సయ్యద్‌ సోహైల్‌ రియాన్‌, రూపా కొడవాయుర్‌ జంటగా నటిస్తున్న చిత్రం ‘మిస్టర్‌ ప్రెగెంట్‌’. ఈ సినిమా అన్ని కార్యక్రమాలు పూర్తి చేసుకుని ఈ నెల 18న రిలీజ్‌కు రెడీ అవుతోంది.
ప్రముఖ పంపిణీ సంస్థ మైత్రీ మూవీ డిస్ట్రిబ్యూషన్‌ ద్వారా ఈ సినిమా నైజాంలో విడుదల కానుంది. ఈ చిత్రాన్ని మైక్‌ మూవీస్‌ పతాకంపై దర్శకుడు శ్రీనివాస్‌ వింజనంపాటి రూపొందించారు. తాజాగా ఈ సినిమా నుంచి ‘ఉల్టా పల్టా..’ సాంగ్‌ను మీడియా ప్రతినిధుల చేతుల మీదుగా మేకర్స్‌ రిలీజ్‌ చేశారు.
ఈ కార్యక్రమంలో దర్శకుడు శ్రీనివాస్‌ వింజనంపాటి మాట్లాడుతూ, ‘ఈ కాన్సెప్ట్‌ క్రియేట్‌ చేసేందుకు నా రియల్‌ లైఫ్‌ ఇన్సిడెంట్స్‌ను స్ఫూర్తిగా తీసుకున్నాను. నా వైఫ్‌ ప్రెగెంట్‌గా ఉన్నప్పుడు అన్ని దగ్గరుండి చూసుకున్నాను. ఏం చేసినా మనం వైఫ్‌కు హెల్ప్‌ చేయగలం కానీ మనం ఆ బాధను తీసుకోలేం. మా పాప పుట్టినప్పుడు ఆమెను నా చేతికి ఇచ్చారు డాక్టర్స్‌. ఆ ఫీలింగ్‌ మాటల్లో చెప్పలేను. అలాంటి అమ్మతనం అనే బాధ్యతను ఒక అబ్బాయి తీసుకుంటే ఎలా ఉంటుందనే ఆలోచన నుంచి ఈ కథ రాసుకున్నా. ఇదొక సెన్సిటివ్‌ సబ్జెక్ట్‌. ఏమాత్రం బ్యాలెన్స్‌ తప్పినా వెకిలిగా, పిచ్చి కామెడీ చేశారని అంటారు. అందుకే చాలా జాగ్రత్తగా, కత్తి మీద సాములా రూపొందించాం. సోహైల్‌, రూపా పోటీ పడి ఫర్‌ ఫార్మ్‌ చేశారు. ఈ సినిమాలో హిలేరియస్‌ ఎంటర్‌టైన్‌మెంట్‌తో పాటు కదిలించే ఎమోషన్‌ కూడా ఉంటుంది. కుటుంబ సభ్యులు, లవర్స్‌ ఇలా.. ఎవరైనా కలిసి చూసేలా ఈ సినిమా ఉంటుంది’ అని తెలిపారు.
‘దర్శకుడు ఈ కథ చెప్పినప్పుడు చాలా ఇన్నోవేటివ్‌గా అనిపించింది. రియల్‌గా ప్రెగెన్సీ అంత బరువుండే ప్రోత్సటిక్స్‌ వాడాము. ఈ సినిమా మొదలైన కొత్తలో కొన్ని ట్రోల్స్‌ వచ్చాయి. కానీ ఇది కుటుంబ సమేతంగా అందరూ కలిసి చూసేలా ఉంటుంది. ఎక్కడా ప్రెగెన్సీ మీద కామెడీ డైలాగ్స్‌ పెట్టలేదు. హుందాగా ఒక కథను తెరకెక్కించాం. సినిమా చూశాక మీ సిస్టర్స్‌, మదర్‌ను హగ్‌ చేసుకుంటారు’ అని హీరో సోహైల్‌ అన్నారు. హీరోయిన్‌ రూపా కొడవయూర్‌ మాట్లాడుతూ, ‘ఈ సినిమాలో ఎంత ఫన్‌ ఉంటుందో అంత ఎమోషన్‌ ఉంటుంది. ఇదొక బ్యూటీఫుల్‌ మూవీ’ అని చెప్పారు. నిర్మాతలు మాట్లాడుతూ, ‘ట్రైలర్‌ రిలీజైన కొద్ది రోజుల్లోనే అన్ని ఏరియాల బిజినెస్‌ కంప్లీట్‌ అయ్యింది. చిన్న సినిమాగా మొదలై..ట్రేడ్‌లో మంచి రెస్పాన్స్‌ తెచ్చుకుంది. ఒక స్పెషల్‌ కాన్సెప్ట్‌ తో ఈ మూవీని నిర్మించాం. పెద్ద పెద్ద డిస్ట్రిబ్యూటర్స్‌ మా సినిమాను చూశారు. ఒక మంచి సినిమా చేశారని అప్రిషియేట్‌ చేశారు. ఇంట్లో సోదరి, తల్లితో కలిసి ఈ సినిమా చూస్తారని ఆశిస్తున్నాం’ అని అన్నారు.
