పవన్ కళ్యాణ్ తన సినీ ప్రయాణంలో తొలిసారిగా ‘హరి హర వీర మల్లు పార్ట్‌-1 స్వార్డ్‌ వర్సెస్‌ స్పిరిట్‌’ అనే పీరియాడికల్‌ యాక్షన్‌ సినిమాలో నటిస్తున్నారు. నిర్మాత ఎ.ఎం.రత్నం సమర్పణలో మెగా సూర్య ప్రొడక్షన్స్‌ పతాకంపై ఎ.దయాకర్‌ రావు ఈ చిత్రాన్ని నిర్మిస్తున్నారు. దర్శకుడు జ్యోతి కష్ణ ఈ భారీ యాక్షన్‌ ఎపిక్‌ని తెరకెక్కిస్తున్నారు. ఎం.ఎం. కీరవాణి సంగీతం అందిస్తున్న ఈ చిత్రంలోని పాటల కోసం ప్రేక్షకులు ఎంతగానో ఎదురుచూస్తున్నారు. నూతన సంవత్సరం సందర్భంగా అభిమానులు, ప్రేక్షకుల్లో ఉత్సాహం నింపే వార్తను నిర్మాతలు పంచుకున్నారు. ఈ సినిమా నుంచి ‘మాట వినాలి’ అంటూ సాగే మొదటి గీతాన్ని ఈనెల 6వ తేదీన ఉదయం 9:06 గంటలకు విడుదల చేయ నున్నట్లు తెలుపుతూ ప్రత్యేక పోస్టర్‌ను రిలీజ్‌ చేశారు. పవన్‌కళ్యాణ్‌ లుక్‌ పోస్టర్‌లో ఆకట్టు కుంటోంది. పెంచల్‌ దాస్‌ సాహిత్యం అందించిన ఈ గీతాన్ని పవన్ కళ్యాణ్ స్వయంగా ఆలపించడం విశేషం. పవన్ కళ్యాణ్ సినిమాల్లో సంగీతానికి ప్రత్యేక స్థానం ఉంటుంది. ఆయన సినిమాల్లోని పాటలు కేవలం ఉత్సాహాన్ని కలిగించడమే కాదు, సమాజాన్ని చైతన్య పరిచేలా, యువతలో స్ఫూర్తి నింపేలా ఉంటాయి. ఇక తన సినిమాల్లో పవన్ కళ్యాణ్ స్వయంగా ఆలపించే పాటలకు ప్రేక్షకుల్లో ఎంతో క్రేజ్‌ ఉంది. ‘తమ్ముడు’, ‘జానీ’, ‘అత్తారింటికి దారేది’, ‘అజ్ఞాత వాసి’ వంటి తదితర సినిమాల్లో తన గాత్రంతో కట్టిపడేశారు. ఇప్పుడు ‘మాట వినాలి’ అంటూ మరోసారి తన స్వరంతో మాయ చేయడానికి పవన్ కళ్యాణ్ సిద్ధమయ్యారు. పవన్ కళ్యాణ్ చారిత్రాత్మక యోధుడిగా నటిస్తున్న ఈ ఎపిక్‌ యాక్షన్‌ డ్రామా ‘హరి హర వీర మల్లు పార్ట్‌-1 స్వార్డ్‌ వర్సెస్‌ స్పిరిట్‌’ చిత్రం మార్చి 28న ప్రపంచవ్యాప్తంగా తెలుగు, తమిళం, మలయాళం, హిందీ, కన్నడ భాషల్లో విడుదల కానుంది.
