– రాష్ట్ర ప్రభుత్వం వెల్లడి
నవతెలంగాణ బ్యూరో – హైదరాబాద్‌
ఉద్యోగుల వయోపరిమితికి 61 ఏండ్లు లేదా 33 ఏండ్ల సర్వీసును ప్రాతిపదికగా తీసుకుంటారంటూ వివిధ పత్రికలు, సామాజిక మాధ్యమాల్లో వస్తున్న వార్తల్లో ఏమాత్రం నిజంలేదని రాష్ట్ర ప్రభుత్వం వెల్లడించింది. ఈ మేరకు సమాచార పౌరసంబంధాల శాఖ ప్రత్యేక కమిషనర్‌ హనుమంతరావు శుక్రవారం ఒక ప్రకటన విడుదల చేశారు. ఈ అంశంపై ప్రభుత్వ స్థాయిలో ఏవిధమైన ప్రతిపాదన కానీ, ఫైల్‌ నిర్వహణ కానీ లేదని స్పష్టం చేశారు. ఈ విధమైన ఊహాజనిత వార్తలు రాయడం సరైంది కాదని తెలిపారు. ఇలాంటి అవాస్తవ వార్తలను ప్రచురించే, ప్రచారం చేసే వారిపై చట్టరీత్యా కఠిన చర్యలు తీసుకునే అంశాన్ని ప్రభుత్వం పరిశీలిస్తుందని పేర్కొన్నారు.
