– రాష్ట్ర ఎన్నికల సంఘం అధికారి సి.పార్థ సారధి
నవతెలంగాణ బ్యూరో-హైదరాబాద్‌
ప్రజాస్వామ్యానికి ఓటు ఆయువుపట్టులాంటిదని రాష్ట్ర ఎన్నికల సంఘం అధికారి సి పార్థసారధి అన్నారు. హైదరాబాద్‌లోని బంజారాహిల్స్‌లోని ఢిల్లీ పబ్లిక్‌ స్కూల్‌లో సోమవారం ఏర్పాటు చేసిన పోలింగ్‌ బూత్‌లో ఆయన తన కుటుంబ సభ్యులతో కలసి ఓటు హక్కును వినియోగించుకున్నారు. అనంతరం మాట్లాడుతూ .. ఐదేండ్ల మన భవిష్యత్తును నిర్ణయించేది ఓటు మాత్రమేనని గుర్తు చేశారు. ప్రస్తుతం యువతకు వివిధ కారణాలవల్ల ఓటు పట్ల ఆసక్తి తగ్గుతోందని చెప్పారు. ”నేను ఒక్కణ్ని ఓటు వెయ్యకపోతే ఏమవుతుంది… ఏం కాదులే” అని చాలా మంది భావిస్తున్నారన్నారు. నీటి చుక్కలన్నీ కలిస్తేనే సముద్రం అవుతుంది కదా.. అలాగే అందరూ ఓటు వేసినప్పుడే అది నిజమైన ప్రజాస్వామ్యం అవుతుందని గుర్తు చేశారు. ఎన్నికల రోజు అంటే ఎంజారు చేయడానికి ఇచ్చే సెలవు కాదనీ, విలువైన ఓటు వేయడానికి వచ్చిన ఒక సువర్ణావకాశమని తెలిపారు.
