టింట్‌ స్ప్రీ స్టూడియోస్‌ బ్యానర్‌పై ఆలేటి రాజేష్‌ నిర్మాతగా రామమూర్తి కొట్టాల దర్శకత్వంలో తెరకెక్కుతున్న స్వచ్ఛమైన ప్రేమ కథా చిత్రం ‘వెంకటలక్ష్మితో’. ‘ఏడాది కిందట’ అనే ట్యాగ్‌లైన్‌తో రూపొందిన ఈ చిత్రంలో రఘు గద్వాల్‌ హీరోగా, ప్రియాంక శ్రీ, శివ ప్రసన్న హీరోయిన్స్‌గా నటించారు. తాజాగా ఈ మూవీ టైటిల్‌ పోస్టర్‌ను హీరో శ్రీకాంత్‌ లాంచ్‌ చేశారు. ఈ సందర్భంగా ఆయన మాట్లాడుతూ, ‘టైటిల్‌ చాలా బాగుంది. క్యాచీగా ఉంది. షార్ట్‌ ఫిల్మ్స్‌తో ఫేమస్‌ అయిన హీరో రఘు ఈ సినిమా ద్వారా అందర్నీ ఆకట్టుకుంటాడని నమ్ముతున్నా. కంటెంట్‌ ఉన్న సినిమాలను తెలుగు ప్రేక్షకులు కచ్చితంగా ఆదరిస్తారు. ది కూడ ఓ కొత్త కంటెంట్‌తో రాబోతోందని అర్ధమవుతోంది. సినిమా విజయం సాధించాలని ఆశిస్తున్నాను’ అని అన్నారు. ‘నూతన నటీనటులతో ఏడాది కిందట ఈ చిత్రాన్ని మొదలుపెట్టాం. ప్రమోషన్స్‌లో భాగంగా హీరో శ్రీకాంత్‌ మాకు సపోర్ట్‌ చేయడం చాలా ఆనందంగా ఉంది’ అని హీరో రఘు గద్వాల చెప్పారు. చిత్ర దర్శకుడు రామమూర్తి కొట్టాల మాట్లాడుతూ,’ఇదొక స్వచ్ఛమైన ప్రేమ కథా చిత్రం. థ్రిల్లర్‌, సస్పెన్స్‌తో పాటు అన్ని ఎలిమెంట్స్‌తో ఈ చిత్రాన్ని రూపొందించాం. అంతా కొత్త వారితో తీసిన ఈ సినిమా ప్రేక్షకులకు చాలా ఫ్రెష్‌ ఫీల్‌ని ఇస్తుంది. నిర్మాత రాజేష్‌ బాగా సపోర్ట్‌ చేశారు’ అని అన్నారు. ‘షూటింగ్‌తోపాటు పోస్ట్‌ ప్రొడక్షన్‌ కూడా పూర్తయ్యింది. దర్శకుడితో సహా అంతా కొత్త వారితో ఈ చిత్రాన్ని నిర్మించాం. సరికొత్త కంటెంట్‌తో వస్తున్న మా చిత్రం కచ్చితంగా విజయం సాధిస్తుందనే నమ్మకంతో ఉన్నాం’ అని నిర్మాత ఆలేటి రాజేష్‌ తెలిపారు.
