అంబేద్కర్‌ కోరుకున్నది ఏమిటి

What did Ambedkar want?బాబాసాహెబ్‌ బి.ఆర్‌.అంబేద్కర్‌ డిసెంబర్‌ 6, 1956న చనిపోయారు. అదే తేదీన బీజేపీ అయోధ్యలో బాబ్రి మసీదును, దానితో పాటు దేశానికి తాను ఇచ్చిన మాటను కూల్చేసింది. కరసేవ పేరుతో 1992లో బీజేపీ ప్రారంభించిన యాత్ర బాబ్రీ మసీదు కూల్చడానికేనని దేశమంతా ఆందోళన చెందింది. ఆ సందర్భంగా పివి ప్రభుత్వం జరిపిన జాతీయ సమగ్రతా మండలి (నేషనల్‌ ఇంటిగ్రేషన్‌ కౌన్సిల్‌) సమావేశంలో బీజేపీ నాయకులు అటల్‌ బిహారి వాజ్‌పేయి, లాల్‌కృష్ణ అడ్వానీ, మురళీ మనోహర్‌ జోషిల నాయకత్వం ఆ సమావేశంలో తాము బాబ్రీ మసీదును కూల్చబోమని దేశానికి హమీ ఇచ్చారు. ఆనాటి ప్రతిపక్షాలన్నీ బీజేపీ అసలు ఉద్దేశాన్ని గమనించి రామ జన్మభూమి యాత్రపై తీవ్ర అభ్యంతరాలు వ్యక్తం చేశాయి. ఆ నేపధ్యంలో ప్రధానిగా ఉన్న పివి నరసంహారావు జాతీయ సమగ్రతా మండలి సమావేశం ఏర్పాటు చేశారు. దేశమంతా ఆ సమావేశం ఏమి నిర్ణయం చేస్తుందోనని ఎదురు చూసింది. వాజ్‌పేయు ఆ సమావేశంలో తాము బాబ్రీ మసీదును కూల్చబోవడం లేదని హామీ ఇచ్చారు. కానీ బయటికి కన్పించే ఏనుగు దంతాలు వేరు, ఆహారం నమిలే దంతాలు వేరు (హాథీ కా దాంత్‌ దిఖానే కా అలగ్‌ ఖానేగా అలగ్‌) అన్నట్లు బీజేపీకి కడుపులో ఒక ఉద్దేశం ఉంటుంది. బయటికి మరొకటి చెప్తుంది. ప్రస్తుత బీజేపీకి, దాని పూర్వరూపం జనసంఫ్‌ుకు వాటి మూలవిరాట్‌ ఆర్‌ఎస్‌ఎస్‌ అది వెన్నతో పెట్టిన విద్య.
చిత్తశుద్ధి గల రాజకీయ పరిశీలకులు ఎప్పుడూ బీజేపీ మాటలను నమ్మలేరు. బాబ్రీ మసీదును కూల్చడంలోనూ అదే పద్ధతిని బీజేపీ అనుసరించింది. ఎన్‌ఐసి సమావేశాన్ని ఏర్పాటు చేసిన పివి నర్సింహారావు చిత్తశుద్ధి కూడా ఏపాటిదో అనంతర పరిణామాలు తేటతెల్లం చేశాయి. పివి కాంగ్రెస్‌ నాయకుడిగా ప్రధాని సింహాసనం అదిష్టించినా ఆయన మత రాజకీయాలకు ఊతమిచ్చారు. ఆ సమయంలో తనను సలహా అడిగిన ప్రస్తుత ఆర్థిక మంత్రి నిర్మలా సీతారామన్‌, ఆమె భర్త పరకాల ప్రభాకర్‌ను బీజేపీలో చేరమన్నారు. కాంగ్రెస్‌ పార్టీ ఆయన్ని దూరం పెట్టింది.
ప్రజాభిమతాన్ని వమ్ము చేయడానికి
పివి దగ్గర కార్యదర్శిగా పని చేసిన ఐఏఎస్‌ అధికారి పివిఆర్‌ కె.ప్రసాద్‌ తన ఆత్మకథలో ఆనాటి సంగతులను నెమరేస్తూ పివి ఆనాడు.. బీజేపీ వివాదాన్ని సృష్టించిన బాబ్రీ స్థలంలో రాముని గుడి రావాలి, ఆ కీర్తి కాంగ్రెస్‌కే దక్కాలి అన్న భావనతో ఉండేవారని చెప్పారు. పివికి మీడియా అపర చాణుక్యుడని ఒక భుజకీర్తి తగిలించింది. ఇతర పార్టీల పార్లమెంటరీ పక్షాలను చీల్చి లోక్‌సభలో కాంగ్రెస్‌ స్థానాన్ని మైనారిటీ నుండి మెజారిటీ సీట్లు గల పార్టీగా మార్చడంలో ఆయన అపర చాణక్య నీతి పనికొచ్చింది. ఇందిరా గాంధీ హత్య తర్వాత ఏర్పడిన రాజకీయ వాతావరణంలో రాజీవ్‌గాంధీ పెద్ద మెజారిటీతో ప్రధాని అయ్యారు. అయినా ఫిరాయింపులు జరగొచ్చన్న భయంతో ఫిరాయింపుల నిరోధక చట్టం తెచ్చారు. ఆ చట్టానికి పివి తూట్లు పొడిచి జంప్‌ జిలానీలకు అవకాశం కల్పించారు. ప్రజాభిమతాన్ని వమ్ము చేయడానికి పివి మార్గం వేశారు. బాబ్రీ మసీదు కూల్చివేత తదనంతరం దేశంలో ప్రజ్వరిల్లిన హింసాకాండను ప్రాణ, ఆస్తి నష్టాలను నివారించడంలో పివి అపర చాణక్యం పనిచేయలేదు. దేశమంతటా రెచ్చగొట్టిన మత విద్వేష వాతావరణం వల్ల బీజేపీ బలపడింది. కాంగ్రెస్‌ రెంటికి చెడ్డ రేవడయింది. లౌకిక విలువలపై కాంగ్రెస్‌లో ఒకనాటి చిత్తశుద్ధి లోపించడమే దానికి ప్రాణాంతకమైంది.
రాజ్యాంగం పట్ల అభ్యంతరం
బీజేపీకి దాని మూల విరాట్‌ అయిన ఆర్‌ఎస్‌ఎస్‌ నాలుకలకు నరం లేదని చెప్పడానికి ఒక తాజా ఘటనను కూడా ఉదహరించవచ్చు. భారత రాజ్యాంగ 75వ దినోత్సవం సందర్భంగా నవంబర్‌ 26న బీజేపీ నాయకులు చేసిన ప్రసంగాలకు వారి అంతరంగానికి అసలు సంబంధమే లేదు. రాజ్యాంగ రచనా సంఘం అధ్యక్షుడిగా బాబాసాహెబ్‌ బి.ఆర్‌.అంబేద్కర్‌ ప్రవేశ పెట్టిన రాజ్యాంగాన్ని, ప్రజలు ఎన్నుకొన్న భారత రాజ్యాంగసభ 1949 నవంబర్‌ 26న ఆమోదించి. కాగా ఆర్‌ఎస్‌ఎస్‌ తన అధికార పత్రిక అర్గనైజర్‌ ద్వారా 1949 నవంబర్‌ 30 నాటి సంచికలో రాజ్యాంగం పట్ల తీవ్ర అభ్యంతరం చెప్తూ ‘మనుస్మృతి’ మన రాజ్యాంగం కావాలని నిసిగ్గుగా చెప్పింది. ఆ నాటికి రెండేండ్ల ముందుగానే మహద్‌ చెరువు సత్యాగ్రహం సందర్భంగా అంబేద్కర్‌ మనుస్మృతిని బహిరంగంగా తగలబెట్టారు. వర్ణాశ్రమ ధర్మాన్ని, స్త్రీల అణిచివేతను సమర్థించే గ్రంధం మనుస్మృతి. అశాస్త్రీయ నమ్మకాలకు అది ఆలవాలం. శాస్త్ర విజ్ఞానం వడివడిగా అడుగులు ముందుకేస్తున్న దశలో ఆర్‌ఎస్‌ఎస్‌ మనుస్మృతే మన రాజ్యాంగం కావాలంది. ఒక నేరానికి ఒకే శిక్షను రాజ్యాంగం ప్రతిపాదించింది. నేరం ఒకటే అయినా వర్ణం ప్రకారం శిక్ష వేయాలని చెప్తుంది మనుస్మృతి. అంటే మహిళపై అత్యాచారం చేసిన బ్రాహ్మణుడికి తక్కువ శిక్ష వేయాలి. శూద్రునికి కఠినమైన శిక్ష వేయాలని మనుస్మృతి చెప్తుంది. స్త్రీకి స్వాతంత్య్రం ఉండరాదని చాటుతుంది. అలాంటి మనుస్మృతియే మనకు రాజ్యాంగం కావాలని చెప్పిన సంస్థకు చెందిన సంతతి మొన్న భిన్నంగా మాట్లాడింది. మనుస్మృతియే భారత రాజ్యాంగం కావాలి అనడం తప్పు అని కూడా వారు చెప్పరు.
బీజేపీకి దిమ్మతిరిగే సమాధానం
మన రాజ్యాంగం ప్రతిపాదించిన విలువల్లో లౌకికతత్వం, సమానత్వం అతి ముఖ్యమైనవి. వీటి పట్ల బీజేపీకి తీవ్ర అభ్యంతరాలున్నాయి. రాజ్యాంగ ప్రవేశికలోని సమానత్వం, లౌకికతత్వం అన్న మాటలను ఇందిరాగాంధీ తన రాజకీయ అవసరాల కోసం చేర్చారు కనుక ఆ మాటలను తొలగించాలని బీజేపీ నాయకులు మొదటి నుండి డిమాండ్‌ చేస్తూనే ఉన్నారు. వారం రోజుల కిందట భారత సుప్రీం కోర్టు ఆ వివాదంపై బీజేపీకి దిమ్మతిరిగే సమాధానమిచ్చింది. రాజ్యాంగ ప్రవేశికలోని ‘లౌకిక’ అన్న పదానికి అర్థం అన్ని మతాలను సమానంగా గౌరవించడం కనుక ఆ పదాన్ని ప్రవేశిక నుండి తొలగించనవసరం లేదని ఖరాఖండిగా చెప్పేసింది. అలాగే సోషలిస్టు అన్న పదాన్ని కూడా తొలగించాల్సిన అవసరం లేదని తేల్చి చెప్పింది. సోషలిస్టు అన్న పదానికి అర్థం సామాజిక, రాజకీయ, ఆర్థికరంగాల్లోని అసమానతలను తొలగించడం కనుక ఆ పదాన్ని కూడా ప్రవేశిక నుండి తొలగించవలసిందిగా ప్రభుత్వానికి ఆదేశించలేమని సుప్రీం కోర్టు ప్రధాన న్యాయమూర్తి సంజీవి ఖన్నా, న్యాయమూర్తి సంజరు కుమార్‌తో కూడిన బెంచ్‌ తేల్చిచెప్పింది. ఈ రెండు పదాలను తొలగించాలంటూ న్యాయస్థానం ఆదేశించాలని పట్టుబడిన వారిలో బీజేపీ ప్రముఖ నాయకుడు సుబ్రమణ్య స్వామి కూడా ఉన్నారు. ఆ పదాలను రాజ్యాంగ ప్రవేశికలో చేర్చడం ఒక దగా అంటూ ఆయన వ్యాఖ్యానించారు. లౌకిక అన్న పదాన్ని రాజ్యాంగ సభ కావాలనే ప్రవేశికలో చేర్చలేదన్న వాదననూ సుప్రీం ఆమోదించలేదు. కాగా ‘సెక్యులర్‌’, ‘సోషలిస్టు’ అన్న పదాలను రాజ్యాంగ సవరణ ద్వారా చేర్చిన 44 ఏండ్ల తర్వాత వాటిని తొలగించాలని కోర్టు ముందుకు రావడంలో ఫిటిషనర్ల ఉద్దేశాలు ఏమిటో అర్థమవుతున్నాయని కూడా బెంచ్‌ వ్యాఖ్యానించింది.
సుదీర్ఘ చర్చల అనంతరమే
రాజ్యాంగ సభ ఆమోదించిన రాజ్యాంగమే పనికి రాదని ఆ రోజు వాదించిన వారు ఇప్పుడు రాజ్యాంగ సభ ఉద్దేశాన్ని, గత ప్రభుత్వాలు తన రాజ్యాంగ సవరణల ద్వారా భ్రష్టు పట్టించాయని ఆరోపిస్తూ తమ నిజమైన లక్ష్యాన్ని మరుగు పరుస్తున్నాయి. 1998లో అటల్‌ బిహారి వాజ్‌పేయి ప్రభుత్వం రాజ్యాంగాన్ని సమీక్షించేందుకు వెంకట చెల్లయ్య కమిషన్‌ను వేసింది. కమిషన్‌ పట్ల తీవ్ర వ్యతిరేకత వ్యక్తం కావడంతో వాజ్‌పేయి ప్రభుత్వం తన ప్రయత్నం నుండి వెనకంజ వేయక తప్పలేదు. ఆర్‌ఎస్‌ఎస్‌ ప్రకారం భారత రాజ్యాంగం పాశ్చాత్య విలువలపై ఆధారపడి రూపొందింది. బ్రిటిష్‌ ప్రభుత్వం 1935లో చేసిన చట్టంపై ఆధారపడి మన రాజ్యాంగాన్ని రాశారని అందులో భారతీయ విలువలు లేవని ఆర్‌ఎస్‌ఎస్‌ చెప్తుంది. బీజేపీ కూడా మూడేండ్ల సుదీర్ఘ చర్చల అనంతరమే రాజ్యాంగ రచనా సంఘం రాజ్యాంగాన్ని ఆమోదించిన విషయాన్ని గుర్తించరు. ఆ సభలోని సభ్యులంతా ఎన్నికై వచ్చిన వారే. అందరూ స్వాతంత్రోద్యమంలో పాల్గొన్న వారే. ఆ విలువలే రాజ్యాంగంలో ప్రతిబింబించాయి. ఆ విలువల్లో ప్రధానమైంది లౌకికవాదం.
విభజించు పాలించు వారి లక్ష్యం
నిజానికి భారతదేశ విభజన, బ్రిటిష్‌ వలస పాలకుల ”విభజించు పాలించు” ఎత్తుగడ వల్ల జరిగింది. తన రెండు జాతుల సిద్ధాంతంతో అందుకు మార్గం వేసింది మొదట విడి సావర్కర్‌. కాగా రెండో వ్యక్తి మహ్మదలీ జిన్నా. ఆయన మొదట కాంగ్రెస్‌లో ఉండి ఆ తర్వాత ముస్లింలీగ్‌ను స్థాపించాడు. జిన్నా కంటే ముందే హిందూ మహాసభ నాయకుడు విడి సావర్కర్‌ రెండు జాతుల సిద్ధాంతాన్ని లేవనెత్తారు. ఆయన సిద్ధాంతాన్ని అనుసరించి భారతదేశం హిందువులది మాత్రమే, ఇక్కడ హైందవేతరులు ఉండాల్సి వస్తే వారు రెండవ తరగతి పౌరులుగా జీవించాలి లేదా భారతదేశం వదలి వెళ్లాలని బీజేపీ కోరుతుంది. ఎన్‌ఆర్‌సి, సీఏఏ మొదలైన చట్టాలు, అస్సాంలో నడిపిన శిబిరాలు రెండు జాతుల సిద్ధాంత పర్యవసానాలే.
పెత్తనం చేయడానికే మనుస్మృతి
ప్రజలందరి మధ్య నెలకొనాల్సిన సమానత్వం, లౌకికతత్వం బీజేపీకి పాశ్చాత్య విలువలుగా కన్పించడంలో ఆశ్చర్యంలేదు. ఎందుకంటే మనుస్మృతి ప్రజలందరినీ సమానులుగా చూడదు. మనుస్మృతి సనాతన ధర్మం గురించే చెప్తుంది. కనుక ఇతరులు దానికి విదేశీయులుగా, వారిది విదేశీ సాంప్రదాయంగా కన్పించడం సహజం. దేశంలోని మెజారిటీ ప్రజల శ్రమను దోచుకొని వారిపై పెత్తనం చేయడానికి మనుస్మృతి పనికొచ్చింది. ఇస్లాం, క్రైస్తవం మనుస్మృతికి లోబడి ఉండవు కనుక అవి విదేశీ మతాలన్న సాకుతో ఆర్‌ఎస్‌ఎస్‌, బీజేపీలు ఆ మతాల్లోని ప్రజలందరి పట్ల శత్రు భావంతో వ్యవహరిస్తాయి, నిరాకరిస్తాయి. బౌద్ధాన్ని కూడా మనువాదులు వ్యతిరేకిస్తారు. అందుకు కారణం మనుస్మృతే. మనుస్మృతి ప్రవచించే వర్ణ వ్యవస్థను, మూఢ విశ్వాసాలను బౌద్ధం నిరాకరిస్తుంది. కనుక దాన్ని సముద్రాల అవతలికి నెట్టేశారు. మనుస్మృతే మనకు రాజ్యాంగం కావాలని కోరే వారు దేశీయ మతమైనా సరే బౌద్ధాన్ని ఎలా సహిస్తారు?
సౌభ్రాతృత్వం వారికి నచ్చదు
మనుస్మృతి మహిళలను పురుషులతో సమానంగా చూడదు. మనుస్మృతిలో అనేక చోట్ల మహిళలపై విధించిన ఆంక్షలున్నాయి. భారత రాజ్యాంగం దానికి భిన్నం. అది స్త్రీ పురుషులకు సమాన హక్కులు కల్పిస్తోంది. స్త్రీలు ఇంటికి పరిమితం కావాలని చెప్పదు. వారికి ఆస్తి హక్కుపై అవకాశం కల్పించింది. పౌరులందరికీ ఒకే విలువగల ఓటు హక్కును కల్పించింది. అలాగే మన రాజ్యాంగం మత స్వేచ్ఛను కల్పించింది. భారత పౌరుడు ఏ మతాన్నయినా ఆచరించవచ్చు. ఏ మతాన్ని ఆచరించకుండా కూడా భారత చట్టాలకు లోబడి స్వేచ్ఛగా బతకొచ్చు. భగత్‌సింగ్‌ చెప్పిన విశ్వమానవ సౌభ్రాతృత్వ విలువలు బీజేపీకి నచ్చవు. దానిది సంకుచిత దృష్టి. ఆ దృష్టితోనే అది బాబ్రీ మసీదును వివాద గ్రస్తం చేసి కూల్చేసింది. ఇప్పుడు మరిన్ని మసీదులపై ప్రజల్లో మత విద్వేషాలు రెచ్చగొట్టేందుకు ప్రయత్నిస్తుంది. దేశాన్ని కలుషితం చేసి అధికార పీఠాలను అధిష్టించడమే దాని లక్ష్యం. మత విద్వేష వాతావరణం నుండి దేశం, దేశ పౌరులు బయట పడిన నాడు బీజేపీకి దక్కేది శంకరగిరి మాణ్యాలే.

– ఎస్‌. వినయ కుమార్‌ ,
99897 18311