హీరో కార్తి నటించిన తన 25వ చిత్రం ‘జపాన్‌’. ‘జోకర్‌’ ఫేమ్‌ రాజు మురుగన్‌ దర్శకత్వం వహించిన ఈ హైస్ట్‌ థ్రిల్లర్‌ని డ్రీమ్‌ వారియర్‌ పిక్చర్స్‌ పతాకంపై ఎస్‌ ఆర్‌ ప్రకాష్‌ బాబు, ఎస్‌ ఆర్‌ ప్రభు నిర్మించారు. అను ఇమ్మాన్యుయేల్‌ హీరోయిన్‌గా నటించింది. అన్నపూర్ణ స్టూడియోస్‌ ఈ చిత్రాన్ని తెలుగు రాష్ట్రాల్లో విడుదల చేస్తోంది. ‘దీపావళి’ కానుకగా గ్రాండ్‌గా థియేటర్స్‌ ద్వారా ఈ సినిమా ప్రేక్షకుల ముందుకు రానుంది. ఈ సందర్భంగా హీరో కార్తి మీడియాతో ముచ్చటించారు. ఆ విశేషాల సమాహారం ఆయన మాటల్లోనే..
‘జపాన్‌’ ట్రూ స్టొరీ కాదు. కానీ వాస్తవ సంఘటనలు స్ఫూర్తి ఉంటుంది. దర్శకుడు రాజు మురుగన్‌ రిపోర్టర్‌ నుంచి డైరెక్టర్‌ అయ్యారు. ఆయన చూసిన అనుభవాలు కూడా ఇందులో ఉన్నాయి. ‘జోకర్‌’ సినిమాకి ఆయనకు నేషనల్‌ అవార్డ్‌ వచ్చింది. ‘జపాన్‌’లో మరో కొత్తకోణం ఆవిష్కరించారు. సినిమా చాలా కొత్త అనుభూతిని ఇస్తుంది. ఈ సినిమా స్క్రిప్ట్‌ చదువుతున్నప్పుడే ఇదే అవుట్‌ అఫ్‌ ది బాక్స్‌ మూవీ అనిపించింది. ఇందులో ప్రతి సన్నివేశం చాలా కొత్తగా, ఒరిజినల్‌గా ఉంటుంది. అయితే ‘జపాన్‌’ అనే పేరు ఎందుకు పెట్టామో సినిమా చూస్తే అర్థం అవుతుంది.
అలాగే ఇందులో సెటైర్‌తో పాటు డార్క్‌ కామెడీ బాగా పండింది. ‘ఊపిరి’ సినిమాకి తమిళ వెర్షన్‌ డైలాగులు రాసింది కూడా దర్శకుడు రాజునే. అప్పుడే ఆయన హ్యుమర్‌ చూసి షాక్‌ అయ్యాను.
ఇందులో ఆ హ్యుమర్‌ ప్రేక్షకులను సర్‌ప్రైజ్‌ చేస్తుంది. చాలా రోజుల తర్వాత మాస్‌తో పాటు హ్యుమర్‌ సెటైర్‌ ఉన్న డిఫరెంట్‌ రోల్‌ ఇందులో చేశాను.
ఈ సినిమా అన్నీ ఫన్‌ ఎలిమెంట్స్‌తో నేటి సమాజాన్ని రిఫ్లెక్ట్‌ చేస్తుంది. ఈ కథ అందరికీ కనెక్ట్‌ అవుతుంది. యూనివర్సల్‌ ఆడియన్స్‌కి ప్రజెంట్‌ చేయడానికే ప్రతిభావంతులైన సాంకేతిక నిపుణులతో పని చేశాం. ఎస్‌ రవివర్మన్‌ అద్భుతమైన విజువల్‌ ట్రీట్మెంట్‌ ఇచ్చారు. అలాగే జీవీ ప్రకాష్‌ మ్యూజిక్‌తో మరో స్థాయికి తీసుకెళ్ళారు. విజువల్‌ ఎలా అయితే కొత్తగా ఉన్నాయో జీవీ కూడా చాలా కొత్తగా సంగీతం చేశారు. అన్నపూర్ణ స్టూడియోస్‌తో కలిసి సినిమా చేయడం చాలా ఆనందంగా ఉంది.
‘ఖైదీ 2 ‘ కోసం కోసం నేనూ వెయిటింగ్‌ ( నవ్వుతూ). ప్రస్తుతం చర్చలు జరుగుతున్నాయి. రోలెక్స్‌ గురించి ప్రేక్షకుల్లో చాలా అంచనాలు ఉన్నాయి. దీని గురించి అన్నయ్య (సూర్య), దర్శకుడు లోకేష్‌ కనకరాజ్‌ని అడగాలి. ప్రస్తుతం ‘సూదుకవ్వం’ చిత్ర దర్శకుడితో ఓ సినిమా చేస్తున్నాను. అలాగే ’96’ దర్శకుడు ప్రేమ్‌ కుమార్‌తో సినిమా ఉంది. ఈ రెండూ దేనికవే ప్రత్యేకం.
అలాగే ‘ఖైదీ 2, సర్దార్‌ 2’ కూడా ఉన్నాయి.
