పారదర్శకతే పాలనాధికారి ప్రధాన ధ్యేయం

నల్లగొండ జిల్లా కలెక్టర్ గా సి. నారాయణ రెడ్డి  బాధ్యతలు చేపట్టిన మూడు రోజుల్లోనే పాలనలో ప్రత్యేకతను చూపించారు. జిల్లాలో విస్తృతంగా తనిఖీలు చేస్తూ అధికారుల్లో జవాబుదారీతనం పెంచుతున్నారు. సమయానికి కార్యాలయానికి వస్తూ అక్కడ పనిచేస్తున్న సిబ్బందినీ అప్రమత్తం చేస్తున్నారు. ప్రభుత్వ కార్యాలయాలను తనిఖీ చేస్తూ అక్కడివారితో మమేకమై భరోసా కల్పిస్తున్నారు. అధికారిగా చేయాల్సిన పనులను తప్పకుండా చేస్తానని నమ్మకం కల్పిస్తున్నారు. మొదటి సమీక్ష సమావేశంలోనే ప్రజల సమస్యలను పరిష్కరించే దిశగా ప్రతి మండల కేంద్రంలో ప్రజావాణి కార్యక్రమాన్ని పటిష్టంగా నిర్వహించాలని ఆదేశాలు జారీ చేశారు. అధికారులతో సమీక్ష సమావేశాలు నిర్వహించారు. వారిచ్చిన సలహాలు, సూచనలు స్వీకరిస్తూనే అధికారులుగా తామేం చేయాలో దిశానిర్దేశం చేస్తున్నారు. ప్రజా సమస్యలు పరిష్కరించడానికి అన్ని శాఖల అధికారులు కలిసి సమన్వయంతో పని చేయాలని ఆదేశించారు. ధరణిపై ప్రత్యేక దృష్టి పెట్టి సమస్యలు పరిష్కరించేలా చర్యలు తీసుకోవాలని సూచించారు. పనిచేసే అధికారులను ప్రోత్సహిస్తామని పనిచేయని అధికారుల పట్ల కఠినంగా వ్యవహరిస్తామని  చెప్పారు.

కలెక్టర్ నారాయణరెడ్డి విధి నిర్వహణలో ముక్కుసూటిగా వ్యవహరిస్తూ ముందుకెళ్తున్నారు. గత నెల 16వ తేదీన విధుల్లో చేరిన నాటినుండి తనదైన శైలిలో అధికార, రోజువారి పాలనలో వినూత్నంగా వ్యవహరిస్తూ దూకుడు ప్రదర్శిస్తున్నారు. గడిచిన నెలనర రోజుల్లోనే తన మార్కును చూపించారు. ప్రజావాణిలో వచ్చిన ఫిర్యాదుల తక్షణ పరిష్కారం కోసం అధికారులకు ఎప్పటికప్పుడు ఆదేశాలు ఇవ్వడంతో పాటు రాష్ట్రస్థాయిలో ఉన్నతాధికారుల నుంచి వచ్చిన ఆదేశాలను పక్కాగా అమలు చేస్తున్నారు. బాధ్యతలు చేపట్టిన మూడు రోజులకే జూన్ 19న ప్రభుత్వ జనరల్ ఆసుపత్రిని ఆకస్మిక తనిఖీ చేసి రోగుల నుండి డబ్బులు వసూలు చేస్తున్న ఇద్దరు వార్డ్ బాయ్ లను సస్పెండ్ చేశారు. వైద్యులు సమయపాలన పాటించాలని ఆదేశించారు. విధులను నిర్లక్ష్యం చేస్తే కఠిన చర్యలు తీసుకుంటామని హెచ్చరించారు. ప్రభుత్వ జనరల్ ఆస్పత్రి పై ప్రజలకు మెరుగైన సేవలు అందించే ఉద్దేశంతో వారానికి రెండు రోజులు  అధికారులు పర్యవేక్షణ ఏర్పాటు చేశారు.ఆ సమయంలో ఇది నచ్చని కొంతమంది వైద్యులు నిరసన చేపట్టినా  ఆ సమస్యకు పరిష్కారాన్ని చూపిస్తూ సద్దుమనిగేల చేశారు.జూలై 11వ తేదీన తిప్పర్తి ప్రాథమిక ఆరోగ్య కేంద్రాన్ని తనిఖీ చేసిన సమయంలో అనధికారికంగా విధులకు గైర్హాజరైన ఫార్మసిస్ట్ పై చర్యలు తీసుకోవాలని సూచించడంతో డీఎంహెచ్ఓ ఫార్మసిస్ట్ ను సస్పెండ్ చేశారు. జూలై 19వ తేదీన హాలియా ప్రాథమిక ఆరోగ్య కేంద్రాన్ని ఆకస్మిక తనిఖీ చేశారు. అక్కడ హాజరు రిజిస్టర్ పరిశీలించారు. ముందస్తు అనుమతి లేకుండా గైర్హాజరైన సీనియర్ అసిస్టెంట్ ను సస్పెండ్ చేశారు. 20వ తేదీన జిల్లా వ్యవసాయ శాఖ కార్యాలయాన్ని ఆకస్మికంగా తనిఖీ చేసిన కలెక్టర్ మూడు రోజులుగా అనాధికారికంగా విధులకు గైర్హాజరవుతున్న వ్యవసాయ శాఖ పాలన అధికారి (ఎఓ) ను సస్పెండ్ చేశారు.

కలెక్టర్ నారాయణ రెడ్డి భిన్నమైన పనితీరును ప్రదర్శిస్తున్నారు. కలెక్టరేట్ కు వెళ్లినా, ఇతర కార్యాలయాలకు తనిఖీలకు వెళ్లినా ఉన్నతాధికారిననే గర్వాన్ని ఏ మాత్రం ప్రదర్శించడం లేదు. అక్కడున్న సమస్యలకు పరిష్కారం చూపే ప్రయత్నం చేస్తున్నారు. విద్య, వైద్యంపై ప్రధానంగా దృష్టి సారించి అనేక మార్పులకు శ్రీకారం చుడుతున్నారు. కలెక్టరేట్ లో సైతం సమస్యల పరిష్కారం కోసం వచ్చిన ప్రతీ ఒక్కరినీ కలుస్తూ ఓర్పుగా సమాధానం చెబుతున్నారు. నల్లగొండ జిల్లాలో తన మార్కు పాలనగా అడుగులు వేస్తున్నారు.