మనిషెంత ఖాళీగా ఉన్నా
మంచానికి పరిమితమైనా
కోర్కెల తాచులు కాటేస్తుంటే
ఆశలు రేసు గుర్రాలపై స్వారీ చేస్తుంటే
వయసు కిరీటం తొడుక్కున్నా
ఒంటరితనం చెట్టుకు వేలాడుతున్నా
సకల దాహాలు దండిగా తీరుతున్నా
సకల సౌకర్యాల ఉయ్యాలలో ఊగుతున్నా
మనసు ఖాళీగా ఉండదు
బురదలోంచి కారు వేగంగా నడిచినట్లు
బట్టలు తడిపే చెమట కారుస్తేనే
ఇంట్లో ముద్ద దిగేవారికి
చెమటను వడి పెట్టి పిండుకుంటూనే
చెమటను అసహ్యించుకునే వారికి
శరీరాన్ని బంగారు పళ్లెంలా పూజించుకుంటూ
ఏసీల గుడ్డులో దాక్కునే వారికి
శ్రమ అసౌందర్యం అనుకునే వారు
సాఫ్ట్వేర్ ట్యాగ్ మౌస్గా మారినవారు
రంగాలేవైనా రంగంలోకి
దిగినవారు, దిగనివారు
సమూహంలో బిజీబిజీగా ఉన్నా
ఆలోచనల ప్రవాహంలా మనసు
కొన్ని ఆలోచనలు మనసును పొక్కిలి చేస్తాయి
కొన్ని ఈదరగాలిలా వెంటాడుతాయి
భయం ముసురు కమ్ముకుంటాయి
ఉన్నచోట ఉండనీయవు,
నిద్రపట్టనీయని దుస్థితి
ఆవేశం, ఆగ్రహం పొయ్యి మండిస్తాయి
అన్నింటి నుంచి మనసు
ఖాళీ అయితేనే ప్రశాంతత
మనసు ఖాళీ చేసేందుకు
ఆశ్రయించాలి మౌనాన్ని
నిలకడ నీటిలో చినుకు పడకుండా చూడాలి
రాళ్లు కాదు, రూపాయలు పడ్డా సమస్యే
యోగ, ధ్యానం తోవలో పడితే
ఏకాగ్రత నిలువెల్లా నిలిస్తే
మనసు ఖాళీ, మనిషి తేజవంతం
– కొమురవెల్లి అంజయ్య
9848005676