ఆద్యంతం వినోదాన్ని పంచడానికి అల్లరి నరేష్‌ ‘ఆ ఒక్కటి అడక్కు’ చిత్రంతో సిద్ధం అయ్యారు, ఇప్పటికే విడుదలైన టీజర్‌ నవ్వుల జల్లులు కురిపించి, సినిమా పై అంచనాలు పెంచింది. చిలకా ప్రొడక్షన్స్‌ బ్యానర్‌ పై రాజీవ్‌ చిలక నిర్మించిన ఈ చిత్రానికి నూతన దర్శకుడు మల్లి అంకం దర్శకత్వం వహించారు. భరత్‌ లక్ష్మీపతి సహ నిర్మాత. ఈ సినిమాలో అల్లరి నరేష్‌ సరసన ఫరియా అబ్దుల్లా హీరోయిన్‌గా నటిస్తోంది. సోమవారం మేకర్స్‌ ఈ సినిమా విడుదల తేదీకి సంబంధించిన అప్డేట్‌ ఇచ్చారు. వేసవి సెలవులను పురస్కరించుకుని మే 3న ఈ చిత్రాన్ని రిలీజ్‌ చేయబోతున్నారు. చాలా కాలం తర్వాత అల్లరి నరేష్‌ని పూర్తి ఫన్‌ క్యారెక్టర్‌లో చూడాలని ఆయన అభిమానులతోపాటు ప్రేక్షకులు కూడా ఆసక్తిగా ఎదురు చూస్తున్నారు. టాలీవుడ్‌ బిగ్‌ డిస్ట్రిబ్యూషన్‌ హౌస్‌ ఏషియన్‌ సురేష్‌ ఎంటర్టైన్మెంట్‌ ఎల్‌ ఎల్‌ పి తెలంగాణకు సంబంధించిన థియేట్రికల్‌ హక్కులను పొందింది. ఈ సినిమాని వారు తెలుగు రాష్ట్రాల్లో భారీగా విడుదల చేసేందుకు సన్నాహాలు చేస్తున్నారు.
