ఆరోగ్యంగా ఉండాలంటే శరీరానికి అన్ని రకాల విటమిన్లు అందాలన్నది మనందరికీ తెలిసిందే. శరీరంలో అన్ని అవయవాలు సరిగ్గా పనిచేయాలన్నా, నిత్యం ఆరోగ్యంగా ఉండాలన్నా విటమిన్లు సమకూరాల్సిందే. ముఖ్యంగా మహిళల ఆరోగ్యాన్ని సంరక్షించడంలో విటమిన్‌ సి కీలక పాత్ర పోషిస్తుంది. మహిళల్లో విటమిన్‌ సి లోపం ఉంటే ఎన్నో రకాల వ్యాధుల బారిన పడే అవకాశం ఉంటుందని నిపుణులు హెచ్చరిస్తున్నారు. విటమిన్‌ సి కండరాలు, అవయవాలకు చాలా మేలు చేసే యాంటీఆక్సిడెంట్లను కలిగి ఉంటుంది. కొల్లాజెన్‌ నిర్మాణానికి ఇది చాలా మంచిది. గర్భిణులు, పాలిచ్చే మహిళలు విటమిన్‌ సిని కచ్చితంగా తీసుకోవాలని నిపుణులు చెబుతున్నారు. రుతుక్రమం సమయంలో వచ్చే సమస్యలకు విటమిన్‌ సీతో చెక్‌ పెట్టొచ్చు. ముఖ్యంగా పీరియడ్స్‌ సమయంలో నొప్పిని దూరం చేయడంలో విటమిన్‌ సి ఉపయోగపడుతుంది. అలాగే ఒత్తిడి, రక్తపోటును కూడా అదుపులో ఉంచడంలో కీలక పాత్ర పోషిస్తుంది. మహిళల్లో సాధారణంగా కనిపించే హార్మోన్ల అసమతుల్యతకు విటమిన్‌ సీతో చెక్‌ పెట్టొచ్చు. అలాగే ఎల్‌డిఎల్‌ చెడు కొలెస్ట్రాల్‌, ట్రైగ్లిజరైడ్‌లను, అధిక రక్తపోటు నియంత్రణలో ఉంచుతుంది. కాబట్టి మహిళలు ప్రతి రోజూ తాము తీసుకునే ఆహారంలో విటమిన్‌ సి కచ్చితంగా ఉండేలా చూసుకోవాలని సూచిస్తున్నారు.
