ఆగస్టు 15, 2023న ఎర్రకోటపై మన ప్రధాని నరేంద్రమోడీ పదోసారి జెండా ఆవిష్కరిస్తూ వేయి సంవత్సరా లకు గుర్తుండే ప్రణాళికలు, పథకాలు అమలు చేశామని ప్రకటించారు. 2024 ఎన్నికల్లో గెలిచి ఎర్రకోటపై తానే జెండా ఆవిష్కరిస్తానని చెప్పుకొచ్చారు. ప్రయివేటీకరించిన ఎర్రకోటలో ఆగస్టు ఉత్సవాలకు కేంద్ర ప్రభుత్వం రూ.10లక్షలు కిరాయి చెల్లించింది. దేశంలోని ప్రభుత్వరంగ సంస్థలను ప్రయివేటీకరిస్తున్న మోడీ ప్రభుత్వం దేశాన్ని ప్రపంచంలోనే అగ్రస్థానంలో నిలిపానని, 2025 నాటికి మూడవ ఆర్థిక వ్యవస్థగా ఐదు ట్రిలియన్‌ డాలర్లకు పెంపుదల చేస్తానని ప్రకటించారు. ప్రస్తుతం 3.72 ట్రిలియన్‌ డాలర్ల వ్యవస్థలో ఉన్నాం. కరోనా నుండి దేశంలో పరిశ్రమలు, సేవారంగంలో కోట్ల ఉద్యోగాలు తగ్గి పోయాయి. ప్రపంచంలోని 195 దేశాలలో భారతదేశం అవినీతిలో 85వ స్థానంలో, సామాజిక పురోగతిలో 127వ స్థానం నిలిచింది. సులభతర వాణిజ్యంలో 63వ స్థానం, ప్రపంచ ఆవిష్కరణలలో 40వ స్థానం, మానవ అభివృద్ధి సూచికలో 132వ స్థానంలో ఉన్నట్లు ప్రపంచ బ్యాంక్‌ ప్రకటించింది.
సంస్కరణల అమలుతో రైతుల ఆత్మహత్యలు
16 మే 2014లో అధికారం చేపట్టిన మోడీ ప్రభుత్వం గడిచిన తొమ్మిది సంవత్సరాలలో 84పథకాలను ప్రకటించింది. వీటిని ప్రారంభించడమే తప్ప ఏ ఒక్క పథకం సమగ్రంగా ఆమలుకు పూనుకోలేదు. పట్టణ, గ్రామీణ ప్రజలకు ఆదాయాల పెంపు, బీమా సౌకర్యంతో పాటు ఉపాధి అవకాశాలు ఈ పథకాల ముఖ్య ఉద్దేశం. ప్రణాళిక సంఘాన్ని రద్దు చేసి నిటిఅయోగ్‌ ఏర్పాటు ద్వారా దేశ అభివృద్ధికి ఆటంకం కల్పించారు. గత ప్రభుత్వాలు 1951 నుండి 2012 వరకు 12 ప్రణాళికా బోర్డులను ఏర్పాటు చేసి రూ.20లక్షల కోట్లు వ్యయం చేసి పరిశ్రమల స్థాపన, వ్యవసాయంలో స్వయం సమృద్ధి కల్పించారు. ఆహార ధాన్యాలను ఎగుమతులు చేసి ప్రపంచంలో అగ్రదేశాల సరసన నిలిపారు. ఎగుమతులు పెరుగు తుండటం గమనించిన జి7 దేశాలు మోడీ ప్రభుత్వంపై ఒత్తిడి తెచ్చి అభివృద్ధిని నిలవరించడానికి సంస్కరణలను అమలు చేస్తున్నారు. ఈ సంస్కరణల వలన దేశాభివృద్ధి నిలిచిపోవడమేకాక ఏటా12,600 మంది రైతులు ఆత్మహత్యలకు పాల్పడుతున్నారు. ఇది వ్యవసాయాన్నే నమ్ముకున్న రైతుకుటుంబాలకు తీరని వేదన. వ్యవసాయ రంగంలో పరిశోధనలు, మార్కెటింగ్‌ వ్యవస్థతో పాటు భూముల సేకరణ కార్పొరేట్‌లపరం చేశారు. దేశంలోని పరిశోధన కేంద్రాలన్నీ నిర్వీర్య మయ్యాయి. టెక్నాలజీని ఇతర దేశాల నుండి దిగుమతి చేసుకుంటున్నాం. ఇక్కడి వాతావరణానికి సరిపడక వ్యవసాయ ఉత్పత్తులు దెబ్బ తిన్నాయి.ప్రధాని మోడీ కాలంలో ఏటా రూ.4లక్షల కోట్లు వ్యవసాయ ఉత్పత్తులు దిగుమతులు చేసుకుంటున్నాం. ముతక ధాన్యాల ఉపఉత్పత్తులు, వంట నూనెలు, పప్పులు, పంచదార, పత్తితోపాటు మాంసం కూడా దిగుమతి చేసుకుంటున్నాం.
పథకాలు కాగితాలకే పరిమితం
ప్రణాళికా సంఘం రద్దుకావడంతో అభివృద్ధికి అటంకం ఏర్పడింది. దేశంలోని 7,935 పట్టణాలలో 37.70 కోట్ల ప్రజలను స్వచ్ఛ భారత్‌ పేరుతో అభివృద్ధి చేస్తామని అన్నారు. మేకిన్‌ ఇండియా పథకంతో దేశాన్ని మేన్యుఫాక్చరింగ్‌ హబ్‌గా రూపొందించడంతో పాటు, డిజిటల్‌ ఇండియా పథకంతో స్కిల్డ్‌, అన్‌స్కిల్డ్‌, శిక్షణ ద్వారా ఉపాధి కల్పన, సూపర్‌ కంప్యూటర్ల ఏర్పాటుకు ప్రకటించిన పథకాలు కాగితాలకే పరిమితమయ్యాయి. ఏటా రూ.3.5లక్షలకోట్ల విలువైన విద్యుత్‌ యంత్రాలు, విద్యుతేతర పరికరాలు దిగుమతులు చేసుకుంటున్నాం. వాస్తవానికి ఈ సరుకులు దేశంలో ఉత్పత్తి చేయడానికి తగినంత ముడిసరుకు, మానవ వనరులు ఉన్నాయి. వీటిని వినియోగించకుండా ఇతర దేశాల నుండి దిగుమతులు చేసుకుంటున్నారు. స్టార్టప్‌ ఇండియా, స్టాండప్‌ ఇండియా పథకాలతో విదేశీ పెట్టుబడులు అకర్షించడానికి వనరులు కల్పిస్తున్నారు. దేశ పరిశ్రమలను మూసి వేస్తున్నారు. వ్యవసాయరంగం, పారిశ్రామిక రంగంలో 100శాతం ‘విదేశీ సంస్థాగత పెట్టుబడి’ రాబట్టి వారు లాభాలు తరలించుకుపోయే విధంగా విధానాలు రూపొందించారు. 2022 నాటికి రైతుల ఆదాయం రెట్టింపు చేస్తానని ప్రకటించి అందుకనుగుణంగా 15 పథకాలను ప్రకటించారు. వ్యవసాయం, అనుబంధ రంగాల అభివృద్ధికి మౌలిక వసతుల కింద లక్ష కోట్ల పథకాన్ని కేంద్ర ఆర్థిక మంత్రి నిర్మలా సీతారామన్‌ ప్రవేశపెట్టారు. కానీ అమలుకు నోచుకోలేదు. ఎయిర్‌ ఇండియా, బిఎస్‌ఎన్‌ఎల్‌, షిప్పింగ్‌ కార్పొరేషన్‌ను లాభాల్లోకి తెస్తానన్న ప్రభుత్వం వాటిని అమ్మకానికి పెట్టింది. ఆహార అభివృద్ధిలో వెనుకబాటుతనం వలన దేశంలో 25కోట్లమంది దారిద్య్రంలో మగ్గుతున్నారు. ఆత్మనిర్బర్‌ భారత్‌ (స్వయం పోషకత్వ భారత్‌) అస్థిత్వాన్ని కోల్పోయే స్థితికి దిగజారుతున్నాయి. ఈ విషయం ప్రపంచ బ్యాంకు, ప్రపంచ అర్థిక సంస్థ నివేదికలే చెబుతున్నాయి.
పార్లమెంట్‌లో చర్చించకుండానే చట్టాలు ఆమోదం
సాంఘికంగా దేశంలో హిందూమత ప్రచారాన్ని గావిస్తూ 1. ఏకరూప సంస్కృతి, 2. జాతీయ పౌరసత్వ రిజిస్ట్రేషన్‌, 3.ఈశాన్య రాష్ట్రాల అభివృద్ధి పేరుతో మత రాజకీయాలను కొనసాగిస్తూ జాతుల మధ్య తగాదాలను సృష్టిస్తున్నారు. దశాబ్దాల తరబడి నివాసం ఉంటున్నవారిలో కొన్ని మతాలకే పౌరసత్వం కల్పించటానికి చట్టాలు చేశారు. ఈ విధానం వలన ఈశాన్య రాష్ట్రాలలో శాంతిభద్రతలు కరువై లక్షలమంది వలసలు పోతున్నారు. బానిసత్వం రూపుమాపుతామని ప్రకటించిన కేంద్రం బానిస లక్షణాలనే కొనసాగిస్తున్నది. గోవధ నిషేధం పేరుతో ఆహార విధానాలపై దాడులు, హత్యలు సాగిస్తున్నారు. తన వ్యక్తిగత కమిట్‌మెంట్‌తో కొత్త పార్లమెంట్‌ భవనాన్ని నిర్మాణం చేశానని ఘనంగా చెప్పిన ప్రభుత్వం, మసీదులు, చర్చిలు, మైనార్టీల ప్రార్థనా స్థలాలను కూల్చడానికి హిందూమతం పేరుతో మూకదాడులు చేస్తున్నారు. చట్టాలలో మార్పులు తెస్తున్నారు. నాటి ఆంగ్లేయుల చట్టాలకు పేర్లు మార్చి శిక్షలను పెంచి పార్లమెంటులో చర్చించకుండానే ఆమోదిస్తున్నారు. 2047లో 100 సంవత్సరాల స్వాతంత్య్ర దినోత్సవాన్ని ‘అమృతకాల్‌’ పేరుతో ప్రచారం చేస్తూ ప్రస్తుతం ప్రజలు అనుభవిస్తున్న స్వాతంత్య్రాన్ని హరించి వేస్తున్నారు.
నిత్యావసరాల ధరలను నిరోధించడంలో విఫలం
గత కరోనా కాలంలో పట్టణాలకు వలసలు వెళ్ళిన 19కోట్లమంది ప్రజలు ఉపాధి కోల్పోయి తిరిగి గ్రామాలకు వచ్చారు. వారికి ఎలాంటి ప్రత్యామ్నాయ ఉపాధి కల్పించలేదు. రెండు కోట్లమందికి ఏటా ఉపాధి కల్పిస్తామన్న ప్రభుత్వం రైల్వే శాఖ, రవాణాశాఖ, రక్షణ శాఖలో ఉన్న కోట్ల ఖాళీలు భర్తీ చేయడంలేదు. గత 9సంవత్సరాల మోడీ పాలనలో దేశంలో నిరుద్యోగం 8శాతం నుండి 22శాతానికి పెరిగినట్లు ప్రపంచ బ్యాంక్‌ నివేదిక పేర్కొంది. ప్రభుత్వ వ్యయంపై కాగ్‌ నివేదిక అనేక అభ్యతరాలు చెప్పినప్పటికీ ఏ ఒక్కటీ పాటించలేదు. 2024 పార్లమెంట్‌ ఎన్నికల దృష్ట్యా ఆగస్టు జెండా ఆవిష్కరణ సందర్భంగా రానున్న ఐదు సంవత్సరాలలో ‘విశ్వకర్మ పథకం’ ద్వారా వృత్తిదారులకు రూ.13వేల కోట్లు కేటాయించ బోతున్నట్లు ప్రకటించారు. 169 పట్టణాలలో ప్రభుత్వ, ప్రయివేటు పథకం కింద రూ.57,613 కోట్లతో 10,000 విద్యుత్‌ బస్సులను సరఫరా చేస్తామని, 9 రాష్ట్రాలలోని 35జిల్లాలో రూ.32,500 కోట్లతో బహుళ రైల్వే ట్రాక్స్‌, మౌలిక సౌకర్యాలు కల్పిస్తామని, అమలుకాని పాత పథకాలతో పాటు కొత్త పథకాలను ప్రకటించారు. డిజిటల్‌ భారత్‌కు రూ.14,903 కోట్లు కేటాయిస్తూ బడ్జెట్‌ తెస్తానని ప్రకటించారు.
ఇన్ని ప్రకటనలు చేసిన కేంద్ర ప్రభుత్వం నిత్యావసర సరకుల ధరల పెరుగుదలను నిరోధించడంలో విఫలమైంది. పరోక్ష పన్నులు 32శాతం నుండి 42.74శాతానికి పెంచారు. కార్పొరేట్‌లకు ప్రత్యేక్ష పన్నులు ఇతరదేశాలలో 35శాతం ఉండగా, ఇక్కడ 25శాతానికి తగ్గించారు. ప్రభుత్వం ఈ తొమ్మిదేండ్ల కాలంలో అంతకు ముందున్న రూ.55 లక్షల కోట్లకు తోడుగా పెరిగిన అప్పులు రూ.155 లక్షల కోట్లకు పెరిగాయి. వీటికి రూ.12లక్షల కోట్లు వడ్డీలు చెల్లిస్తున్నాం. పేదలకు ఉపయోగపడే ఉపాధి హామీ చట్టం, రైతులకు ఉపయోగపడే ఎరువుల సబ్సిడీలు పెద్ద ఎత్తున తగ్గించారు. దళిత, గిరిజన, మైనార్టిలే టార్టెట్‌గా వారిపై ఆర్థిక, సాంఘిక దాడులు చేస్తున్న కేంద్రం ప్రకటించే పథకాలు ప్రజలకు భ్రమలు కల్పించడానికే తప్ప ఆచరణలో అమలు జరగడం లేదు. పథకాలు ప్రకటించడమే తప్ప వాటిని అమలు చేయాలని చిత్తశుద్ధి ప్రధాని మోడీకీ లేదు. అందుకే పథకాలన్నీ నీటిమూటలుగానే మారాయి.
సెల్‌:9490098666
సారంపల్లి మల్లారెడ్డి
