలో ఎవరైనా అధికారులు నిర్లక్ష్యంగా వ్యవహరిస్తే ఎట్టిపరిస్థితుల్లోనూ ఉపేక్షించేది లేదని హెచ్చరించారు. అలాంటి వారి వివరాలు ఎప్పటికప్పుడు అందించేలా ఉన్నతాధికారులు బాధ్యత తీసుకోవాలన్నారు. రాష్ట్రంలోని అన్ని మార్కెట్‌ యార్డుల కార్యదర్శులతో త్వరలోనే టెలీ కాన్ఫరెన్స్‌ నిర్వహిస్తాన్నారు. రైతుల పంట ఉత్పత్తులకు గిట్టుబాటు ధరలు వచ్చేలా మార్కెట్లు బాధ్యతతో పనిచేసేలా చూడాల్సిన బాధ్యత అధికారులపై ఉందన్నారు. రైతులు నష్టాలు మూటగ ట్టుకోకుండా, యార్డుల్లో పంట ఉత్పత్తులకు నష్టం వాటిల్లకుండా తగిన ఏర్పాట్లు చేయాలని కోరారు. విత్తనాలు, ఎరువులు, పురుగు మందుల సరఫరాలో ప్రయివేటు కంపెనీల దందాను పూర్తిగా అరికట్టాలని సూచించారు. రాష్ట్రంలో ఎక్కడా ఎరువుల కొరత లేకుండా చూడాలని ఆదేశించారు.
పామాయిల్‌ సాగుపై ఫోకస్‌
పామాయిల్‌ సాగు లో దేశంలోనే తెలంగాణ రాష్ట్రాన్ని అగ్రస్థానంలో ఉంచడమే ప్రభుత్వ లక్ష్యమని తుమ్మల ఈ సందర్భంగా చెప్పారు. ఆ వాటి వల్ల రైతులకు నష్టం లేకుండా చూడాల్సిన బాధ్యత అధికారులే తీసుకోవాలన్నారు. ఇందుకోసం ఇతర దేశాల్లో అనుసరిస్తున్న విధానాలపై అధ్యయనం చేసి ఇక్కడ అమలయ్యేలా చొరవ తీసుకోవాల్సిన అవసరముందని చెప్పారు. ఆయిల్‌ పామ్‌ విత్తన కేంద్రంగా రాష్ట్రాన్ని తీర్చిదిద్దేలా ఉద్యానశాఖ పనితీరు ఉండాలని కోరారు. అశ్వారావుపేటలో 400 ఎకరాల్లో ఉన్న వ్యవసాయ కళాశాలను పూర్తిస్థాయిలో వినియోగించుకునేలా అవసరమైన చర్యలు చేపట్టాలని ఆదేశించారు. సమావేశంలో వ్యవసాయసాఖ డిప్యూటీ సెక్రటరీ సత్యశారద, మార్కెటింగ్‌ ఎండీ లక్ష్మీభాయి, ఆయిల్‌ ఫెడ్‌ ఎండీ సుధాకర్‌ రెడ్డితోపాటు ఆయా శాఖలకు చెందిన పలువురు ఉన్నతాధికారులు పాల్గొన్నారు.
